ନିଃସ୍ୱାର୍ଥପର

 ନିଃସ୍ୱାର୍ଥପର  

ଆଜିର ଚିନ୍ତା

ଋତ ୧:୧-୨୨

ସ୍ୱାର୍ଥ କ'ଣ ସମ୍ପର୍କଠାରୁ ବଡ଼ ? 

ନୟମୀ ତାଙ୍କ ସ୍ଵାମୀ ଏବଂ ଦୁଇ ପୁଅ ଦୁର୍ଭିକ୍ଷ ହେତୁ ନିଜ ଦେଶ ଛାଡ଼ି ମୋୟବ ଦେଶକୁ ସ୍ଥାନାନ୍ତରିତ ହୋଇଥିଲେ । ତାଙ୍କ ସ୍ଵାମୀଙ୍କର ମୃତ୍ୟୁପରେ ତାଙ୍କ ପୁଅମାନେ ମୋୟାବୀୟ ମହିଳାମାନଙ୍କୁ ବିବାହ କଲେ ଏବଂ କାଳକ୍ରମେ ସେମାନଙ୍କର ମଧ୍ୟ ମୁତ୍ୟୁ ହୁଏ, ଆଉ ରହିଯାନ୍ତି କେବଳ ତିନି ଜଣ ମହିଳା । କିନ୍ତୁ ଏଠାରେ ଶାଶୁ ଓ ବୋହୂ ମଧ୍ୟରେ ଥିବା ମଧୁର ସମ୍ପର୍କ ଉଲ୍ଲେଖନୀୟ ।

ପ୍ରେମର ସମ୍ପର୍କ: 

ଶାଶୁ ନୟମୀ ଯିହୁଦାକୁ ଫେରିଯିବା ବାଟରେ ପୁତ୍ରବଧୂମାନଙ୍କୁ ନିଜ ଦେଶକୁ ଫେରିଯିବା ପାଇଁ ଅନୁରୋଧ କରିଲେ, କାରଣ ସେମାନଙ୍କର ବୟସ ଖୁବ୍ କମ୍ ଏବଂ ସେମାନେ ନିଜ ଦେଶରେ  ପୁନର୍ବାର ବିବାହ କରି ନିଜର ନୂତନ ପରିବାର ଆରମ୍ଭ କରିପାରିବେ । ନୟମୀ  ଚାହିଁଥିଲେ ନିଜର ବୃଦ୍ଧାବସ୍ଥାରେ ସେବା ଆଉ ଯତ୍ନ ପାଇବା ପାଇଁ ସେମାନଙ୍କୁ ନିଜ ପାଖରେ ରହିବା ପାଇଁ ଅନୁରୋଧ କରିପାରିଥାନ୍ତେ, କିନ୍ତୁ ନିଜର ସୁଖ ଆଉ ସ୍ୱାର୍ଥଠୁ ଅଧିକ ସେ ସେମାନଙ୍କ ଭବିଷ୍ୟତ ବିଷୟରେ ଚିନ୍ତା କରିଲେ । ଏହା ନୟମୀଙ୍କର ନିଜର ପୁତ୍ରବଧୂମାନଙ୍କ ପ୍ରତି ଗଭୀର ପ୍ରେମକୁ ଦର୍ଶାଏ । ନୟମୀ ଶବ୍ଦର ଅର୍ଥ 'ମଧୁର' । ସେ ନିଜ ପୁତ୍ରବଧୂମାନଙ୍କ ସହିତ ପ୍ରେମର ମଧୁର ସମ୍ପର୍କ ସ୍ଥାପନ କରିପାରିଥିଲେ । ତାହା ଆଜି ଆମ ପରିବାର ନିମନ୍ତେ ଆଦର୍ଶ ଅଟେ ।

କର୍ତ୍ତବ୍ୟର ସମ୍ପର୍କ:

 ଶାଶୁଙ୍କର କଥାକୁ ଗ୍ରହଣ କରି ଅର୍ପା ଶାଶୁଙ୍କୁ ଶେଷଥର ପାଇଁ ଚୁମ୍ବନ ଦେଇ ବିଦାୟ ନେଲେ କିନ୍ତୁ ଲେଖାଯାଏ ଯେ "ଋତ ନୟମୀଙ୍କୁ ଧରି ରହିଲେ" (୧୪ ପଦ) । ଋତ ନିଜ ଶାଶୁଙ୍କ ସହିତ ମୃତ୍ୟୁ ପର୍ଯ୍ୟନ୍ତ ରହିବେ ଆଉ ତାଙ୍କୁ କେବେ ତ୍ୟାଗ କରିବେ ନାହିଁ, ତାହା ପ୍ରତିଜ୍ଞା କରିଥିଲେ । ଏହାଦ୍ଵାରା ଋତ ନିଜ ପରିବାର, ନିଜ ଦେଶ, ନିଜ ଜାତି ତଥା ଧର୍ମ (ଦେବତା ୧୫ ପଦ)କୁ ପରିତ୍ୟାଗ କରିଥିଲେ, ପୁଣି ନିଜ ଶାଶୁଙ୍କ ଲୋକମାନଙ୍କୁ ଓ ପରମେଶ୍ୱରଙ୍କୁ ନିଜର କରିପାରିଥିଲେ । ନୟମୀ ଆଉ ଋତଙ୍କ ମଧ୍ୟରେ ଥିବା ମଧୁର ସମ୍ପର୍କ ଆମ୍ଭମାନଙ୍କୁ ପ୍ରେରଣା ଦିଏ, ଆମେ କିପରି ନିଜ ପରିବାରକୁ ପ୍ରେମ, ନିଃସ୍ୱାର୍ଥପରତା, ଆନୁଗତ୍ୟ ଓ ସମାଦର ଇତ୍ୟାଦି ଗୁଣଦ୍ୱାରା ବନ୍ଧିକି ରଖିପାରିବା । ଆଜି ଏହିସବୁ ଗୁଣଗୁଡ଼ିକର ଅଭାବ ହୁଏତ ଅନେକ ପରିବାର ମଧ୍ୟରେ ଭଗ୍ନାବସ୍ଥା ଆଣିଦେଇଛି, କିନ୍ତୁ ନୟମୀ ଓ ଋତଙ୍କର ମଧ୍ୟରେ ପରସ୍ପର ପ୍ରତି ଥିବା ପ୍ରଗାଢ଼ ପ୍ରେମ ଏବଂ ସମ୍ମାନ ସେମାନଙ୍କୁ ଈଶ୍ୱରଙ୍କର  ଅନୁଗ୍ରହ ଓ ଆର୍ଶୀବାଦର ଅଂଶୀ କରାଇଥିଲା ।