ଈଶ୍ୱରଙ୍କ ଯୋଜନା

 ଈଶ୍ୱରଙ୍କ ଯୋଜନା 

ଆଜିର ଚିନ୍ତା

୧ ଶାମୁୟେଲ ୧୦:୧-୧୬

ଖ୍ରୀଷ୍ଟଙ୍କୁ ଗ୍ରହଣ କରି ମୁଁ ପରିବର୍ତ୍ତିତ ଜୀବନ କାଟୁଛି କି ? 

ଏକଦା ଖ୍ରୀଷ୍ଟଙ୍କୁ ପ୍ରଭୁ ବୋଲି ବିଶ୍ୱାସ କରୁ ନ ଥିବା ଯୁବା ଝିଅଟି ଖ୍ରୀଷ୍ଟ ବିଶ୍ବାସୀମାନଙ୍କୁ ନାନା କଟୁ କଥା କହୁଥିଲା । ସମୟାନୁକ୍ରମେ ସେ ଖୁବ୍ ଅସୁସ୍ଥ ହୋଇ ମୃତ୍ୟୁର ସମ୍ମୁଖୀନ ହେଲା । ମାତ୍ର ସେ ବଞ୍ଚିବାକୁ ଚାହୁଥିଲା । ସେ ସମୟରେ ତାର ଖ୍ରୀଷ୍ଟ ବିଶ୍ବାସୀ ମା' ଯୀଶୁଙ୍କଠାରେ ତାର ସୁସ୍ଥତା ପାଇଁ ପ୍ରାର୍ଥନା କଲେ ଏବଂ ତାକୁ ମଧ୍ୟ ବିଶ୍ଵାସ ସହ ପ୍ରାର୍ଥନା କରିବାକୁ କହିଲେ । ସେ ସୁସ୍ଥ ହେଲା । ତା' ଜୀବନ ସଂପୂର୍ଣ୍ଣ ପରିବର୍ତ୍ତିତ ହେଲା । 

ଈଶ୍ୱରଙ୍କ ଯୋଜନାକୁ ବୁଝିବା :

ସଦାପ୍ରଭୁଙ୍କ ଦ୍ଵାରା ଚାଳନା ପାଇ ଶାମୁୟେଲ ଶାଉଲଙ୍କୁ ତୈଳରେ ଅଭିଷିକ୍ତ କରିଥିଲେ । ତଥାପି ଶାଉଲ ସେହି ଦାୟିତ୍ବ ଗ୍ରହଣ କରିବା ପାଇଁ ପ୍ରସ୍ତୁତ ନ ଥିଲେ । ଶାମୁୟେଲ ତାଙ୍କୁ କେତୋଟି ଚିହ୍ନ ଦେଇଥିଲେ । ସେସବୁ ସଫଳ ହେଲା ପରେ ଯେପରି ଅନୁଭବ କରିବେ ଯେ ଈଶ୍ୱରଙ୍କ ଯୋଜନାନୁସାରେ ସେ ଇସ୍ରାଏଲର ରାଜା ହେବା ପାଇଁ ଯୋଗ୍ୟ ବିବେଚିତ ହୋଇଛନ୍ତି । ଶାମୁୟେଲଙ୍କ କହିବାନୁସାରେ ସମସ୍ତ ଚିହ୍ନ ଗୁଡ଼ିକ ଘଟିଥିଲା । ଗଧ ମିଲିଯିବାର ସମ୍ବାଦ ପାଇବା ସଙ୍ଗେ ସଙ୍ଗେ ନେବଲ, ଦାରା, ବଂଶୀ ଓ ବୀଣା ନେଇ ଆସୁଥିବା ସେ ଭବିଷ୍ୟତବକ୍ତାଙ୍କର ଏକ ଦଳକୁ ସାକ୍ଷାତ କରି ଜାଣିପାରିଲେ ଯେ ସଦାପ୍ରଭୁଙ୍କ ଉପସ୍ଥିତି ତାଙ୍କ ସହିତ ରହିଛି ଓ ତାଙ୍କ ପାଇଁ ଏକ ଭିନ୍ନ ଯୋଜନା ରହିଛି  । 

ଈଶ୍ବରଙ୍କ ଯୋଜନାକୁ ଗ୍ରହଣ କରିବା : 

ସଦାପ୍ରଭୁଙ୍କ ଦତ୍ତ ଚିହ୍ନ ଦ୍ଵାରା ଶାଉଲ ଈଶ୍ୱରଙ୍କ ଯୋଜନାକୁ କେବଳ ବୁଝିପାରିଲେ ତାହା ନୁହେଁ ମାତ୍ର ରାଜା ହେବା ପାଇଁ ନିଜକୁ ପ୍ରସ୍ତୁତ କଲେ । ସେ ମଧ୍ୟ ଭବିଷ୍ୟତବକ୍ତା ପାଲଟି ଯାଇଥିଲେ । ଏହା ତାଙ୍କୁ ଜାଣିଥିବା ସମସ୍ତକୁ ଆଚମ୍ବିତ କରିଥିଲା । ଭବିଷ୍ୟତ୍ ବାକ୍ୟ ପ୍ରଚାର କରିବା ପରେ ଉଚ୍ଚସ୍ଥଳୀକୁ ଯାଇଥିଲେ । ସେଠାରେ  ସେ ଏବଂ ତାଙ୍କ ଯୁବା ସଙ୍ଗୀ ତାଙ୍କ ପିତୃବ୍ୟଙ୍କୁ ଭେଟିଥିଲେ । ତାଙ୍କର ପିତୃବ୍ୟତାଙ୍କୁ ପଚାରିଥିବା ପ୍ରଶ୍ନର ଉତ୍ତର ଦେଇଥିଲେ, ମାତ୍ର ଶାମୁୟେଲ ଇସ୍ରାଏଲର ରାଜତ୍ୱ ବିଷୟରେ ତାଙ୍କୁ କହିଥିବା ବିଷୟକୁ ସେ ଗୁପ୍ତ ରଖିଥିଲେ । ହୁଏତ ଈଶ୍ବର ଏହି ବୁଦ୍ଧି ତାଙ୍କୁ ପ୍ରଦାନ କରିଥିଲେ । କାରଣ ଈଶ୍ବର ମୋଶାଙ୍କୁ କହିଥିଲେ, ଯାହା ଉପରେ ଆମ୍ଭର ଦୟା ଅଛି, ତାହାକୁ ଆମ୍ଭେ ଦୟା କରିବା, ଆଉ ଯାହା ଉପରେ ଆମ୍ଭର କୃପା ଅଛି, ତାହାକୁ କୃପା କରିବା । ଅତଏବ ନିଜ ଜୀବନରେ ଈଶ୍ବରଙ୍କ ଯୋଜନାକୁ ବୁଝି ଗ୍ରହଣ କରି ତାହାଙ୍କର ଗୌରବର କାରଣ ହେବା ।