ଉତ୍ତମ ବୁଝାମଣା

 ଉତ୍ତମ ବୁଝାମଣା 

ଆଜିର ଚିନ୍ତା

ପ୍ରରିତ ୨୧: ୧୭-୨୬

ମୁଁ ଉତ୍ତମ ବୁଝାମଣା ଯଥାର୍ଥ କାର୍ଯ୍ୟ କରିବାକୁ ଚେଷ୍ଟା କରେ କି ? 

ପାଉଲ ଯିରୁଶାଲମରେ ପହଞ୍ଚିଲେ । ପରଦିନ ସେ ଅନ୍ୟମାନଙ୍କ ସହ ଯୀଶୁଙ୍କର ଭାଇ ଯାକୁବଙ୍କ ଗୃହକୁ ଗଲେ । ସେ ଯିରୁଶାଲମ ମଣ୍ଡଳୀର ଜଣେ ନେତା ଥିଲେ । ସେଠାରେ ସେ ସମସ୍ତ ପ୍ରାଚୀନମାନଙ୍କ ସହିତ କଥାବାର୍ତ୍ତା ହେଲେ । 

ବିରୋଧାତ୍ମକ ଚିନ୍ତାଧାରା : 

ସେଠାରେ ମଣ୍ଡଳୀ ମଧ୍ୟରେ ଅଣ ଯିହୁଦୀ ବିଶ୍ବାସୀ ମାନଙ୍କ ନିମନ୍ତେ ସୁନ୍ନତ ବିଧି ପ୍ରଚଳନ ଥିଲା । ପାଉଲ ଏହି ବିଧି ଅନୁଯାୟୀ କାର୍ଯ୍ୟ ନ କରି ମୋଶାଙ୍କ ବ୍ୟବସ୍ଥାକୁ ପରିତ୍ୟାଗ କରିବାକୁ ଲୋକମାନଙ୍କୁ ଶିକ୍ଷା ଦେଉଛନ୍ତି ବୋଲି ଜନରବ ହେଉଥିଲା । ମାତ୍ର ତାହା ସତ୍ୟ ନ ଥିଲା । ତେଣୁ ପାଉଲ ଯିହୁଦୀମାନଙ୍କର ପ୍ରଥାକୁ ବିରୋଧ କରୁନାହାନ୍ତି ବୋଲି ଜଣାଇବା ନିମନ୍ତେ ସେମାନଙ୍କର ଶୁଚିକରଣ ପ୍ରଥାକୁ ପାଳନ କରି ନିଜକୁ ଶୂଚି କଲେ, ଯେପରି ସୁସମାଚାର କାର୍ଯ୍ୟ ବାଧାପ୍ରାପ୍ତ ନ ହୁଏ । ଫଳରେ ମଣ୍ଡଳୀରେ ଶାନ୍ତି ସ୍ଥାପନ ହେଲା । ପାଉଲ ଜଣେ ଦୃଢ଼ ଖ୍ରୀଷ୍ଟ ବିଶ୍ବାସୀ ଥିଲେ, ତଥାପି ଅନ୍ୟମାନଙ୍କୁ ଖ୍ରୀଷ୍ଟଙ୍କ ନିମନ୍ତେ ଲାଭ କରିବା ନିମନ୍ତେ ସେ କେତେଗୁଡ଼ିଏ ନୀତି ନିୟମରେ ଆପଣାକୁ ସାମିଲ କଲେ (୧କର ୯:୧୯-୨୩) । ଆମେ କୌଣସିମତେ ଆମର ଯଥାର୍ଥ ବିଶ୍ଵାସମତକୁ ଭଙ୍ଗ କରିବା ଉଚିତ୍ ନୁହେଁ, ବରଂ ମଣ୍ଡଳୀ ମଧ୍ୟରେ ଶାନ୍ତି ରକ୍ଷା କରି ପରସ୍ପର ମଧ୍ୟରେ ଉତ୍ତମ ବୁଝାମଣା ରକ୍ଷା କରି ନିଷ୍ପତି ନେବା ଉଚିତ୍ ।

ଉତ୍ତମ ବୁଝାମଣା :

ଯିହୁଦୀମାନେ ଭାବୁଥିଲେ, ଯେଉଁମାନେ ପୂରାତନ ନିୟମରେ ଥିବା ନିୟମସବୁ ପାଳନ କରିବେ, ସେମାନେ ପରିତ୍ରାଣ ପାଇବେ । ପାଉଲ ଏହି ନିୟମକୁ ଅଗ୍ରାହ୍ୟ କଲେ । ସେ ଜଣାଇଦେଲେ, ଈଶ୍ଵର ମହାଅନୁଗ୍ରହରେ ଆମ୍ଭମାନଙ୍କୁ ବିନାମୂଲ୍ୟରେ ପରିତ୍ରାଣ ଦେଇଛନ୍ତି । ଆମେ କେବଳ ବିଶ୍ଵାସରେ ତାହା ଗ୍ରହଣ କଲେ, ପରିତ୍ରାଣ ପ୍ରାପ୍ତ ହେବା । କିନ୍ତୁ ନିୟମ ଆମକୁ ଆମର ଦୋଷ ଦେଖାଇ ଦିଏ, ମାତ୍ର ଆମକୁ ପରିତ୍ରାଣ ଦେଇପାରିବେ ନାହିଁ । ପୁରାତନ ନିୟମ ଯୀଶୁଖ୍ରୀଷ୍ଟଙ୍କର ଆସିବା ବିଷୟରେ ଶିକ୍ଷା ଦେଇଛି । ଯୀଶୁ ଜଗତକୁ ଆସି ବ୍ୟବସ୍ଥାକୁ ସଫଳ କଲେ ଏବଂ ପାପର ଦଣ୍ଡ ନିଜ ଉପରେ ନେଇ ଆମକୁ ଦଣ୍ଡମୁକ୍ତ ହେବାରେ ସୁଯୋଗ ଦେଲେ । ବ୍ୟବସ୍ଥା ଆମକୁ ଭଲମନ୍ଦର ଜ୍ଞାନ ଦିଏ ଓ ଉତ୍ତମ ଜୀବନଯାପନ କରିବାକୁ ଚାଳନା ଦିଏ । ବିନା ଯୁକ୍ତିତର୍କରେ, ପ୍ରେମରେ ଓ ସରଳ ଭାବରେ ସେ ଲୋକମାନଙ୍କୁ ବୁଝାଇବାରୁ, ସେ ସେମାନଙ୍କ ନିକଟରେ ସୁସମାଚାର ଦେଇପାରିଲେ ।