ଉଚିତ୍ ବିଷୟ ମାଗିବା

 ଉଚିତ୍ ବିଷୟ ମାଗିବା

ଆଜିର ଚିନ୍ତା 

୧ ଶାମୁୟେଲ ୮:୧-୨୨

ମୁଁ ଈଶ୍ୱରଙ୍କ ଇଚ୍ଛାକୁ ଅଗ୍ରାଧିକାର ଦିଏ କି ? 

ଶାମୁୟେଲଙ୍କ ପୁତ୍ରମାନେ ଲାଞ୍ଚ ନେଇ ବିଚାର ବିପରୀତ କରିବାରୁ ଇସ୍ରାଏଲର ପ୍ରାଚୀନବର୍ଗ ଶାମୁୟେଲଙ୍କୁ ଏକ ରାଜା ଦେବା ନିମନ୍ତେ କହିଥିଲେ । ମାଗିବା ବିଷୟରେ ଶାସ୍ତ୍ରରେ ଲେଖାଯାଏ, ତୁମ୍ଭେ ଆପଣା ମୁଖରେ ଅବିବେକୀ ହୁଅ ନାହି ଓ ପରମେଶ୍ୱରଙ୍କ ସାକ୍ଷାତରେ କୌଣସି କଥା କହିବା ପାଇଁ ତୁମ୍ଭର ଚିତ୍ତ ଚଞ୍ଚଳ ନ ହେଉ (ଉପଦେଶକ ୫:୧(କ)) ।

ସ୍ବେଚ୍ଛାଚାରୀ ଇସ୍ରାଏଲ :

ଇସ୍ରାଏଲ ମଧ୍ୟରେ ବିଚାର କାର୍ଯ୍ୟ କିପରି ନ୍ୟାୟ ଭାବରେ ହେବ ଏ ବିଷୟରେ ପ୍ରାଚୀନବର୍ଗ ଶାମୁୟେଲଙ୍କ ଦ୍ଵାରା ଈଶ୍ୱରଙ୍କୁ ପଚାରି ନ ଥିଲେ । ବରଂ ଜୀବିତ ଈଶ୍ୱରଙ୍କୁ ଜାଣି ନ ଥିବା ଅନ୍ୟ ଦେଶୀୟ ରାଜାମାନଙ୍କୁ ଅନୁସରଣ କରି ଏକ ରାଜା ମାଗିଥିଲେ । ଶାମୁୟେଲ ଏ ବିଷୟରେ ଈଶ୍ୱରଙ୍କ ନିକଟରେ ପ୍ରାର୍ଥନା କରିଥିଲେ । ଈଶ୍ଵର ହିଁ ସେମାନଙ୍କର ଏକ ମାତ୍ର ରାଜା ଥିଲେ । ମାତ୍ର ସେମାନେ ତାଙ୍କୁ ଅଗ୍ରାହ୍ୟ କରି ନିଜ ସୁବିବେଚନାରେ ଆଉଜି ପଡ଼ିଥିଲେ । ସେମାନଙ୍କର ରାଜା ମାଗିବା ବିଷୟ ଈଶ୍ୱରଙ୍କୁ ବହୁତ ଦୁଃଖ ଦେଇଥିଲା । ସଦାପ୍ରଭୁଙ୍କ ଭୟକାରୀମାନଙ୍କ ପାଇଁ ଲେଖାଯାଏ, ପରିଣାମଦର୍ଶିତା ତୁମ୍ଭ ଉପରେ ପ୍ରହରୀ ହେବ, ବୁଦ୍ଧି ତୁମକୁ ରକ୍ଷା କରିବ (ହିତ ୨:୧୧) । ସ୍ବେଚ୍ଛାଚାରୀ ଇସ୍ରାଏଲ ଅପରିଣାମଦର୍ଶୀ ଥିଲେ । ରାଜା ମାଗି ଦୁଃଖ କୁ ଡାକି ଆଣିଥିଲେ । 

ଦୟାବାନ୍ ଈଶ୍ଵର :

ଆଗାମୀ ବିପଦ ଓ ଦୁଃଖରୁ ଇସ୍ରାଏଲ ସନ୍ତାନମାନଙ୍କୁ  ରକ୍ଷା କରିବା ଲାଗି ଈଶ୍ଵର ଶାମୁୟେଲଙ୍କ ଦ୍ଵାରା ରାଜାର ବିଧି ସବୁ ଜଣାଇଲେ । ଯିଏ ରାଜା ହେବ, ସେ ସେମାନଙ୍କର ପୁତ୍ରକନ୍ୟା, ଦାସଦାସୀ, ଶସ୍ୟକ୍ଷେତ୍ର, ପଶୁସମ୍ପଦ ଓ ସର୍ବୋତ୍ତମ ଯୁବାପୁରୁଷ ମାନଙ୍କୁ ନେଇ ଆପଣା କାର୍ଯ୍ୟରେ ଲଗାଇବ । ଦୟାବାନ୍ ଈଶ୍ଵର ଇସ୍ରାଏଲୀୟମାନଙ୍କୁ ରାଜା ଦ୍ଵାରା ଶାସିତ ହେବାର କୁପରିଣାମ ବିଷୟ ଜଣାଇଲେ ମଧ୍ୟ ସେମାନେ ନିଜ ଜିଦ୍ ରେ ଅଟଳ ରହିଲେ । ସେମାନେ ଭୁଲ ବିଷୟ ମାଗିଥିବାରୁ ପରବର୍ତ୍ତୀ ସମୟରେ ବହୁତ ଦୁଃଖ ପାଇଥିଲେ । ଅନେକ ସମୟରେ ଆମେ ମଧ୍ୟ ଆମର ଇଚ୍ଛା ପୂରଣ ପାଇଁ ଈଶ୍ୱରଙ୍କ ଇଚ୍ଛା ବିରୁଦ୍ଧ ବିଷୟ ମଗିଥାଉ । ଆମ ଜୀବନକୁ ବିନାଶର ପଥରୁ ରକ୍ଷା କରିବା ପାଇଁ ଈଶ୍ୱର ପିତାମାତା ତଥା ତାଙ୍କ ବାକ୍ୟ ଦ୍ଵାରା ଆମକୁ ଚେତନା ଦେଇଥାନ୍ତି । ଆସନ୍ତୁ, ଅନୁଯୋଗ ଗ୍ରହଣ କରି ପାପ ପଥରୁ ଫେରୁ ଓ ପରିଣାମଦର୍ଶୀ ହେଉ । ଈଶ୍ୱରଙ୍କ ବାକ୍ୟ ପଢ଼ିବା ଓ ଶୁଣିବା ସେହି ବାକ୍ୟ ଆମକୁ ପାପ ପଥରୁ ରକ୍ଷା କରିବାରେ ସହାୟକ ହେବ ।