ଅକୁଣ୍ଠିତ ହୃଦୟର ଦାନ

 ଅକୁଣ୍ଠିତ ହୃଦୟର ଦାନ

ଆଜିର ଚିନ୍ତା

ଯାତ୍ରା ୩୫:୧-୩୫

ସଦାପ୍ରଭୁଙ୍କର ଧନ୍ୟବାଦ କର, ତାହାଙ୍କ ମଙ୍ଗଳଦାନ ସବୁ ପାସୋର ନାହିଁ । 

ଈଶ୍ୱରଙ୍କ ସେବାରେ ମନୁଷ୍ୟର ଆବଶ୍ୟକତା : 

ଈଶ୍ଵର ମନୁଷ୍ୟମାନଙ୍କ ମଧ୍ୟରେ ବାସ କରିବାକୁ ଚାହାନ୍ତି, ତେଣୁ ସେ ମୋଶାଙ୍କୁ ଗୋଟିଏ ପବିତ୍ର ସ୍ଥାନ ନିର୍ମାଣ କରିବାକୁ କହିଲେ (ଯାତ୍ରା ୨୫:୭) । ଏହା ପାପରେ ପତିତ ମନୁଷ୍ୟ ଜାତି ପ୍ରତି ତାଙ୍କର ପ୍ରେମକୁ ପ୍ରକାଶ କରେ । ଈଶ୍ଵର ଆବାସ ତମ୍ବୁ ନିର୍ମାଣ କରିବା ନିମନ୍ତେ ପ୍ରାଞ୍ଜଳଭାବେ ବୁଝାଇଲେ ଏବଂ ନିର୍ମାଣ ନିମନ୍ତେ ଆବଶ୍ୟକ ଦ୍ରବ୍ୟ ଲୋକମାନଙ୍କ ଠାରୁ ସଂଗ୍ରହ କରିବାକୁ କହିଲେ (ଯାତ୍ରା ୨୫:୭) । ଏହା ପ୍ରକାଶ କରେ ଯେ, ଉପାସକମାନଙ୍କର ସହଯୋଗରେ ହିଁ ସେ ସେମାନଙ୍କ ମଧ୍ୟରେ ବାସ କରିବେ । ସେ ଦିନ ଇସ୍ରାଏଲୀୟମାନେ ଉପହାର ଦେବା ଦ୍ଵାରା ପ୍ରକାଶ କରିଥିଲେ ଯେ ସେମାନେ ନିଜ ଗହଣରେ ଈଶ୍ୱରଙ୍କ ଉପସ୍ଥିତି ଚାହାଁନ୍ତି । 

ଈଶ୍ୱରଙ୍କ ସେବାରେ ଐଶ୍ୱରୀୟ ସ୍ଵାଧୀନତା : 

ମୋଶା ସ୍ଵଚ୍ଛନ୍ଦ ମନରେ ଦେବା ପାଇଁ କହିଲେ (୫ପଦ) । ଯେଉଁମାନଙ୍କର ସମ୍ବଳ ଥିଲା, ସେମାନେ ବହୁମୂଲ୍ୟ ଦ୍ରବ୍ୟ ଦେବେ ଏବଂ ଯେଉଁ ମାନଙ୍କର ସମ୍ବଳ କମ୍ ଥିଲା, ସେମାନେ କମ୍ ମୂଲ୍ୟର ଉପହାର ଦେବା ପାଇଁ ସୁଯୋଗ ଥିଲା । ସେମାନଙ୍କ ମଧ୍ୟରେ ଯେଉଁମାନେ ଜ୍ଞାନୀ ଥିଲେ, ସେମାନଙ୍କ ହସ୍ତରେ ମୋଶା ଗୁରୁତ୍ଵପୂର୍ଣ୍ଣ କାର୍ଯ୍ୟ ସମର୍ପଣ କଲେ (ଯାତ୍ରା ୩୫:୧୦,୩୧) । ନାରୀଗଣ ମଧ୍ୟ ପ୍ରଭୁଦତ୍ତ ତୋଡାକୁ ନିର୍ମାଣ କାର୍ଯ୍ୟରେ ବ୍ୟବହାର କଲେ (ଯାତ୍ରା ୩୫:୨୫-୨୬) । ସମାଜର ପଦସ୍ଥଗଣ ମଧ୍ୟ ନିର୍ମାଣ କାର୍ଯ୍ୟରେ ଯୋଗଦାନ କଲେ (୨୭ପଦ) । ଆତଏବ, ପ୍ରତ୍ୟେକ ବ୍ୟକ୍ତି ବିଶେଷଙ୍କୁ ନିଜର ଶକ୍ତି ଓ ସାମର୍ଥ୍ୟ ଅନୁସାରେ ନିର୍ମାଣ କାର୍ଯ୍ୟରେ ସହଯୋଗ କରିବାକୁ ସୁଯୋଗ ମିଳିଲା । ଈଶ୍ୱରଙ୍କ ଆବାସ ତମ୍ବୁ ସୁନ୍ଦର ଭାବରେ ନିର୍ମିତ ହେଉ, ଏହି ଇଚ୍ଛା ଇସ୍ରାଏଲୀୟମାନେ ଆବଶ୍ୟକତାରୁ ଅଧିକ ଉପହାର ଦେବା ଦ୍ଵାରା ପ୍ରମାଣିତ କରିଥିଲେ । 

ସଦାପ୍ରଭୁ ହୃଷ୍ଟଚିତ୍ତ ଦାତାକୁ ଭଲ ପାଆନ୍ତି । ଆମର ହୃଷ୍ଟଚିତ୍ତ ଦାନର ପ୍ରଚୁରତା ଦ୍ଵାରା ମଣ୍ଡଳୀର, ସୁସମାଚାର କାର୍ଯ୍ୟର ଅଭାବ ପୂରଣ ହୋଇପାରିବ । ମାଣ୍ଡଳୀକ କାର୍ଯ୍ୟ ଓ ସୁସମାଚାର କାର୍ଯ୍ୟକୁ ତ୍ଵରାନ୍ଵିିତ କରିବା ପାଇଁ ହୃଷ୍ଟଚିତ୍ତ ଦାନର ଆବଶ୍ୟକତା ରହିଛି ।