ପରମେଶ୍ବର ଯୋଗାନ୍ତି
ଆଜିର ଚିନ୍ତା
୧ ଶାମୁୟେଲ ୯:୧୫-୨୭
ଈଶ୍ୱରଙ୍କ ଇଚ୍ଛା ମୋ ଜୀବନରେ ସଫଳ ହେଉ ବୋଲି ପ୍ରାର୍ଥନା କରେ କି ?
ଯେ କୌଣସି ସମସ୍ୟାରେ ପଡ଼ିଲେ ଆମେ ବ୍ୟତିବସ୍ତ ହୋଇପଡୁ । ତାହାର ସମାଧାନ କିପରି ଅତିଶୀଘ୍ର ହେବ, ଆମେ ଚିନ୍ତା କରିଥାଉ । ଶାସ୍ତ୍ରରେ ଲେଖାଯାଏ, ସବୁ ବିଷୟର କାଳ ଅଛି ଓ ଆକାଶ ତଳେ ସବୁ ମନୋରଥର ସମୟ ଅଛି (ଉପଦେଶକ ୩:୧) ।
ଯୋଗାଇବା ପରମେଶ୍ୱର :
ଇସ୍ରାଏଲର ପ୍ରାଚୀନଗଣ ରାଜା ମାଗିବା ଦ୍ଵାରା ଈଶ୍ୱରଙ୍କୁ ଅଗ୍ରାହ୍ୟ କରି ଦୁଃଖ ଦେଇଥିଲେ ମଧ୍ୟ ସେ ଦୟାଳୁ ପିତା ଭାବେ ଶାଉଲଙ୍କୁ ରାଜା ହେବା ପାଇଁ ମନୋନୀତ କରିଥିଲେ । ଗଧ ହଜିବା ଅନ୍ତରାଳରେ ଶାଉଲଙ୍କ ପାଇଁ ପରମେଶ୍ୱରଙ୍କ ଏକ ମହାନ୍ ଯୋଜନା କାର୍ଯ୍ୟକାରୀ ହୋଇଥିଲା । ଯେଉଁମାନେ ଈଶ୍ୱରଙ୍କୁ ପ୍ରେମ କରନ୍ତି, ଯେଉଁମାନେ ତାହାଙ୍କ ସଂକଳ୍ପ ଅନୁସାରେ ଆହୂତ ହୋଇଅଛନ୍ତି, ଈଶ୍ଵର ଯେ ସମସ୍ତ ବିଷୟରେ ସେମାନଙ୍କର ମଙ୍ଗଳ ସାଧନ କରନ୍ତି, ଏହା ଆମ୍ଭେମାନେ ଜାଣୁ (ରୋମୀୟ ୮:୨୮) । ଇସ୍ରାଏଲର ପ୍ରଥମ ରାଜା ଶାଉଲ ଈଶ୍ୱରଙ୍କ ଦ୍ଵାରା ମନୋନୀତ ହୋଇଥିବାରୁ ଗଧ ଖୋଜୁ ଖୋଜୁ ଶାମୁୟେଲଙ୍କ ନିକଟକୁ ଚାଲି ଯାଇଥିଲେ । ଗଧ ମିଳିଯିବାର ସମ୍ବାଦ ପାଇବା ସଙ୍ଗେ ସଙ୍ଗେ ଶାଉଲ ଇସ୍ରାଏଲର ସମସ୍ତ ବାଞ୍ଚନୀୟ ବିଷୟ ପାଇବା ପାଇଁ ମନୋନୀତ ହୋଇଥିବାର ସୁୁସମ୍ବାଦ ଶାମୁୟେଲଙ୍କଠାରୁ ଅବଗତ ହୋଇଥିଲେ । ଏଭଳି ଆଶ୍ଚର୍ଯ୍ୟଜନକ ବିଷୟ ଶୁଣି ଗର୍ବିତ ନ ହୋଇ ନମ୍ର ଭାବରେ ଶାମୁୟେଲଙ୍କ ପାଖରେ ନିଜର ପରିଚୟ ସେ ରଖିଥିଲେ ।
ଉତ୍ତମ ବସ୍ତୁ ଦେବା ପରମେଶ୍ୱର :
ଈଶ୍ଵର ତାଙ୍କର ଇଚ୍ଛାନୁଯାୟୀ ଯାହାକୁ ଯାହା ଇଚ୍ଛା, ତାହା ଦେବା ପରମେଶ୍ୱର । ଶାଉଲଙ୍କୁ ଭେଟିବା ପରେ ଶାମୁୟେଲ ତାଙ୍କୁ ରାଜାର ସମ୍ମାନରେ ସମ୍ମାନୀତ କରିଥିଲେ । ତାଙ୍କ ପାଇଁ ଉଦ୍ଦିଷ୍ଟ ଖାଦ୍ୟ ପରିବେଷଣ କରାଯାଇଥିଲା । ଶାମୁୟେଲଙ୍କ ସଙ୍ଗେ ରାତ୍ରି କ୍ଷେପଣ କରି ଆଳାପ କରିବା ପାଇଁ ଶାଉଲ ସୁଯୋଗ ପାଇଥିଲେ । ଏକାନ୍ତରେ ଧାର୍ମିକ ଭବିଷ୍ୟତବକ୍ତାଙ୍କ ଠାରୁ ସଦାପ୍ରଭୁଙ୍କ ବାକ୍ୟ ଶ୍ରବଣ କରିବାର ସୌଭାଗ୍ୟ ସେ ଲାଭ କରିଥିଲେ ।
ଆମ ପ୍ରତ୍ୟେକଙ୍କ ଜୀବନ ପାଇଁ ସଦାପ୍ରଭୁଙ୍କ ଏକ ନିର୍ଦ୍ଦିଷ୍ଟ ଯୋଜନା ରହିଛି । ସେ ତାହା କାର୍ଯ୍ୟକାରୀ କରିବାକୁ ଚାହାଁନ୍ତି । ତାଙ୍କ ରାଜ୍ୟ ଓ ଧାର୍ମିକତା ପ୍ରଥମେ ଅନ୍ଵେଷଣ କରି ତାଙ୍କ ନିକଟରେ ନିଜକୁ ସମର୍ପଣ କଲେ, ସେ ତାଙ୍କ ଇଚ୍ଛାକୁ ଆମ ଜୀବନରେ ସଫଳ କରିବାରେ ସାହାଯ୍ୟ କରିବେ ।