ଉଚ୍ଚୀକୃତ କରିବା

 ଉଚ୍ଚୀକୃତ କରିବା

ଆଜିର ଚିନ୍ତା

ଲୁକ ୭:୨୪-୩୫

ଅନ୍ୟକୁ ନିଜଠାରୁ ଶ୍ରେଷ୍ଠ ମନେ କରିପାରୁଛୁ କି ? 

ଯୋହନ ଯୀଶୁଙ୍କୁ ଚିହ୍ନି ନ ଥିଲେ ମଧ୍ୟ ଯୀଶୁ ତାଙ୍କୁ ଚିହ୍ନିଥିଲେ । ଯୀଶୁ ସମସ୍ତଙ୍କୁ ଚିହ୍ନନ୍ତି ଓ ଜାଣନ୍ତି । ଯୀଶୁ ତାଙ୍କର ନମ୍ରତାର ଗୁଣ ହେତୁ ଯୋହନଙ୍କୁ ତାଙ୍କର ବରିଷ୍ଠ ଭାବରେ ସମ୍ମାନ ଦେଉଥିଲେ ଓ ପରିଚୟ ମଧ୍ୟ ଦେଉଥିଲେ । 

ଯୋହନଙ୍କ ପରିଚୟ : ଯୋହନ ଯେ କେତେ ମହାନ ତାହା ଯୀଶୁ ଲୋକମାନଙ୍କୁ କହୁଥିଲେ । ଯୋହନ ମଧ୍ୟ ଈଶ୍ୱରଙ୍କ ଆର୍ଶୀବାଦର ସନ୍ତାନ, ଏହା ସେ ଜାଣିଥିଲେ । ତାଙ୍କ ଠାରୁ ଆଉ କେହି ମହାନ ନାହାନ୍ତି (୨୮) । ଏପରି କହିବା ହିଁ ଯୀଶୁଙ୍କର ନମ୍ରତା ଗୁଣକୁ ପ୍ରକାଶ କରେ । ଯୋହନଙ୍କ ମୂଳ ଲକ୍ଷ୍ୟ ଥିଲା ସୁସମାଚାର ପ୍ରଚାର କରିବା । ସେ ମାତାଙ୍କ ଉଦରରୁ ପବିତ୍ର ଆତ୍ମାଙ୍କ ଆଶୀର୍ବାଦ ପାଇଥିଲେ (୧:୧୫) । ତାଙ୍କର ବାର୍ତ୍ତା ଥିଲା "ମନ ପରିବର୍ତ୍ତନ କର" । ଯୀଶୁ ତାହାଙ୍କର ପରିଚୟ ପ୍ରଦାନ କରି କହିଲେ, "ମୁଁ ତୁମ୍ଭମାନଙ୍କୁ କହୁଅଛି, ସ୍ତ୍ରୀ ଗର୍ଭରୁ ଜନ୍ମ ହୋଇଥିବା ସମସ୍ତଙ୍କ ମଧ୍ୟରେ ଯୋହନଙ୍କ ଠାରୁ ମହାନ କେହି ନାହାନ୍ତି" । 

ଯୋହନଙ୍କ ମହାନତା : ଯୀଶୁଙ୍କ ଠାରୁ ଯୋହନଙ୍କ ମହାନତାର ପରିଚୟ ପାଇ କରଗ୍ରାହିମାନେ ବାପ୍ତିସ୍ମ ଗ୍ରହଣ କଲେ । ମାତ୍ର ଫାରୁଶୀ ଓ ବ୍ୟବସ୍ଥା ଶାସ୍ତ୍ରଜ୍ଞମାନେ ବାପ୍ତିସ୍ମ ନ ନେଇ ଚାଲିଗଲେ । ସେମାନେ ଯୋହନଙ୍କ ବିରୁଦ୍ଧରେ ବଚସା କଲେ, ସମାଲୋଚନା କଲେ । ଆଜି ମଧ୍ଯ ପାଳକ, ପ୍ରଚାରକ, ପ୍ରଭୁଙ୍କ ଦାସମାନେ ଯେ ଈଶ୍ଵରଙ୍କ ମନୋନୀତ, ଆଶୀର୍ବାଦପ୍ରାପ୍ତ, ଏହା ଆମେ ବିଶ୍ଵାସ ନ କରି ତାଙ୍କ ସମ୍ଵନ୍ଧରେ ସମାଲୋଚନା କରୁ ତଥା ଛିଦ୍ର ଖୋଜି ବୁଲୁ । ଯେଉଁ ବ୍ୟକ୍ତି ମନ୍ଦ ପ୍ରକୃତିର ସେ ଅନ୍ୟର ମନ୍ଦ ଚିନ୍ତା କରେ ପୁଣି ସେ ଯୀଶୁଙ୍କୁ ଗ୍ରହଣ କରେ ନାହିଁ କିମ୍ବା ତାଙ୍କର ବାକ୍ୟ ପାଳନ କରେ ନାହିଁ । ଏପରି ବ୍ୟକ୍ତି କିପରି ପରିତ୍ରାଣ ପାଇବ ? ପ୍ରଭୁ ଆମ୍ଭମାନଙ୍କ ଠାରୁ ସରଳ ବିଶ୍ଵାସ ଆଶା କରନ୍ତି । ଯେଉଁମାନେ ତାଙ୍କଠାରେ ବିଶ୍ଵାସ କରନ୍ତି, ସେ ସେମାନଙ୍କୁ ନିଜର ସନ୍ତାନତ୍ୱର ଅଧିକାର ପ୍ରଦାନ କରନ୍ତି (ଯୋହନ ୧:୧୨)।