ପଥଚାରୀ ଏବଂ ପଥରୋଧୀ

  ପଥଚାରୀ  ଏବଂ ପଥରୋଧୀ 

ଆଜିର ଚିନ୍ତା

ପ୍ରେରିତ ୧୩:୧-୧୨

ସୁସମାଚାର ପ୍ରଚାର ଓ ପ୍ରସାରରେ ମୋର ଭୂମିକା କ'ଣ ଅଛି ?

ପ୍ରଭୁ ଯୀଶୁ ତାଙ୍କ ସ୍ଵର୍ଗାରୋହଣ ସମୟରେ କହିଥିବା ଆଦେଶ ଅନୁଯାୟୀ ପ୍ରଥମ ଶତାବ୍ଦୀ ମଣ୍ଡଳୀର ବିଶ୍ବାସୀ ତଥା ପ୍ରଭୁଙ୍କ ଦାସମନେ ସୁସମାଚାରକୁ ବହୁଳ ଭାବରେ ପ୍ରଚାର କରୁଥିଲେ । କେବଳ ସାଧାରଣ ବର୍ଗଙ୍କ ମଧ୍ୟରେ ନୁହେଁ, ମାତ୍ର ସମ୍ଭ୍ରାନ୍ତ, ଧନୀ ଏବଂ ଶାସନକର୍ତ୍ତାମାନଙ୍କୁ ମଧ୍ୟ ନିର୍ଭୀକ ଭାବରେ ସୁସମାଚାର କହୁଥିଲେ ।

ସୁସମାଚାରର ପଥଚାରୀ:

 ଏଫିସ ୪:୧ ଅନୁଯାୟୀ ପ୍ରତ୍ୟକେ ଆପଣା ଆପଣା ଆହ୍ୱାନର ଯୋଗ୍ୟ ଆଚରଣ କରିବା ଆବଶ୍ୟକ । ତଦନୁଯାୟୀ ଶାଉଲ ଓ ବର୍ଣ୍ଣବବା ଆହ୍ୱାନର ଅନୁପାଳନ କରି ପ୍ରଚାର କରିବ ନିମନ୍ତେ ବାହାରି ଗଲେ । ସେମାନେ ଲକ୍ଷ୍ୟହୀନ କିମ୍ବା ଶକ୍ତିହୀନ ହୋଇ ଯାଇ ନ ଥିଲେ ବରଂ

1. ସେମାନେ ଉପବାସ ଓ ପ୍ରାର୍ଥନା କଲେ (୩ ପଦ)

2.ମଣ୍ଡଳୀର ବିଶ୍ବାସୀ ଓ ଅଭିଷିକ୍ତଗଣ ହସ୍ତାର୍ପଣ କରି ସେମାନଙ୍କୁ ପ୍ରେରଣ କଲେ (୩ ପଦ)

3.ସେମାନେ ପବିତ୍ର ଆତ୍ମାଙ୍କ ଦ୍ଵାରା ପ୍ରେରିତ ହୋଇ ନିର୍ଦ୍ଦିଷ୍ଟ ସ୍ଥାନକୁ ଗଲେ (୪ପଦ) ।

ବର୍ଣ୍ଣବବା ଓ ଶାଉଲ ସୁସମାଚାର ପ୍ରଚାର କାର୍ଯ୍ୟରେ ଅଗ୍ରସର ହେଲେ ପୁଣି ମାର୍କ ମଧ୍ୟ ସହଭାଗୀ ଅର୍ଥାତ୍ ପରିଚାରକ ହୋଇ ସାଙ୍ଗରେ ଥିଲେ । ମାର୍କଙ୍କ ଭୂମିକା ଅନ୍ୟଦ୍ୱୟଙ୍କ ତୁଳନାରେ ସାମାନ୍ୟ ନ ଥିଲା । 

ସୁସମାଚାରର ପଥରୋଧୀ: 

ସୁସମାଚାର ଯଦି ବାସ୍ତବରେ ପ୍ରଚାରିତ ହୁଏ, ତେବେ ଏହାର ବିରୋଧୀ ଓ ପଥରୋଧକ ମଧ୍ୟ ଯେ ଆସିବେ ଏହା ନିଶ୍ଚିତ । ଶାସନକର୍ତ୍ତା ସେର୍ଗିୟ  ପାଉଲଙ୍କୁ ସୁସମାଚାରରୁ ବିମୁଖ କରିବାକୁ ମାୟାବୀ ଅଲ୍ଲୀମା ପ୍ରତିରୋଧ କରିଥିଲା । ମାତ୍ର ଶାଉଲ ସେହି ସମୟରେ କୌଣସି ମନୁଷ୍ୟ କ୍ରୋଧରେ ପ୍ରତିକ୍ରିୟା କରି ନ ଥିଲେ ବରଂ ଲେଖାଅଛି, ପବିତ୍ର ଆତ୍ମାରେ ପୂର୍ଣ୍ଣ ହୋଇ ସେହି ମାୟାବୀକୁ ଧମକ ଦେଲେ (୯,୧୦ ପଦ) । ତାହାର ଆନ୍ତରିକ କୁତ୍ସିତ ଉଦ୍ଦେଶ୍ୟସବୁକୁ ପଦାରେ ପକାଇଦେଲେ । ତାହାକୁ ଅନ୍ଧ କରାଇଲେ ।  

ଈଶ୍ୱରଙ୍କ ସୁସମାଚାରକୁ  କେହି ମଧ୍ୟ ପ୍ରତିରୋଧ କରି ନ ପାରେ । ଯଦି କେହି ପଥରୋଧ କରେ, ଈଶ୍ୱର ତାହାର ବିଚାର କରିବେ । ସେହି ଘଟଣାରେ ଈଶ୍ୱର ଗୌରବ ପାଇବା ସହ ଶାସନକର୍ତ୍ତା ଜଣକ ଶିକ୍ଷାରେ ବିଶ୍ଵାସ କଲେ ।