ପ୍ରସ୍ତୁତ ଜୀବନ
ଆଜିର ଚିନ୍ତା
ପ୍ରେରିତ ୨୧:୧-୧୬
ଅନ୍ୟମାନଙ୍କ ନିମନ୍ତେ ମୁଁ ମନୋଯୋଗୀ ଅଟେ କି ?
ପାଉଲ, ସାକ୍ଷ୍ୟ ଓ ବାକ୍ୟ ମାଧ୍ୟମରେ ଯେ ଲୋକମାନଙ୍କୁ ସାହାଯ୍ୟ କଲେ, ତା' ନୁହେଁ, ମାତ୍ର ନିଜେ ପରିଶ୍ରମ କରି ଦାନ ମାଧ୍ୟମରେ ମଧ୍ୟ ଦରିଦ୍ରମାନଙ୍କର ଯତ୍ନ ନେଉଥିଲେ ।
ଅନ୍ୟ ନିମନ୍ତେ ମନୋଯୋଗୀ :
ପାଉଲ ଅନ୍ୟମାନଙ୍କର ଆତ୍ମିକ ଜୀବନ ବିଷୟରେ ଅଧିକ ମନୋଯୋଗୀ ଥିଲେ । ତେଣୁ ଯାତ୍ରା ପଥରେ ମଧ୍ୟ ସେ ସୁଯୋଗ ବାହାର କରି ବିଶ୍ବାସୀମାନଙ୍କର ଯତ୍ନ ନେଉଥିଲେ । ସୋର ରେ ଜାହାଜ କିଛି ସମୟ ନିମନ୍ତେ ରହିବାରୁ ସେ ଶିଷ୍ୟମାନଙ୍କୁ ଖୋଜି ସେମାନଙ୍କ ସହିତ ସାକ୍ଷାତ କଲେ । ସେମାନଙ୍କୁ ଶିକ୍ଷା, ପରାମର୍ଶ ଓ ଉତ୍ସାହ ଦେବା ସହିତ ପ୍ରାର୍ଥନା କଲେ । ପତଲମାଇରେ ମଧ୍ୟ ସେ ଭାଇମାନଙ୍କ ସାଙ୍ଗରେ ଗୋଟିଏ ଦିନ ବିତାଇଲେ । ପୁଣି କାଇସରିଆକୁ ଆସି ସୁସମାଚାର ପ୍ରଚାରକ ଫିଲିପଙ୍କ ଗୃହରେ ଅନେକ ଦିନ ରହି ବିଶ୍ଵାସୀମାନଙ୍କ ସହିତ ସହଭାଗିତାରେ ସମୟ ବିତାଇ ସେମାନଙ୍କୁ ଉତ୍ସାହିତ କଲେ । ତେଣୁ ଲୋକମାନଙ୍କଠାରୁ ସେ ବିଦାୟ ନେଇ ଅନ୍ୟତ୍ର ଯିବାକୁ ବାହାରିବା ସମୟରେ ସେମାନେ ଦୁଃଖ କରିବା ସହ ରୋଦନ କରୁଥିଲେ । ଆମେ ଅନ୍ୟମାନଙ୍କ ବିଷୟରେ ମନୋଯୋଗ କରୁଛୁ ନା ନିଜର ସ୍ବାର୍ଥସିଦ୍ଧି ପାଇଁ ବ୍ୟସ୍ତ ରହିଛୁ ?
ସଂପୂର୍ଣ୍ଣ ସମର୍ପଣ :
ପବିତ୍ର ଆତ୍ମା ବିଶ୍ବାସୀମାନଙ୍କୁ ପାଉଲଙ୍କ ସମ୍ମୁଖରେ ଥିବା ତାଡ଼ନା ବିଷୟରେ ଜଣାଉଥିବାରୁ ସେମାନେ ତାଙ୍କୁ ଯିରୁଶାଲମକୁ ନ ଯିବାକୁ ଅନୁରୋଧ କଲେ । କାଇସରିଆରେ ଥିବା ସମୟରେ ଆଗାବ ନାମକ ଜଣେ ଭାବବାଦୀ ଯିହୂଦା ପ୍ରଦେଶରୁ ଆସି ପାଉଲ ଓ ଯିରୁଶାଲମରେ କିପରି ତାଡ଼ନା ଭୋଗ କରିବେ, ସେ ବିଷୟରେ ତାଙ୍କୁ ଜଣାଇଲେ । ଏକଥା ଶୁଣି ସମସ୍ତେ ତାଙ୍କୁ ଯିରୁଶାଲମକୁ ନ ଯିବା ନିମନ୍ତେ ବିନତୀ କଲେ । ମାତ୍ର ସେ କହିଲେ, ମୁଁ ପ୍ରଭୁ ଯୀଶୁଙ୍କ ନାମ ନିମନ୍ତେ ଯିରୁଶାଲମରେ କେବଳ ବନ୍ଦୀ ହେବକୁ ନୁହେଁ, ମାତ୍ର ମରିବାକୁ ସୁଦ୍ଧା ପ୍ରସ୍ତୁତ ଅଛି । ପ୍ରଭୁ ଆମଠାରୁ ସମ୍ପର୍ଣ୍ଣ ସମର୍ପିତ ଜୀବନ ଚାହୁଛନ୍ତି ।
ଦୃଢ଼ ସିଦ୍ଧାନ୍ତ :
ପ୍ରିୟ ଲୋକମାନଙ୍କର କ୍ରନ୍ଦନ ଓ ବାରମ୍ବାର ବିନତୀ ସହ ଅନୁରୋଧ ଶୁଣି ମଧ୍ୟ ପାଉଲ ନିଜ ସିଦ୍ଧାନ୍ତ ରୁ କ୍ଷାନ୍ତ ହେଲେ ନାହିଁ, ବରଂ ଆନନ୍ଦ ମନରେ ତାଡ଼ନା ସହ୍ୟ କରି ଖ୍ରୀଷ୍ଟଙ୍କ ନିମନ୍ତେ ସାକ୍ଷ୍ୟ ବହନ କରିବା ନିମନ୍ତେ ଯିରୁଶାଲମକୁ ଯାତ୍ରା କଲେ । ଦୃଢ଼ ସିଦ୍ଧାନ୍ତ ନ ନେଲେ, ଆମେ ପ୍ରଭୁଙ୍କର ମନରମତ କାମ କରି ପାରିବା ନାହିଁ ।