ସୁସମାଚାରର କାର୍ଯ୍ୟ
ପ୍ରେରିତ ୧୮:୧୭-୨୮
ଆଜିର ଚିନ୍ତା
ଅନ୍ୟମାନଙ୍କୁ ସୁସମାଚାର ଦେବାକୁ ମୁଁ ପଛଘୁଞ୍ଚା ଦେଉଛି କି ?
ଆକ୍ଵିଲା ଓ ପ୍ରୀସ୍କିଲାଙ୍କୁ ସଙ୍ଗରେ ନେଇ ପାଉଲ ଏଫୀସକୁ ଗଲେ । ସେଠାରେ ସେମାନଙ୍କୁ ଛାଡ଼ି ଦେଇ ସେ ସମାଜ ଗୃହରେ ଯିହୁଦୀମାନଙ୍କୁ ଉପଦେଶ ଦେବା ପରେ ଏଫୀସରୁ ବିଦାୟ ନେଲେ । ଏହିଠାରେ ତାଙ୍କର ଦ୍ଵିତୀୟ ମିଶନାରୀ ଯାତ୍ରା ଶେଷ ହେଲା ଏବଂ ତୃତୀୟ ମିଶନାରୀ ଯାତ୍ରା ଆରମ୍ଭ ହେଲା ।
ଆତ୍ମିକ ସମ୍ପର୍କ :
ବିଶ୍ବାସୀମାନଙ୍କ ପ୍ରତି କର୍ତ୍ତବ୍ୟ କରିବାରେ ସେ ଖୁବ୍ ଉଦଯୋଗୀ ଥିଲେ । ତେଣୁ ସେମାନଙ୍କ ସହିତ ସମ୍ପର୍କ ରଖି ସେମାନଙ୍କୁ ଉପଦେଶ ଓ ଶିକ୍ଷା ଦେବା ସହିତ ସାନ୍ତ୍ଵନା, ପ୍ରେରଣା ଓ ଉତ୍ସାହ ଦେବାକୁ ପାଉଲ ଚେଷ୍ଟା କରୁଥିଲେ । ନାନା ପ୍ରକାର ଅସୁବିଧା ସତ୍ତ୍ୱେ ସେ ଯାତ୍ରା ପଥରେ ସେମାନଙ୍କୁ ଭେଟି, ସେମାନଙ୍କ ସହିତ ସହଭାଗିତା କରିବା ନିମନ୍ତେ କେତେଗୁଡ଼ିଏ ମଣ୍ଡଳୀକୁ ଯାଇଥିଲେ । ତାହା ସେମାନଙ୍କୁ ପ୍ରଭୂରେ ସ୍ଥିର ରହି ବୃଦ୍ଧି ପାଇବାକୁ ସାହାଯ୍ୟ କରୁଥିଲା । ବିଶ୍ବାସୀମାନେ ପରସ୍ପର ସହିତ ସହଭାଗିତା କରିବା ଅତି ଜରୁରୀ ଅଟେ । କାରଣ ଆତ୍ମିକ ଜୀବନର ଅଭିବୃଦ୍ଧି ସହାୟକ ଅଟେ ।
ଉପଯୁକ୍ତଶିକ୍ଷା :
ଆପଲ୍ଲ ଜଣେ ସୁବକ୍ତା ଓ ଧର୍ମ ଶାସ୍ତ୍ରରେ ନିପୁଣ ଥିଲେ । ସେ କେବଳ ଯୋହନଙ୍କ ବାପ୍ତିସ୍ମ ବିଷୟ ଜାଣିଥିଲେ । ତେଣୁ ପ୍ରୀସ୍କିଲା ଓ ଆକ୍ଵିଲା ତାଙ୍କୁ ସାଙ୍ଗରେ ରଖି ଅଧିକ ସୁକ୍ଷ୍ମ ରୂପେ ଯୀଶୁଙ୍କ ବିଷୟରେ ଶିକ୍ଷା ଦେଲେ । ତତ୍ପରେ ଆପଲ୍ଲ ଯିହୁଦୀମାନଙ୍କୁ, ଯୀଶୁ ଯେ ଖ୍ରୀଷ୍ଟ, ଏହାର ପ୍ରମାଣ ଦେଇ ଦୃଢ଼ ଭାବରେ ଶିକ୍ଷା ଦେବାକୁ ଲାଗିଲେ । ବାକ୍ୟର ଜ୍ଞାନରେ ଉପଯୁକ୍ତ ଭାବରେ ଶିକ୍ଷିତ ପୁଣି ଅନୁଭୂତି ପ୍ରାପ୍ତ ନ ହେଲେ ଆମେ ସଠିକ୍ ଭାବରେ, ପୁଣି ଦୃଢତାର ସହିତ ଅନ୍ୟମାନଙ୍କୁ ଯୀଶୁଙ୍କ ବିଷୟରେ କହିପାରିବା ନାହିଁ ।
ଫଳାଫଳ :
ସୁସମାଚାର ପ୍ରଚାର ଏକ ନିକୃଷ୍ଟ ଅଥବା କଷ୍ଟକର କାର୍ଯ୍ୟ ନୁହେଁ । ଏହା ଅନ୍ୟମାନଙ୍କ ଜୀବନରେ ବିଜୟର ଆନନ୍ଦ ଆଣିଦିଏ । ଏତଦ୍ଵାରା ଆକ୍ଵିଲା ଓ ପ୍ରୀସ୍କିଲା ଏବଂ ଆପଲ୍ଲଙ୍କ ପରି ଉଦଯୋଗୀ ଓ ପ୍ରଭାବଶାଳୀ ନେତାମାନଙ୍କୁ ପ୍ରସ୍ତୁତ କରାଯାଇପାରେ । ପ୍ରଭୁ ବିଶ୍ବାସୀକୁ ବ୍ୟବହାର କରି ଅନ୍ୟମାନଙ୍କ ଜୀବନରେ ବିଜୟର ଆନନ୍ଦ ଆଣି ଦିଅନ୍ତି । ତେଣୁ ଆମେ ବିପରୀତ ଭାବରେ ଚିନ୍ତା କରି ଭୟଭୀତ ହେବା ଅନୁଚିତ୍ ।