ସମାଧି ଉପରେ ବିଜୟ
ଯୋହନ ୧୧:୨୫-୪୪
ମୁଁ ପୁନରୁତ୍ଥାନ ଓ ଜୀବନ, ଯେ ମୋ' ଠାରେ ବିଶ୍ଵାସ କରେ, ସେ ଯଦ୍ୟପି ମରେ, ତଥାପି ସେ ବଞ୍ଚିବ । (ଯୋହନ ୧୧:୨୫)
ମୃତ୍ୟୁ ସେହି ଲୋକମାନଙ୍କୁ ଆମଠାରୁ ହରଣ କରିନିଏ, ଯେଉଁମାନଙ୍କୁ ଆମେ ଭଲ ପାଉ, ମାତ୍ର ଖ୍ରୀଷ୍ଟଙ୍କ ଅନୁଗାମୀମାନଙ୍କ ପାଇଁ ଏହି ବିଚ୍ଛେଦ୍ୟ କ୍ଷଣକାଳସ୍ଥାୟୀ ଅଟେ । ଯୀଶୁଙ୍କର ପୁନରୁତ୍ଥାନ ଆମକୁ ଏହି ଭରସା ଦିଏ ଯେ ମୃତ୍ୟୁ ଯେପରି 'ତାଙ୍କୁ' ଧରି ରଖିପାରି ନ ଥିଲା, ସେହିପରି ସମାଧି ଆମ ପୁର୍ବରୁ ମୃତ୍ୟୁବରଣ କରିଥିବା ପିଲାମାନଙ୍କୁ, ପିତାମାତାମାନଙ୍କୁ, ବନ୍ଧୁ ଓ ସାଥୀମାନଙ୍କୁ ଧରି ରଖିପାରିବ ନାହିଁ। ଖ୍ରୀଷ୍ଟଙ୍କର ପୁନରୁତ୍ଥାନ ଆମ ଭରସାର ମୂଳଦୁଆ ଅଟେ ।
ଆମରିକୀୟ ସୁସମାଚାର ପ୍ରଚାରକ ଡି.ଏଲ୍. ମୁଡ୍ଡି ( ୧୮୩୭- ୧୮୯୯) ଇଙ୍କେରମ୍ୟାନ ଯୁଦ୍ଧ (କ୍ରିମିଆ ଯୁଦ୍ଧ - ୧୮୫୪) ର ଜଣେ ସୈନ୍ୟଙ୍କ ବିଷୟରେ କହିଥିଲେ, ଯିଏ ଗୁଳିବିଦ୍ଧ ହେବାପରେ କୌଣସି ପ୍ରକାରେ ନିଜର ତମ୍ବୁକୁ ଗୁରୁଣ୍ଡି ଗୁରୁଣ୍ଡି ଆସିବାକୁ ସମର୍ଥ ହୋଇଥିଲେ । ପରେ ଯେତେବେଳେ ତାକୁ ଆବିଷ୍କାର କରାଗଲା, ସେତେବେଳେ ସେ ମୁଖ ମାଡ଼ି ପଡ଼ିଥିଲେ, ତାଙ୍କ ସମ୍ମୁଖରେ ବାଇବଲ ଉନ୍ମୁକ୍ତ ହୋଇପଡ଼ିଥିଲା, ତାଙ୍କ ହାତ ତାଙ୍କ ରକ୍ତ ଦ୍ଵାରା ଗୋଟିଏ ପୃଷ୍ଠା ଉପରେ ଲାଖି ରହିଥିଲା ଓ ସେହି ପୃଷ୍ଠାଟି ରକ୍ତରଞ୍ଜିତ ହୋଇଯାଇଥିଲା । ତାଙ୍କ ହାତକୁ ଟେକିବା ସମୟରେ, ଛାପାପୃଷ୍ଠାର କିଛି ବାକ୍ୟ ଏଥିରେ ସ୍ପଷ୍ଟ ଭାବରେ ଦୃଶ୍ୟ ହେଉଥିଲା । ପଦଟି ଏହିପରି ଥିଲା, "ମୁଁ ପୁନରୁତ୍ଥାନ ଓ ଜୀବନ । ଯେ ମୋ' ଠାରେ ବିଶ୍ଵାସ କରେ, ସେ ଯଦ୍ୟପି ମରେ, ତଥାପି ବଞ୍ଚିବ" (ଯୋହନ ୧୧:୨୫) । ମୁଡ୍ଡି କହିଥିଲେ, "ମୁଁ ସେହିପରି ଏକ ଧର୍ମ ଚାହେଁ, ଯାହା ମୃତ୍ୟୁରେ ସୁଦ୍ଧା ମୋତେ ସାନ୍ତ୍ଵନା ଦେଇପାରେ ଓ ମୋର ପ୍ରିୟଜନଙ୍କ ସହିତ ମୋତେ ମିଳିତ କରିପାରେ ପୁନରୁତ୍ଥାନ ସମ୍ବନ୍ଧୀୟ ଗୌରବମୟ ମତବାଦ ନ ଥିଲେ ଏହି ଜଗତ ଉପରେ କିପରି ଦୁଃଖ ଓ ଅନ୍ଧକାର ରହିଥାନ୍ତା । "
ଯଦି ଆପଣ ଦୁଃଖ କରୁଛନ୍ତି, ତେବେ ଏଥିରେ ସାନ୍ତ୍ଵନା ପାଆନ୍ତୁ: ଯୀଶୁ ବଞ୍ଚିଥିବାରୁ, ଆମେ ମଧ୍ୟ ବଞ୍ଚିବା ।