ନିର୍ଭୀକ ସାକ୍ଷୀ
ଆଜିର ଚିନ୍ତା
ପ୍ରେରିତ ୨୧:୩୭-୨୨:୨୧
ମୁଁ ଅନ୍ୟମାନଙ୍କୁ ପ୍ରଭୁଙ୍କ ବିଷୟରେ ସାକ୍ଷ୍ୟ ଦେଉଛି କି ?
ପାଉଲଙ୍କୁ ଗଡ଼ ଭିତରକୁ ନେଇଯିବା ସମୟରେ ସେ ଗ୍ରୀକ୍ ଭାଷାରେ କଥା କହିବାରୁ ସେମାନେ ଜାଣିପାରିଲେ ଯେ ସେ ଜଣେ ଅଯଥା ଗଣ୍ଡଗୋଳକାରୀ ବ୍ୟକ୍ତି ନୁହନ୍ତି । ମାତ୍ର ସେ ଜଣେ ଯିହୁଦୀ ଅଟନ୍ତି ।
ସତ୍ୟତାକୁ ଘୋଷଣା କରିବା :
ପାଉଲ କାହାର ପ୍ରତିବାଦ କରିବା ପରିବର୍ତ୍ତେ ସେ ଜଣେ ଯିହୂଦୀ ପୁଣି ତା ନଗରର ଲୋକ ଅଟନ୍ତି ଏହା ସ୍ଵୀକାର କରି କହିଲେ, ଏହି ଲୋକମାନଙ୍କୁ କଥା କହିବାକୁ ମୋତେ ଅନୁମତି ଦେବାକୁ ନିବେଦନ କରୁଛି । ଅନୁମତି ପାଇଲା ପରେ ସେମାନେ ଯେପରି ବୁଝିପାରିବେ, ଏଥିପାଇଁ ପାଉଲ ଏବ୍ରୀ ଭାଷାରେ ଲୋକମାନଙ୍କୁ କହିବାକୁ ଲାଗିଲେ । ଏହାଦ୍ବାରା ସେ ଯେ ଜଣେ ନଇଷ୍ଠିକ ଯିହୂଦୀ ପୁଣି ଯିହୂଦୀମାନଙ୍କର ବ୍ୟବସ୍ଥା ଓ ପ୍ରଥାକୁ ସମ୍ମାନ ଦିଅନ୍ତି, ତାହା ସେମାନଙ୍କୁ ଜଣାଇ ଦେଲେ । ସଫଳତାର ସହ ସୁସମାଚାର ପ୍ରଚାର ନିମନ୍ତେ ଶ୍ରୋତାମାନଙ୍କର ଗ୍ରହଣୀୟ ଭାଷାରେ ଜ୍ଞାନ ମଧ୍ୟ ଆବଶ୍ୟକ ଅଟେ । ସେ ସାହସର ସହିତ ସେମାନଙ୍କୁ କହିଲେ, ମୁଁ ଜଣେ ଯିହୂଦୀ, ପୁଣି ପିତୃପୁରୁଷଙ୍କ ବ୍ୟବସ୍ଥାର ସୂକ୍ଷ୍ମ ନିୟମନୁସାରେ ଗମଲୀୟଲଙ୍କ ଦ୍ଵାରା ଶିକ୍ଷାପ୍ରାପ୍ତ ଅଟେ । ଆପଣାମାନଙ୍କ ପରି ମୁଁ ମଧ୍ୟ ଉଦଯୋଗୀ ହୋଇ ଏଥିପୂର୍ବରୁ ଯୀଶୁଖ୍ରୀଷ୍ଟଙ୍କ ମାର୍ଗରେ ଥିବା ଲୋକମାନଙ୍କୁ ବାନ୍ଧି କାରାଗାରରେ ପକାଇ ମୃତ୍ୟୁ ପର୍ଯ୍ୟନ୍ତ ତାଡ଼ନା କରୁଥିଲି ।ଏହିସବୁ କଥା କହିବାରୁ ଶ୍ରୋତାଗଣ ଆଗ୍ରହରେ ତାଙ୍କ କଥା ଶୁଣିବାକୁ ଲାଗିଲେ । ଯୀଶୁଙ୍କ ବିଷୟରେ ପ୍ରଚାର କରିବା ପୂର୍ବରୁ ଉପସ୍ଥିତ ଶ୍ରୋତାମାନଙ୍କୁ ନିଜ ଜୀବନରେ ପରିଚୟ ଦେବା ଆବଶ୍ୟକ ।
ସାକ୍ଷ୍ୟ ଦେବା :
ଲୋକମାନେ ଦୋଷାରୋପ କରିବା ନିମନ୍ତେ ମନଦେଇ ତାଙ୍କର କଥା ଶୁଣୁଥିଲେ । ପାଉଲ ନିର୍ଭୀକ ଭାବରେ ତାଙ୍କ ଜୀବନର ସାକ୍ଷ୍ୟ ସେମାନଙ୍କୁ ଦେଲେ । ଈଶ୍ଵର କିପରି ଦମ୍ମେସକ ନିକଟରେ ତାଙ୍କୁ ଡାକି ତାଙ୍କର ପରିଚୟ ଦେଲେ ତାହା ପୂଙ୍ଖାନୁପୁଙ୍ଖ ଭାବରେ ସେମାନଙ୍କୁ କହିଲେ । ପୁଣି ଯିରୁଶାଲମ ମନ୍ଦିରରେ ପାଇଥିବା ଦର୍ଶନ ଏବଂ ଆଦେଶ ସମ୍ବନ୍ଧରେ ମଧ୍ୟ ଜଣାଇଲେ । ସେ କହିଲେ, ଦିନ ଥିଲା ମୁଁ ଖ୍ରୀଷ୍ଟ ବିଶ୍ବାସୀ ସ୍ତିଫାନଙ୍କର ମୃତ୍ୟୁ ସମୟରେ ସେଠାରେ ଠିଆ ହୋଇ ତାହାକୁ ସମର୍ଥନ କରିଥିଲି । କିନ୍ତୁ ଏବେ ପ୍ରଭୁ ମୋତେ ବିଜାତୀୟମାନଙ୍କ ନିକଟକୁ ଯାଇ ଏକମାତ୍ର ସତ୍ୟ ପ୍ରଭୁଙ୍କ ବିଷୟରେ ଜଣାଇବାକୁ ପ୍ରେରଣ କରିଛନ୍ତି । ଏହା ଶୁଣି ବିଦ୍ରୋହୀମାନଙ୍କର କ୍ରୋଧ ତାଙ୍କ ପ୍ରତି ପ୍ରଜ୍ଜ୍ଵଳିତ ହେଲା । ପ୍ରତିବାଦ ଓ ତାଡ଼ନା ସତ୍ତ୍ବେ ଆମେ ସତ୍ୟସାକ୍ଷୀ ହେଉ ବୋଲି ଈଶ୍ଵର ଚାହାଁନ୍ତି ।