ସୁସମାଚାରର ହୃଦୟ ଓ ପ୍ରାଣ

 ସୁସମାଚାରର ହୃଦୟ ଓ ପ୍ରାଣ 

ଆଜିର ଚିନ୍ତା

ରୋମୀୟ ୧:୧-୧୭

କୌଣସି ଅପରିଚିତ ବ୍ୟକ୍ତିମାନଙ୍କ ପାଇ ମୁଁ ବୋଝଗ୍ରସ୍ତ କି ? 

ପ୍ରେରିତ ପାଉଲଙ୍କ ତେରଗୋଟି ପତ୍ର ମଧ୍ୟରୁ ରୋମୀୟ ମଣ୍ଡଳୀ ନିକଟକୁ ପତ୍ର ପ୍ରଥମ ଲେଖା ନ ହେଲେ ସୁଦ୍ଧା ବାଇବଲରେ ସୁସମାଚାର ଓ ପ୍ରେରିତ ପୁସ୍ତକ ପରେ ସ୍ଥାନ ପାଇଛି । ଏହା ଧର୍ମତତ୍ତ୍ଵ ଦୃଷ୍ଟିକୋଣରୁ ମହତ୍ତ୍ୱପୂର୍ଣ୍ଣ ଅଟେ । ସୁସମାଚାର ପୁସ୍ତକଗୁଡ଼ିକ ଯୀଶୁଙ୍କ ଜୀବନ ଶିକ୍ଷା ଓ କାର୍ଯ୍ୟ ବିଷୟରେ ବର୍ଣ୍ଣନା କଲାବେଳେ ରୋମୀୟ ପୁସ୍ତକ ତାଙ୍କ ତ୍ୟାଗ ପୂର୍ଣ୍ଣ ମୃତ୍ୟୁର ମହତ୍ତ୍ଵ ଓ ତାତ୍ପର୍ଯ୍ୟ ବର୍ଣ୍ଣନା କରେ ।

ସୁସମାଚାର ପାଇଁ ଆହୂତ, ପ୍ରେରିତ ଓ ପୃଥକୀକୃତ (୧-୭) :

ପାଉଲ ଯଦିବା ରୋମ୍ ମଣ୍ଡଳୀର ଲୋକମାନଙ୍କ ନିମନ୍ତେ ଅଜଣା ଥିଲେ, ତଥାପି ସେ ଆପଣାର ଅଭିବାଦନ ଜଣାଇ ପରିଚୟ ଦେବାବେଳେ ସେବାକାର୍ଯ୍ୟ ଉପରେ ଅଧିକ ମହତ୍ତ୍ୱ ପ୍ରଦାନ କରନ୍ତି । ହୁଏତ ରୋମ୍ ମଣ୍ଡଳୀରେ ଅନେକ ସଭ୍ୟସଭ୍ୟା କ୍ରୀତଦାସ ଥିଲେ, ମାତ୍ର ପାଉଲ ଖ୍ରୀଷ୍ଟ ଯୀଶୁଙ୍କର ଜଣେ ବନ୍ଧା ଦାସ ବା କ୍ରୀତଦାସ ବୋଲି ନିଜର ପରିଚୟ ଦିଅନ୍ତି । ସେ ମଧ୍ୟ ନିଜକୁ ଯୀଶୁଙ୍କ ଆହୂତ, ପ୍ରେରିତ  ସୁସମାଚାର ନିମନ୍ତେ ପୃଥକୀକୃତ ଦାସ ଭାବରେ ପ୍ରକାଶ କରନ୍ତି ।

ସମସ୍ତଙ୍କ ନିକଟରେ ସୁସମାଚାର ହେତୁ ଋଣୀ (୮-୧୫) :

ପାଉଲ ଏହି ଅଂଶରେ ଆପଣାର ଚିନ୍ତା ବା ବୋଝ ପ୍ରକାଶ କରନ୍ତି । ଏହି ସ୍ଥାନରେ ମଣ୍ଡଳୀ ପ୍ରତି ପାଉଲଙ୍କର ମହାନ୍ ପ୍ରେମର ବର୍ଣ୍ଣନା ହୋଇଛି । ସେ ରୋମ୍ କୁ ଯିବା ପାଇଁ ଆପଣା ଇଚ୍ଛା ପ୍ରକାଶ କରିବା ସହିତ ସେମାନଙ୍କର ବିଶ୍ବାସର ସୁସମ୍ବାଦ ବିଷୟରେ ପ୍ରଭୁଙ୍କୁ ଧନ୍ୟବାଦ ଦିଅନ୍ତି । ସେମାନଙ୍କ ଆତ୍ମିକ ସ୍ଥିରତା ନିମନ୍ତେ ସେ ସେମାନଙ୍କ ସହିତ ସାକ୍ଷାତ କରି କିଛି ଆତ୍ମିକ ଦନର ଅଂଶୀ  କରିବାକୁ ଇଚ୍ଛୁକ ବୋଲି ଜଣାନ୍ତି । ଏକ ବିଶେଷ କଥା ସେ ପ୍ରକାଶ କରନ୍ତି ଯେ ସେ ଗ୍ରୀକ କି ବର୍ବର ଶିକ୍ଷିତ କି ଅଶିକ୍ଷିତ ସମସ୍ତଙ୍କ ନିକଟରେ ଋଣୀ ।

ସୁସମାଚାରର ହୃଦୟ ଓ ପ୍ରାଣ (୧:୧୬-୧୭) :

ଧାର୍ମିକ ବିଶ୍ୱାସ ଦ୍ଵାରା ବଞ୍ଚିବ ରୋମୀୟ ପୁସ୍ତକର ଏହି ମହାନ୍ ବାକ୍ୟ ମାର୍ଟିନ୍ ଲୁଥରଙ୍କ ଠାରୁ ଆରମ୍ଭ କରି ଜନ୍ ୱେସ୍ଲି, ଅଗଷ୍ଟିନ, ୱେଲିୟମ୍ ଟିଣ୍ଡେଲ ଇତ୍ୟାଦି ବହୁ ବିଶିଷ୍ଟ ଲୋକମାନଙ୍କ ଜୀବନକୁ ପରିବର୍ତ୍ତିତ ଓ ପ୍ରଭାଭିତ କରିଛି । ଧାର୍ମିକ ବିଶ୍ୱାସ ଦ୍ଵାରା ବଞ୍ଚିବ ପଦଟି ବାଇବଲରେ ଚାରିଥର ... ହବକୂକ୍ ୨:୪,..ରୋମୀୟ ୧:୧୭,.... ଗଲାତୀୟ ୩:୧୧ ଓ ଏବ୍ରୀ ୧୦:୩୮...ଅବିକଳ ଭାବରେ ଲେଖାଯାଇଛି । ପାଉଲ କହନ୍ତି ଯେ ସେ ଏହି ସୁସମାଚାର ସମ୍ବନ୍ଧରେ ଲଜ୍ଜାବୋଧ କରନ୍ତି ନାହିଁ, ବରଂ ଦର୍ପ କରନ୍ତି, ଯେଣୁ ତାହା ପ୍ରତ୍ୟେକ ବିଶ୍ବାସୀ ପକ୍ଷରେ ପରିତ୍ରାଣ ନିମନ୍ତେ ଈଶ୍ୱରଙ୍କର ଶକ୍ତି ଅଟେ ।