ଧାର୍ମିକତା ବିରୁଦ୍ଧରେ ଈଶ୍ୱରଙ୍କ କ୍ରୋଧ

 ଧାର୍ମିକତା ବିରୁଦ୍ଧରେ ଈଶ୍ୱରଙ୍କ କ୍ରୋଧ

ଆଜିର ଚିନ୍ତା

ରୋମୀୟ ୧:୧୮-୩୨

ଭାବନା, କଥା ଓ କାର୍ଯ୍ୟରେ ମୁଁ ଈଶ୍ୱରଙ୍କୁ ଅସନ୍ତୁଷ୍ଟ କରିଥାଏ କି ?

ଆମ୍ଭମାନଙ୍କର ବୁଝିବା ଆବଶ୍ୟକ ଯେ ଈଶ୍ୱରଙ୍କ କ୍ରୋଧ ଓ ବିଚାର ଆମ ନିଜ କୃତ କାର୍ଯ୍ୟର ପରିଣତି ଅଟେ । ପାପ ବିରୁଦ୍ଧରେ ତାଙ୍କର ଧାର୍ମିକତା ପୂର୍ଣ୍ଣ କ୍ରୋଧ ପ୍ରକାଶିତ ହୁଏ, କାରଣ ସେସବୁ ତାଙ୍କର ଗୌରବ ଆଣିବା ପରିବର୍ତ୍ତେ ତାଙ୍କ ପ୍ରତି ଅସମ୍ମାନ ଆଣେ ଓ ତାଙ୍କର ସତ୍ୟତା, ପବିତ୍ରତା ଓ ନୈତିକ ଚରିତ୍ରର ବିରୋଧାଭାସ ପ୍ରକାଶ କରେ ।

ଦୋଷାବହ ପାପ (୧୮-୨୩) :

ଯେଉଁ ଲୋକମାନେ ଅଧର୍ମରେ ସତ୍ୟକୁ ପ୍ରତିରୋଧ କରନ୍ତି, ସେମାନଙ୍କର ସମସ୍ତ ଅପବିତ୍ରା ଓ ଅଧର୍ମ ବିରୁଦ୍ଧରେ ସ୍ଵର୍ଗରୁ ଈଶ୍ୱରଙ୍କ କ୍ରୋଧ ପ୍ରକାଶିତ ହୋଇଅଛି । ରୋମୀୟ ପତ୍ର ପରି ଏଫିସୀୟ ୫:୬ ଓ କଲସୀୟ ୩:୬ରେ ମଧ୍ୟ ଈଶ୍ୱରଙ୍କ କ୍ରୋଧ ବିଷୟରେ ପାଉଲ ଲେଖନ୍ତି । ଏହା ଅବଧ୍ୟତାର ସନ୍ତାନମାନଙ୍କ ପ୍ରତି ବର୍ତ୍ତେ । କାରଣ ସେମାନେ ନିଜକୁ ଅଜ୍ଞ ବୋଲି କହିପାରିବେ ନାହିଁ । ସେମାନଙ୍କ ଅନ୍ତର ମଧ୍ୟରେ ଓ ସୃଷ୍ଟିର ବିବିଧ ବୈଚିତ୍ରତା ମଧ୍ୟରେ ଈଶ୍ୱରଙ୍କ ସ୍ଥିତି ପ୍ରକାଶିତ ହୋଇଛି । କିନ୍ତୁ ସେମାନେ ସତ୍ୟର ପ୍ରତିରୋଧ କରିବା ସଙ୍ଗେ ସଙ୍ଗେ ସତ୍ୟକୁ ଚାପି ଦେବାକୁ ଚେଷ୍ଟା କରନ୍ତି ।

ଜଘନ୍ୟ ପାପ ପ୍ରବୃତ୍ତି (୨୨-୨୭) :

୨୨ପଦରେ ଲେଖାଯାଏ ଯେ, ନିଜ ନିଜକୁ ଜ୍ଞାନୀ ମନେ କରି ସେମାନେ ମୂର୍ଖ ହେଲେ । ଈଶ୍ୱରଙ୍କ ପ୍ରତି ଅନାଇବା ପରିବର୍ତ୍ତେ ସେମାନେ ନିଜ ଚିନ୍ତାଧାରା, ନିଜ ଜ୍ଞାନ ଓ ନିଜର ଅନୁମାନ ଅନୁସାରେ ନିଜ ଅନ୍ତରର ଶୂନ୍ୟତା ଓ ଅନ୍ଧକାରକୁ ଦୂର କରିବା ପାଇଁ ସୃଷ୍ଟ ବସ୍ତୁକୁ ପୂଜା କଲେ । ଅକ୍ଷୟ ଈଶ୍ୱରଙ୍କ ଗୌରବକୁ କ୍ଷୟଣୀୟ ମନୁଷ୍ୟ, ପକ୍ଷୀ, ଚତୁଷ୍ପଦ ପ୍ରାଣୀ, ସରୀସୃପାଦିଙ୍କ ଆକୃତିଯୁକ୍ତ ପ୍ରତିମାରେ ପରିଣତ କଲେ । ପୁରୁଷ ଓ ସ୍ତ୍ରୀମାନେ ସମଲିଙ୍ଗୀ ଯୌନ ଆଚରଣ କଲେ । ଆଜି  ଆମର ନୈତିକ ଅବସ୍ଥା କିପରି ?

ଈଶ୍ୱରଙ୍କ ବିରୋଧ (୨୮-୩୨) :

ଈଶ୍ଵର ମନୁଷ୍ୟକୁ ସ୍ଵାଧୀନ ଇଚ୍ଛା ଦେଇଛନ୍ତି । ସେମାନେ ଯେପରି ଈଶ୍ଵର ବିଷୟକ ଜ୍ଞାନ ଗ୍ରହଣ କରିବାକୁ ଅନିଚ୍ଛୁକ ହେଲେ, ସେହିପରି ଈଶ୍ଵର ଅନୁଚିତ କର୍ମ କରିବା ନିମନ୍ତେ ସେମାନଙ୍କୁ ଭ୍ରଷ୍ଟ ମତିରେ ସମର୍ପଣ କଲେ (୨୮ପଦ) । ୨୪ଟି ନିର୍ଦ୍ଦିଷ୍ଟ ପାପର ତାଲିକା ଏହି ସ୍ଥାନରେ ପ୍ରଦତ୍ତ ହୋଇଛି । ଯେଉଁମାନେ ଏହିପରି ଆଚରଣ କରନ୍ତି, ସେମାନେ ମୃତ୍ୟୁର ଯୋଗ୍ୟ, ଈଶ୍ୱରଙ୍କ ଏହି ବିଧାନ ସେମାନେ ଜାଣିଲେ ହେଁ ଏହିପରି ଆଚରଣ କରୁଥିବା ଲୋକମାନଙ୍କ ପକ୍ଷ ଆନନ୍ଦରେ ସମର୍ଥନ କରନ୍ତି । କେବଳ ଯୀଶୁଙ୍କ ସୁସମାଚାର ହିଁ ସେମାନଙ୍କୁ ଉଦ୍ଧାର କରିପାରିବ ।