ବଡ଼ ହେବାର ଲାଳସା

 ବଡ଼ ହେବାର ଲାଳସା

ଆଜିର ଚିନ୍ତା

ଲୁକ ୨୨:୨୪-୩୮

ମୁଁ କିପରି ଈଶ୍ଵରଙ୍କ ଦୃଷ୍ଟିରେ ଶ୍ରେଷ୍ଠ ହୋଇପାରିବି ?

ଶିଷ୍ୟମାନଙ୍କ ମଧ୍ୟରୁ ଜଣେ ତାଙ୍କ ପ୍ରତି ବିଶ୍ଵାସଘାତକତା କରିବ ବୋଲି ଯୀଶୁ କହିବା ପରେ, କିଏ ଏହିପରି ହୀନ କାର୍ଯ୍ୟ କରିପାରେ ବୋଲି ସେମାନଙ୍କ ମଧ୍ୟରେ ଏକ ଆଲୋଚନା ଆରମ୍ଭ ହେଲା । ଏହି ଆଲୋଚନା ଧୀରେ ଧୀରେ ଏକ ବିବାଦ ଦିଗକୁ ଗତି କଲା "ସେମାନଙ୍କ ଭିତରେ କିଏ ଶ୍ରେଷ୍ଠ" ମାତ୍ର ଯୀଶୁ ଏହାକୁ ଏକ ସୁଯୋଗ ଭାବରେ ଗ୍ରହଣ କରି ସେମାନଙ୍କୁ ପ୍ରକୃତ ଶ୍ରେଷ୍ଠତା ବିଷୟରେ ଶିକ୍ଷା  ଦେଇଥିଲେ ।

ଜଗତଠାରୁ ଭିନ୍ନ : 

ଶ୍ରେଷ୍ଠତା ବିଷୟରେ ଜଗତର ଲୋକମାନଙ୍କ ଦୃଷ୍ଟିକୋଣ ଈଶ୍ୱରଙ୍କ ଦୃଷ୍ଟିକୋଣଠାରୁ ସଂପୂର୍ଣ୍ଣ ଭିନ୍ନ ଅଟେ । ସେମାନେ ଉଚ୍ଚପଦ, ଶ୍ରେଷ୍ଠ ସ୍ଥାନ ଓ ଉତ୍ତମ ଆସନ ଅନ୍ଵେଷଣ କରନ୍ତି, ମାତ୍ର ତାଙ୍କର ଅନୁଗାମୀମାନେ ଏହି ଜଗତରେ ଶ୍ରେଷ୍ଠ ହେବା ପାଇଁ ଚେଷ୍ଟା ନ କରି ଈଶ୍ୱରଙ୍କ ରାଜ୍ୟରେ ଶ୍ରେଷ୍ଠତା ପାଇବା ପାଇଁ ଚେଷ୍ଟା କରିବା ଉଚିତ୍ । ଏଥିପାଇଁ ପ୍ରଥମେ ସେମାନଙ୍କୁ  ଏହି ଜଗତରେ ଦାସ ଓ ସେବକ ହେବାକୁ ପଡିବ । ସେବା ପାଇବାକୁ ନୁହେଁ, ମାତ୍ର ସେବା କରିବାକୁ ହେବ । ଯୀଶୁ ନିଜେ ସେମାନଙ୍କ ମଧ୍ୟରେ ସେବକ ପରି ଥିଲେ (୨୭ ପଦ, ଯୋହନ ୧୩:୧୨-୧୫) ।

ପିତରଙ୍କ ପ୍ରତି ନିର୍ଦ୍ଦେଶ :

 ଏହାପରେ ଯୀଶୁ ପିତରଙ୍କୁ ଶୟତାନର ପରୀକ୍ଷା ବିଷୟରେ ସତର୍କ କରି ଦେଇଥିଲେ । ମାତ୍ର ପତନରୁ ଉଠିବା ପରେ ଭାଇମାନଙ୍କୁ (ବିଶ୍ୱାସୀମାନଙ୍କୁ) ତାଙ୍କଠାରେ ସୁସ୍ଥିର କରିବା ପାଇଁ ତାଙ୍କୁ ନିର୍ଦ୍ଦେଶ ଦେଇଥିଲେ । ଯୀଶୁଙ୍କ ବାକ୍ୟ ସଫଳ ହୋଇଥିଲା । ପିତର ଯୀଶୁଙ୍କୁ ତିନିଥର ଅସ୍ୱୀକାର କରିଥିଲେ, ତାଙ୍କୁ ଅବିଶ୍ଵାସ କରିଥିଲେ ଓ ନିଜର ମାଛ ବ୍ୟବସାୟକୁ ଫେରି ଯାଇଥିଲେ । ମାତ୍ର ଯୀଶୁଙ୍କ ପୁନରୁତ୍ଥାନ ପରେ ପିତର ସଂପୂର୍ଣ୍ଣ ଭାବରେ ପରିବର୍ତ୍ତିତ ହୋଇ ଏକ ଦୃଢ଼ ବିଶ୍ୱାସୀ ଓ ପ୍ରେରିତରେ ପରିଣତ ହୋଇଥିଲେ । ସେ ଆଦ୍ୟ ମଣ୍ଡଳୀର ଜଣେ ପ୍ରତିଷ୍ଠାତା ଥିଲେ ।

ଦୁଇଟି ଖଣ୍ଡା : 

ଏହି ଶେଷାଂଶଟି ବୁଝିବା ଅତି କଷ୍ଟକର ଅଟେ । କେତେକଙ୍କ ମତରେ, ଯୀଶୁଙ୍କ ପ୍ରସ୍ଥାନ ପରେ ଶିଷ୍ୟମାନେ ଶକ୍ତି ଓ ସୁରକ୍ଷା ଆବଶ୍ୟକ କରିବେ । ସେଥିପାଇଁ ଯେତେବେଳେ ସେମାନେ ଆକ୍ଷରିକ ଅର୍ଥରେ ଦୁଇଟି ଖଣ୍ଡା ଅଛି ବୋଲି କହିଲେ, ସେତେବେଳେ ଯୀଶୁ ଆତ୍ମିକ ଅର୍ଥରେ ସେହି ଦୁଇଟିକୁ ଆତ୍ମାଙ୍କ ଖଡ୍ଡ (ଶକ୍ତିଦାୟକ) (ଏଫିସୀୟ୬:୧୭) ଓ ଈଶ୍ୱରଙ୍କ ବାକ୍ୟ (ସୁରକ୍ଷାତ୍ମକ) ରୂପକ ଖଡ୍ଡ (ଏବ୍ରୀ ୪:୧୨) ବୋଲି ସୂଚିତ କରିଥିଲେ । ପ୍ରକୃତରେ ପରେ, ଏହି ଦୁଇ ଖଡ୍ଗ ବ୍ୟବହାର କରି ସେମାନେ ଅନେକ ରାଜ୍ୟ (ହୃଦୟ) ଜୟ କରିଥିଲେ ଓ ଆଜି ମଧ୍ୟ ଏହା ଅବ୍ୟାହତ ଅଛି ।