ସାର୍ବଭୌମ ସୁସନ୍ଦେଶ

 ସାର୍ବଭୌମ ସୁସନ୍ଦେଶ 

ଆଜିର ଚିନ୍ତା

ପ୍ରେରିତ ୧୧:୧୮

ଈଶ୍ଵର ଯେ ସମସ୍ତ ମାନବ ଜାତିଙ୍କ ପରିତ୍ରାଣକର୍ତ୍ତା ଏହା ମୁଁ ବିଶ୍ଵାସ କରୁଛି କି ? 

ବର୍ତ୍ତମାନ ପୃଥିବୀରେ ଅନେକ ଧର୍ମ ରହିଅଛି । ମାତ୍ର ଖ୍ରୀଷ୍ଟ ଧର୍ମ ଏକ ଏପରି ଧର୍ମ ଯାହା ଗୋଟିଏ ସଂପ୍ରଦାୟ ବା ଗୋଷ୍ଠୀ ମଧ୍ୟରେ ସୀମିତ ନ ରହି, ସାରା ବିଶ୍ଵର ସମସ୍ତ ମାନବ ଜାତିର ପରିତ୍ରାଣ ନିମନ୍ତେ ଉଦ୍ଦିଷ୍ଟ ।  କାରଣ ଯୀଶୁ ସମଗ୍ର ମାନବ ଜାତି, ଗୋଷ୍ଠୀ, ବର୍ଣ୍ଣ ଓ ଭାଷାବାଦୀଙ୍କ ନିମନ୍ତେ ପ୍ରାଣ ଦେଲେ ଏବଂ ପ୍ରତ୍ୟେକ ସୁସମାଚାରକୁ ଶ୍ରବଣ କରିବାକୁ ଯୋଗ୍ୟ ଅଟନ୍ତି । ଏହାକୁ ବୁଝିବାକୁ ଅନେକେ ଅସମର୍ଥ । 

ବିରୋଧର ସମ୍ମୁଖୀନ:

ସୁସମାଚାର ପ୍ରଚାର କାର୍ଯ୍ୟରେ ନିଜର ପ୍ରିୟଜନଙ୍କଠାରୁ ବିରୋଧର ସମ୍ମୁଖୀନ ହେବା ନିଶ୍ଚିତ ଏକ ଅଦ୍ଭୁତ ଘଟଣା। କିନ୍ତୁ ଏହା ପଛରେ ବର୍ଣ୍ଣ ଵୈଷମ୍ୟର ଏକ କ୍ରୂର କାରଣ ଅତ୍ୟନ୍ତ ନିନ୍ଦନୀୟ (୨,୩ପଦ) । ଈଶ୍ଵର ଏହି ସନ୍ଦେହକୁ ଦୂର କରିବା ନିମନ୍ତେ ସ୍ପଷ୍ଟ ଦର୍ଶନ ଦେଖାଇଲେ । ଏହି ଦର୍ଶନର ବର୍ଣ୍ଣନା ୧୦,୧୧ ପର୍ବ ରେ ୩ ଥର ଦେଖିବାକୁ ପାଉ । ଏହା ବର୍ତ୍ତମାନ ମଧ୍ୟ ପ୍ରଯୁଜ୍ୟ ଯେ, ଯଦି କେହି ମଣ୍ଡଳୀରେ ନିଜକୁ ଶ୍ରେଷ୍ଠ ମନେ କରେ, ତେବେ ତାହା ଈଶ୍ୱରଙ୍କ ଦୃଷ୍ଟିରେ ଘୃଣ୍ୟ, କାରଣ କ୍ରୁଶ ତଳେ ସମସ୍ତେ ଏକ । ସେ କାହାର ମୁଖାପେକ୍ଷା କରନ୍ତି ନାହିଁ (ଏଫି ୬:୯) । 

ଈଶ୍ୱରଙ୍କ ବଦାନ୍ୟତା : 

ଈଶ୍ଵର ଆପଣା ପ୍ରିୟଜନଙ୍କୁ ଆପଣା ଆତ୍ମାଙ୍କ ଦାନ ଦେବାରେ କୁଣ୍ଠିତ ହୁଅନ୍ତି ନାହିଁ । କେତେଜଣ ତାହାଙ୍କ ପୁତ୍ରଙ୍କ ଠାରେ ବିଶ୍ଵାସ କରନ୍ତି, ସେ ସମସ୍ତଙ୍କୁ ପରିତ୍ରାଣ ଦାନ କରନ୍ତି । କେହି ମଧ୍ୟ ଈଶ୍ୱରଙ୍କ ଦ୍ଵାରା ଅବହେଳିତ ହେବେ ନାହିଁ । ସେ ସମସ୍ତଙ୍କୁ ସ୍ୱର୍ଗୀୟ ଭଣ୍ଡାର ଖୋଲି ଦେଇଥାନ୍ତି (୧୫,୧୬ପଦ) । ଏହି ବିଷୟକୁ ଠିକ୍ ରୂପେ ବୁଝିଥିବା ବିଶ୍ଵାସୀମାନେ ଅନେକ ଅନୂନ୍ନତ ଗୋଷ୍ଠୀ, ଅପହଞ୍ଚ ଇଲାକାରେ ମଧ୍ୟ ଖ୍ରୀଷ୍ଟଙ୍କ ସୁସମାଚାରକୁ ପହଞ୍ଚାଇ ଅଛନ୍ତି । ତେଣୁ ଖ୍ରୀଷ୍ଟ ସମସ୍ତଙ୍କର ଓ ପରିତ୍ରାଣ ପାଇବାର ଅଧିକାର, ସମସ୍ତଙ୍କ ନିମନ୍ତେ ଉଦ୍ଦିଷ୍ଟ ।