ଈଶ୍ୱରଙ୍କ ଆହ୍ଵାନ
ଆଜିର ଚିନ୍ତା ୧ ଶାମୁ ୩:୧-୨୧
ଆମେ କଣ ଈଶ୍ୱରଙ୍କ ଆହ୍ୱାନର ଯୋଗ୍ୟ ଆଚରଣ କରୁଛୁ ?
ସାଧୁ ସୁନ୍ଦର ସିଂ ଜଣେ ନୈଷ୍ଠିକ ଶିଖ୍ ଯୁବକ ଥିଲେ । ଯୁବା ଅବସ୍ଥାରେ ସେ ବାଇବଲକୁ ପୋଡ଼ି ପକାଇଲେ । କିନ୍ତୁ ସେ ଯେତେବେଳେ ସତ୍ୟ ଈଶ୍ଵର କିଏ, ଏହା ଜାଣିବାକୁ ଚାହିଁଲେ, ରାତ୍ର ସମୟରେ ପ୍ରଭୁ ଯୀଶୁ ନିଜେ ତାଙ୍କୁ ଦର୍ଶନ ଦେଲେ । ତାଙ୍କ ନାମ ଧରି ଡ଼ାକିଲେ । ସେ ଯୀଶୁଙ୍କର ପରିଚୟ ପାଇଲେ । ଭାରତ ଓ ତିବ୍ଦତ୍ ରେ ଜଣେ ଶକ୍ତିଶାଳୀ ମିଶନାରୀ ରୂପେ କାର୍ଯ୍ୟ କଲେ ।
ଏଲି ଯାଜକଙ୍କ ସମୟରେ ଈଶ୍ଵର କାହାରିକୁ ଏପରି ପ୍ରକାଶ୍ୟ ଦର୍ଶନ ଦ୍ଵାରା କଥା କହି ନ ଥିଲେ । କୌଣସି ଭାବବାଦୀ ମଧ୍ୟ ନ ଥିଲେ । ସାନ ବାଳକ ଶାମୁୟେଲଙ୍କୁ ସଦାପ୍ରଭୁ ଡ଼ାକିଲେ ଏବଂ ତାଙ୍କ ସହ କଥା ହେଲେ । ଶାମୁୟେଲଙ୍କ ଜୀବନରେ କ'ଣ ସ୍ଵତନ୍ତ୍ରତା ଥିଲା, ତାହା ଦେଖିବା ।
ସେବାର ଜୀବନ (୧୦ପଦ) :
ଶାମୁୟେଲଙ୍କ ମା ହାନ୍ନା ତାଙ୍କୁ ଈଶ୍ୱରଙ୍କ ପାଇଁ ଉତ୍ସର୍ଗ କରିଥିଲେ । ଅତି ଛୋଟବେଳୁ ତାଙ୍କୁ ଈଶ୍ୱରଙ୍କ ସେବାକାର୍ଯ୍ୟ ପାଇଁ ମନ୍ଦିରରେ ଛାଡ଼ି ଦେଇଥିଲେ । ଶାମୁୟେଲ ମନ୍ଦିର ମଧ୍ୟରେ ରହି ବିଶ୍ଵସ୍ତ ସେବକ ଭାବେ ସେବାକାର୍ଯ୍ୟ କରୁଥିଲେ । ଆମ ଜୀବନକୁ ଉସର୍ଗୀକୃତ ସେବକଭାବେ ପ୍ରଭୁଙ୍କ ସେବାରେ ଲଗାଉଅଛୁ କି ?
ଜାଗ୍ରତ ଜୀବନ (୩ପଦ) :
ରାତ୍ରି କାଳରେ ସମସ୍ତେ ଶୋଇଯିବା ପରେ ଈଶ୍ଵର ଶାମୁୟେଲଙ୍କୁ ଡ଼ାକିଲେ । ସାନ ଶାମୁୟେଲ ଜାଣି ନ ଥିଲେ ଯେ କିଏ ତାଙ୍କୁ ଡାକୁଛନ୍ତି । ତଥାପି ସେ ତାଙ୍କ ଡାକ ଶୁଣିବା ମାତ୍ରେ ଉଠିଥିଲେ । ଯେତେଥର ପ୍ରଭୁ ତାଙ୍କୁ ଡାକିଛନ୍ତି, ସେତେଥର ସେ ତତକ୍ଷଣାତ୍ ଉଠିଛନ୍ତି ଓ ପ୍ରତ୍ୟୁତ୍ତର ଦେଇଛନ୍ତୁ, ମୁଁ ଏଠାରେ ଅଛି । ଆମ କଣ ଆଜି ପ୍ରଭୁଙ୍କ ରବ ପ୍ରତି ଜାଗ୍ରତ ଓ ମନୋଯୋଗୀ ହୋଇଛୁ ?
ନମ୍ରତାର ଜୀବନ (୧୦ପଦ):
ଚତୁର୍ଥ ଥର ଡାକରେ ସେ ଅତି ସରଳ ଓ ନମ୍ର ଭାବରେ ଉତ୍ତର ଦେଲେ, କୁହନ୍ତୁ ଆପଣଙ୍କ ଦାସ ଶୁଣୁଅଛି । ସେ ନମ୍ରଭାବେ ଈଶ୍ୱରଙ୍କ ସାନ୍ନିଧ୍ୟକୁ ଆସିଲେ ଓ ତାଙ୍କ ରବ ଶୁଣିଲେ । ଆମେ ଆଜି ଈଶ୍ୱରଙ୍କ ସମ୍ମୁଖରେ ଓ ମନୁଷ୍ୟମାନଙ୍କ ମଧ୍ୟରେ ନମ୍ରତାର ଜୀବନ କରୁଛୁ କି ? ନମ୍ର ଲୋକେ ଧନ୍ୟ କାରଣ ସେମାନେ ପ୍ରଥିବୀର ଅଧିକାର ହେବେ (ମାଥିଉ ୫:୫) ।