ଉଦ୍ଧାରକର୍ତ୍ତା ପରମେଶ୍ୱର
ଆଜିର ଚିନ୍ତା
୧ ଶାମୁୟେଲ ୧୧:୧-୧୫
ବିପଦରୁ ଉଦ୍ଧାର ପାଇଁ ମୁଁ ଈଶ୍ୱରଙ୍କ ନିକଟରେ ପ୍ରାର୍ଥନା କରେ କି ?
ଈଶ୍ଵର ଫାରୋଙ୍କ ହସ୍ତରୁ ଇସ୍ରାଏଲୀୟମାନଙ୍କୁ ରକ୍ଷା କଲା ପରି ଆମ୍ମୋନୀୟ ନାହଶ ହସ୍ତରୁ ଯାବେଶର ସମସ୍ତ ଲୋକଙ୍କୁ ରକ୍ଷା କରିବା ଲାଗି ଶାଉଲଙ୍କୁ ମୋନୋନୀତ ଓ ଶକ୍ତିଯୁକ୍ତ କରିଥିଲେ ।
ଶତ୍ରୁର ଭୟ :
ଆମ୍ମୋନୀୟ ନାହଶ ଯାବେଶର ସମସ୍ତ ଲୋକଙ୍କର ଦକ୍ଷିଣ ଚକ୍ଷୁ ଉପାଡ଼ି ଦିଆଯିବାର ଭୟ ଦେଖାଇଥିଲା ଏବଂ ତା' ପରେ ସେମାନଙ୍କ ସହ ନିୟମ ସ୍ଥିର କରିବା ବୋଲି କହିଥିଲା । ଯାବେଶର ପ୍ରାଚୀନମାନେ ସାତଦିନ ସମୟ ମାଗିଥିଲେ । ଏହି ସମୟ ସୀମା ଭିତରେ କେହି ସେମାନଙ୍କୁ ଉଦ୍ଧାର ନ କଲେ ସେମାନେ ନାହଶର ବଶୀଭୂତ ହେବେ । ଶତ୍ରୁର ଭୟ ଯୋଗୁ ସମସ୍ତ ଲୋକ ରବ ଉଠାଇ କ୍ରନ୍ଦନ କଲେ । ସେମାନେ ଭାବିଥିଲେ ଯେ ସେମାନଙ୍କୁ ଉଦ୍ଧାର କରିବାକୁ ହୁଏତ କେହି ନାହିଁ । ମାତ୍ର ଈଶ୍ଵର ଶାଉଲଙ୍କ ଅନ୍ତରରେ କଥା କହିଲେ । କି ଉପାୟରେ ଇସ୍ରାଏଲକୁ ଉଦ୍ଧାର କରାଯିବ ସେହି ବୁଦ୍ଧି ପ୍ରଦାନ କଲେ । ଏକତା ହିଁ ବଳ । ଇସ୍ରାଏଲ ସନ୍ତାନଗଣକୁ ଏକଜୁଟ କରିବା ପାଇଁ ଶାଉଲ ବଳଦର ଖଣ୍ଡ ଖଣ୍ଡ ମାଂସ ଇସ୍ରାଏଲର ସର୍ବତ୍ର ପଠାଇଲେ ଏବଂ ତାଙ୍କର ଓ ଶାମୁୟେଲଙ୍କର ପଶ୍ଚାଦଗମନ କରିବାକୁ କହିଲେ । ଆମେ ଯେତେବେଳେ ଖ୍ରୀଷ୍ଟୀୟ ସହଭାଗିତାରୁ ଦୂରେଇ ଏକାକୀ ଜୀବନ କାଟୁ, ଶୟତାନ ଆମକୁ ପରୀକ୍ଷା ଓ ପ୍ରଲୋଭନରେ ପକାଇଥାଏ । ମାତ୍ର ଯେତେବେଳେ ସହଭାଗିତାର ଜୀବନ କାଟୁ, ଶୟତାନ ସହଜରେ ଆମକୁ ତା' ର ଦାସ କରିପାରେନା ।
ଶତ୍ରୁ ହସ୍ତରୁ ଉଦ୍ଧାର :
ଶାଉଲ ଇସ୍ରାଏଲ ଲୋକଙ୍କୁ ତିନୋଟି ଦଳରେ ବିଭକ୍ତ କରି ଆମ୍ମୋନୀୟମାନଙ୍କୁ ସଂହାର କଲେ ଓ ଅନେକ ଛିନ୍ନ ଭିନ୍ନ ହେଲେ । ଶତ୍ରୁ ହସ୍ତରୁ ଉଦ୍ଧାର ପାଇ ଇସ୍ରାଏଲ ସନ୍ତାନଗଣ ହୃଦୟଙ୍ଗମ କରିଥିଲେ ଯେ ଶାଉଲ ହିଁ ରାଜା ହେବାକୁ ଏକମାତ୍ର ଯୋଗ୍ୟ ବ୍ୟକ୍ତି ଅଟନ୍ତି । ସେମାନେ ଶାଉଲଙ୍କ ବିରୁଦ୍ଧରେ କଥା କହୁଥିବା ବ୍ୟକ୍ତିମାନଙ୍କୁ ବଧ କରିବାକୁ ଚାହିଁଲେ । ମାତ୍ର ଶାଉଲ ମନା କରିଥିଲେ । ସେମାନେ ଶାମୁୟେଲଙ୍କ ସହ ଗିଲ୍ ଗଲ୍ କୁ ଯାଇ ଶାଉଲଙ୍କୁ ରାଜା କରିଥିଲେ ।
ଆମକୁ ମଧ୍ୟ ଶତ୍ରୁ ଶୟତାନ ହସ୍ତରୁ ରକ୍ଷା ପାଇବା ପାଇଁ ବ୍ୟକ୍ତିଗତ, ପାରିବାରିକ ଓ ମାଣ୍ଡଳୀକ ଜୀବନରେ ରବ ଉଠାଇ ପ୍ରଭୁଯୀଶୁଙ୍କ ନିକଟରେ କ୍ରନ୍ଦନ କରିବାକୁ ପଡ଼ିବ । ଶାସ୍ତ୍ରରେ ଲେଖାଯାଏ, ତୁମ୍ଭ ଚକ୍ଷୁର ତାରା ଶାନ୍ତ ନ ହେଉ…….ପ୍ରଭୁଙ୍କ ସମ୍ମୁଖରେ ତୁମ୍ଭର ହୃଦୟ ଜଳ ପରି ଢାଳି ଦିଅ (ବିଳାପ ୨:୧୮) ।