ଫଳପ୍ରଦ ସେବାକାର୍ଯ୍ୟ
ଆଜିର ଚିନ୍ତା
ପ୍ରେରିତ ୧୦:୨୪-୪୮
ମୁଁ ଈଶ୍ୱରଙ୍କ ଇଚ୍ଛାକୁ ବୁଝି ତାଙ୍କର ସେବାକାର୍ଯ୍ୟ କରିଥାଏ କି ?
ଦର୍ଶନ ମାଧ୍ୟମରେ ପ୍ରାପ୍ତ ଓ କାର୍ଯ୍ୟଭାରକୁ ମାନ୍ୟ କରିବା ଦ୍ୱାରା କିପରି ମହାନ୍ ସେବାକାର୍ଯ୍ୟର ଫଳପ୍ରାପ୍ତ ହୋଇଥାଏ, ତାହା ଆଜିର ବାକ୍ୟାଂଶରେ ଦେଖିପାରୁ ।
ସେବାକାର୍ଯ୍ୟରେ ଈଶ୍ୱରଙ୍କ ଗୌରବ:
ଈଶ୍ୱରଙ୍କ ଦର୍ଶନ ମାଧ୍ୟମରେ ଅନ୍ୟ ଜାତିର ଲୋକଙ୍କୁ ସୁସମାଚାର ପ୍ରଚାର କରିବାକୁ ସ୍ପଷ୍ଟ ନିର୍ଦ୍ଦେଶ ପ୍ରାପ୍ତ ହୋଇ ଶିମୋନ ପିତର କର୍ଣ୍ଣଲୀୟଙ୍କୁ ଭେଟିବାକୁ ଗଲେ । ସେଠାରେ ତାହାଙ୍କୁ ଦେଖି କର୍ଣ୍ଣଲୀୟ ଭୁମିଷ୍ଠ ପ୍ରଣାମ କଲେ । ଏଥିରେ ପିତର ତତକ୍ଷଣାତ୍ ତାଙ୍କୁ ବାଧା ଦେଲେ, କାରଣ
ସମସ୍ତ ଗୌରବ, ମହିମା, ସମ୍ଭ୍ରମ ପାଇବାର ଯୋଗ୍ୟ କେବଳ ଈଶ୍ୱର ଅଟନ୍ତି । ଏହା ସେ ଜଣାଇବାକୁ ଚାହୁଥିଲେ (ମାଥିଉ ୪:୧୦) ।
ଅନେକ ସନ୍ତ ବା ଧର୍ମଗୁରୁଙ୍କ ଭଳି ମନୁଷ୍ୟଠାରୁ ବନ୍ଦନା ପାଇ ଲକ୍ଷ୍ୟ ଭ୍ରଷ୍ଟ ହେବାକୁ ସେ ଚାହୁ ନ ଥିଲେ (ଯୋହନ ୫:୪୩) ।
ସେବାକାର୍ଯ୍ୟରେ ପବିତ୍ର ଆତ୍ମାଙ୍କ ସହାୟ :
ପିତରଙ୍କୁ ସ୍ଵାଗତ କଲାପରେ, ସେ ପିତରଙ୍କଠାରୁ ସୁସମାଚାର ଶୁଣିବାକୁ ଆଗ୍ରହର ସହ ବସିଲେ । କେବଳ ସେ ନୁହନ୍ତି, ତାଙ୍କ ପରିବାର ଓ ଅନେକ ଲୋକଙ୍କୁ ସେ ଆମନ୍ତ୍ରଣ କରିଥିଲେ । ଆମେ ଦେଖୁ ଯେ, ବାକ୍ୟ ଶୁଣିବା ସମୟରେ ସମସ୍ତେ ପବିତ୍ର ଆତ୍ମାରେ ପୂର୍ଣ୍ଣ ହେଲେ ।
ଏହି ଘଟଣା ଖ୍ରୀଷ୍ଟୀୟ ସୁସମାଚାର ପ୍ରଚାର କାର୍ଯ୍ୟର ଏକ ଆଦର୍ଶ ଅଥବା ଅନୁକରଣୀୟ ଘଟଣା କହିଲେ ଭୁଲ ହେବ ନାହିଁ, କାରଣ ସୁସମାଚାର ପ୍ରଚାର କାର୍ଯ୍ୟରେ ନିମ୍ନୋକ୍ତ ସମ୍ବାଦ ସବୁ ରହିବ ନିତ୍ୟାନ୍ତ ଆବଶ୍ୟକ । ଯଥା:
ଯୀଶୁଙ୍କ ଜୀବନୀ, ମୃତ୍ୟୁ, ପୁନରୁତ୍ଥାନ ଓ ସ୍ଵର୍ଗାରୋହଣ ।
ଯୀଶୁଙ୍କୁ ଜାଣି ନ ଥିବା ଲୋକଙ୍କ ମଧ୍ୟରେ ସାକ୍ଷ୍ୟ ପ୍ରଦାନ ।
ସେମାନଙ୍କୁ ପାପକ୍ଷମା ଓ ପରିତ୍ରାଣ ସମ୍ପର୍କିତ ଶିକ୍ଷା ଦେବା ।
ଶେଷରେ ପ୍ରତ୍ୟେକ ପବିତ୍ର ଆତ୍ମାରେ ପରିପୂର୍ଣ୍ଣ ହେବା ।
ଏହି ଘଟଣାର ଆରମ୍ଭରୁ ଶେଷ, ଏହା ପ୍ରକାଶ କରେ ଯେ, ପବିତ୍ର ଆତ୍ମାଙ୍କ ନିର୍ଦ୍ଦେଶ ପାଳନ କଲେ, ମହାନ୍ ସେବାକାର୍ଯ୍ୟରେ ପ୍ରଚୁର ଫଳ ଦେଖିପାରିବ ।
No comments:
Post a Comment
Kindly give your suggestions or appreciation!!!