ସତର୍କବାଣୀ

 ସତର୍କବାଣୀ

ଆଜିର ଚିନ୍ତା

ଲୁକ ୨୧ : ୨୦-୩୮

ଯୀଶୁଙ୍କ ପୁନରାଗମନ ପାଇଁ ମୁଁ ପ୍ରସ୍ତୁତ ଅଟେ କି ?

ସତର୍କ ସୂଚନା :

 ୭୦ ଖ୍ରୀଷ୍ଟାବ୍ଦରେ ଯିରୁଶାଲମ ମନ୍ଦିର ଧ୍ଵଂସ ହୋଇଥିଲା । ଯୀଶୁ ବିଷଦଭାବେ ସେହି ବିଷୟ ବର୍ଣ୍ଣନା କରିଥିଲେ । ଯିହୁଦୀ ଏବଂ ରୋମୀୟମାନଙ୍କ ମଧ୍ୟରେ ଘଟିବାକୁ ଯାଉଥିବା ଆଗାମୀ ସଂଘର୍ଷ, ରକ୍ତପାତ ଏବଂ ମୃତ୍ୟୁ ସଂପର୍କରେ ଯୀଶୁ ସୂଚନା ଦେବା ସହିତ ସତର୍କ ରହିବା ପାଇଁ ପରାମର୍ଶ ଦେଇଥିଲେ । ୨୪ ପଦ ରେ ଉଲ୍ଲେଖିତ "ଅଣଯିହୁଦୀମାନଙ୍କର କାଳ" ସେହି ସମୟକୁ ବୁଝାଏ ଯେତେବେଳେ ଇସ୍ରାଏଲ ଜାତି ଅଣଯିହୁଦୀମାନଙ୍କ ଶାସନ କିମ୍ବା ଅତ୍ୟାଚାର ଅଧିନରେ ରହିବ । ଏହାର ପ୍ରାରମ୍ଭ ସମୟ ଖ୍ରୀ:ପୂ: ୫୦୬ ରେ ବାବିଲୋନରେ ଇସ୍ରାଏଲୀୟମାନଙ୍କ ନିର୍ବାସନ ଅବସ୍ଥାକୁ ବୁଝାଏ । ମହା ଗୌରବରେ ଖ୍ରୀଷ୍ଟ ସମୁଦାୟ ଜଗତରେ ତାହାଙ୍କ ଶାସନ ଓ କର୍ତ୍ତୃତ୍ୱ ପ୍ରତିଷ୍ଠା ନ କରିବା ପର୍ଯ୍ୟନ୍ତ ଏହି କାଳ ବା ସମୟ ସଂପୂର୍ଣ୍ଣ ହେବ ନାହିଁ । 

ଆକାଶରେ ଅଦ୍ଭୁତ ଲକ୍ଷଣ :

 ଯୀଶୁଙ୍କ ପୁନରାଗମନ ପୁର୍ବରୁ ଆକାଶରେ ଅଦ୍ଭୁତ ଲକ୍ଷଣ ସବୁ ଦେଖାଯିବ । ସୂର୍ଯ୍ୟ, ଚନ୍ଦ୍ର ଏବଂ ନକ୍ଷତ୍ରମାଳାର ଗତି ପଥରେ ବିଚିତ୍ର ଲକ୍ଷଣ ଏବଂ ପରିବର୍ତ୍ତନ ପରିଲକ୍ଷିତ ହେବ । ନିଚ୍ଚସ୍ଥ ଜଗତରେ ମଧ୍ୟ ଅନେକ ପ୍ରାକୃତିକ ବିପର୍ଯ୍ୟୟ ଘଟିବ । ଲୋକମାନେ ଭୀତଗ୍ରସ୍ତ, ଆତଙ୍କିତ ହେବେ ଏହି ପାଠ୍ୟାଂଶ ଲେଖିବା ସମୟରେ କୋଭିଡ୍ ୧୯ ମହମାରୀ ସାରା ବିଶ୍ବକୁ ଆତଙ୍କିତ କରିଛି । ଲକ୍ଷାଧିକ ଲୋକ ଅକାଳ ମୃତ୍ୟୁର ଶିକାର ହୋଇଛନ୍ତି । ଏହା ମଧ୍ୟ ଅନ୍ତିମ ସମୟର ଏକ ସତର୍କବାଣୀ ନୁହେଁ କି ?

ପ୍ରସ୍ତୁତ ଜୀବନ :

 ଯୀଶୁ ତାଙ୍କ ଶିକ୍ଷାରେ ଆତ୍ମ ପରିଚୟ ପାଇଁ "ମନୁଷ୍ୟ ପୁତ୍ର" ନାମ ବ୍ୟବହାର କରୁଥିଲେ । ଈଶ୍ଵର ରୂପୀ ଯୀଶୁ ମନୁଷ୍ୟ ରୂପେ ଅବତରଣ କରି ଆମ ପାଇଁ ଯେଉଁ ଉଦ୍ଧାର ଓ ପରିତ୍ରାଣ କାର୍ଯ୍ୟ ସଂପାଦନ କଲେ, ତାହା ସାବ୍ୟସ୍ତ କରିବା ଦିଗରେ "ମନୁଷ୍ୟ ପୁତ୍ର" ଶବ୍ଦଟି ଅତ୍ୟନ୍ତ ତାପର୍ଯ୍ୟ ପୁର୍ଣ୍ଣ । ଯୀଶୁ ତାଙ୍କର ଭାବବାଣୀ ସମ୍ବଳିତ ସମ୍ବାଦ ମାଧ୍ୟମରେ ବିଶ୍ୱାସୀମାନଙ୍କୁ ଜାଗତିକ ସୁଖ - ସଂପଦ, ମତ୍ତତା, ମାଂସିକ ଅଭିଳାଷ ଏବଂ ମନ୍ଦତାରେ ମଜ୍ଜି ନ ରହି ଆତ୍ମିକ କ୍ଷେତ୍ରରେ ବିଶ୍ଵସ୍ତ ଜୀବନଯାପନ ପାଇଁ ପରାମର୍ଶ ଓ ଉତ୍ସାହ ପ୍ରଦାନ କରିଥିଲେ କାରଣ ଏକ ଅନପେକ୍ଷୀତ ମୁହୂର୍ତ୍ତରେ ତାଙ୍କର ପୁନରାଗମନ ହେବ । ସେଥିପାଇଁ ବିଶ୍ୱାସୀବର୍ଗ ସର୍ବଦା ଏହି ଶୁଭଦିନପାଇଁ ପ୍ରସ୍ତୁତ ଜୀବନ ଯାପନ କରିବା ଆବଶ୍ୟକ । ଏହି ସମସ୍ତ ଘଟଣାରୁ ରକ୍ଷା ପାଇବାର ଏକମାତ୍ର ଉପାୟ ହେଉଛି ଈଶ୍ୱରଙ୍କ ସହ ନୀରବଚ୍ଛିନ୍ନ ସଂପର୍କ ରକ୍ଷା ।