ପ୍ରଭୁଙ୍କ ବାକ୍ୟର ଅଭିବୃଦ୍ଧି

 ପ୍ରଭୁଙ୍କ ବାକ୍ୟର ଅଭିବୃଦ୍ଧି

ଆଜିର ଚିନ୍ତା

ପ୍ରେରିତ ୧୯:୧୧-୨୦

ମୋର ଜୀବନ ଶୈଳୀ ପ୍ରଭୁଙ୍କ ବାକ୍ୟ ବୃଦ୍ଧିର ସହାୟକ ହେଉଛି କି ?

ଅନେକ ଏଫିସୀୟ ଭୂତ ପ୍ରେତ ଦୂରୀକରଣ ଏବଂ କୁହୁକ କର୍ମରେ ନିଜକୁ ନିଯୋଗ କରି ଲୋକମାନଙ୍କଠାରୁ ଭୂତ ଆତ୍ମା ବାହାର କରିବା ଦ୍ୱାରା ଟଙ୍କା ଉପାର୍ଜନ କରୁଥିଲେ ।

ମନ୍ଦ କାର୍ଯ୍ୟର ପ୍ରତିକ୍ରିୟା :

ସ୍କେବା ନାମକ ଜଣେ ଯିହୁଦୀୟ ପ୍ରଧାନ ଯାଜକ ଥିଲେ । ତାଙ୍କର ସାତୋଟି ପୁଅ ଏହିପରି କାର୍ଯ୍ୟ କରୁଥିଲେ । ସେହିପରି ସମୟରେ ଈଶ୍ଵର ପାଉଲଙ୍କ ଦ୍ଵାରା ଅସାମାନ୍ୟ ଶକ୍ତିର କାର୍ଯ୍ୟ କଲେ । ଏହା ଦେଖି ଈଶ୍ୱରଙ୍କଠାରୁ ଆଗତ ପବିତ୍ର ଆତ୍ମା ଯେ ଅଧିକ ଶକ୍ତିଶାଳୀ ଅଟନ୍ତି, ତାହା ସେମାନେ ଜାଣିପାରିଲେ । କାରଣ ପାଉଲଙ୍କଠାରୁ ଅଣା ଯାଇଥିବା ରୁମାଲ୍ କିମ୍ବା ଗାମୁଛା ଦ୍ଵାରା ରୋଗୀମାନେ ସୁସ୍ଥ ହେଉଥିଲେ ଓ ଦୁଷ୍ଟ ଆତ୍ମାଗୁଡ଼ିକ ବାହାରି ଯାଉଥିଲେ । ଯୀଶୁଙ୍କୁ ନ ଜାଣି ତାଙ୍କର ନାମକୁ ବ୍ୟବହାର କରିବା ଅତି ମାରାତ୍ମକ ବିଷୟ ଅଟେ । ତେଣୁ ସେହି ଭୂତିଡ଼ିଆମାନଙ୍କୁ ଦୁଷ୍ଟତା କହିଲା, ଆମେ ଯୀଶୁଙ୍କୁ ଜାଣୁ ଓ ପାଉଲଙ୍କୁ ଜାଣୁ, ମାତ୍ର ତୁମ୍ଭେମାନେ କିଏ ? ମନୁଷ୍ୟକୁ ପରିବର୍ତ୍ତନ କରିବାର ଶକ୍ତି କେବଳ ଯୀଶୁଙ୍କଠାରେ ଅଛି । ତେଣୁ ତାଙ୍କୁ ବିଶ୍ଵାସ କରି ନିଜକୁ ତାଙ୍କଠାରେ ସମର୍ପଣ କଲେ, ଆମର ଜୀବନ ଶୈଳୀ ପରିବର୍ତ୍ତିତ ହୋଇଯିବ ଏବଂ ଆମେ ପ୍ରଭୁଙ୍କ ହାତରେ ବ୍ୟବହାର ଉପଯୋଗୀ ଜଣେ ବ୍ୟକ୍ତି ହୋଇପାରିବା । 

ମନ୍ଦରୁ ପୃଥକ ରହିବା :

ଏଫିସ ନଗର ଯାଦୁବିଦ୍ୟା, କୁହୁକକର୍ମ ଏବଂ ଭୂତ ଦୂରୀକରଣର କେନ୍ଦ୍ରସ୍ଥଳୀ ଥିଲା । ଏହା ଅର୍ଥ ଉପାର୍ଜନର ଏକ ଉପାୟ ଥିଲା । ମାତ୍ର ଈଶ୍ଵର ଏହିସବୁ ବିଷୟକୁ ସ୍ପଷ୍ଟ ଭାବରେ ବାରଣ କରିଛନ୍ତି (୨ବିବ ୨୮:୯-୧୩) । ଜଣେ ବିଶ୍ବାସୀ ଏହିସବୁରୁ ସମ୍ପୂର୍ଣ୍ଣ ପୃଥକ ରହିବା ଅତି ଜରୁରୀ ଅଟେ । ମାତ୍ର ଏବେ ମଧ୍ୟ ଖ୍ରୀଷ୍ଟୀୟ ପରିବାରଗୁଡ଼ିକରେ ନାନା ପ୍ରକାର ଅନ୍ଧ ବିଶ୍ଵାସର ପ୍ରଚଳନ ପରିଲକ୍ଷିତ ହୁଏ । ତେଣୁ ସେମାନେ ସୂତା, ଫିତା, କନା ଆଦି ଚିହ୍ନକୁ ବ୍ୟବହାର କରନ୍ତି । ଶୟତାନ ଅତି ଚତୁର ଓ ଶକ୍ତିଶାଳୀ ଅଟେ । ତେଣୁ ସେ ଏହିସବୁ ଦ୍ଵାରା ବିଶ୍ବାସୀମାନଙ୍କ ଜୀବନରେ ପରୋକ୍ଷ ଭାବରେ କାର୍ଯ୍ୟ କରି ସେମାନଙ୍କୁ ପ୍ରଭୁଙ୍କଠାରୁ ଦୂରେଇ ରଖେ । ମାତ୍ର ଈଶ୍ୱରଙ୍କର ଶକ୍ତି ସବୁଠାରୁ ମହାନ୍ ଅଟେ । (୧ଯୋହନ ୪:୪, ପ୍ରକାଶିତ ୨୦:୧୦) । ତେଣୁ ଆମେ ଏହିସବୁ ଦୁର୍ବଳତାର ବନ୍ଧନରୁ ମୁକ୍ତ ହେବା ଅତି ଜରୁରୀ ଅଟେ । ତାହା କଲେ ଆମର ଜୀବନ ଦ୍ଵାରା ପ୍ରଭୁଙ୍କ ବାକ୍ୟର ବୃଦ୍ଧି ହେବ ଏବଂ ଆମ ଜୀବନର ସାକ୍ଷ୍ୟ ଓ ବାକ୍ୟ ଅନେକଙ୍କ ଜୀବନରେ ବିଜୟର ଆନନ୍ଦ ଆଣିଦେବ ।