ଈଶ୍ୱରଙ୍କ ବିରୁଦ୍ଧରେ ପାପ

 ଈଶ୍ୱରଙ୍କ ବିରୁଦ୍ଧରେ ପାପ

ଆଜିର ଚିନ୍ତା

୧ ଶାମୁୟେଲ ୨:୧୨-୨୬

ଆମେ ଈଶ୍ୱରଙ୍କ ବିରୁଦ୍ଧରେ ପାପ କରି ତାଙ୍କ ଦୃଷ୍ଟିରେ ଅଗ୍ରାହ୍ୟ ହୋଉଛୁ କି ? 

ଈଶ୍ୱରଙ୍କ ସେବା ନିମନ୍ତେ ମନୋନୀତ ଯାଜକମାନେ ସ୍ୱତନ୍ତ୍ର ଥିଲେ । ସେମାନେ ସଦାସର୍ବଦା ନମ୍ର ଓ ପବିତ୍ର ଜୀବନ କାଟୁଥିଲେ । ଏଲି ଯାଜକଙ୍କ ବୃଦ୍ଧା ଅବସ୍ଥାରେ ତାଙ୍କର ଦୁଇ ପୁଅ ହଫନି ଓ ପୀନହସ୍ ଙ୍କ ଉପରେ ଯାଜକ ଭାର ଅର୍ପିତ ହୋଇଥିଲା । କିନ୍ତୁ ସେମାନେ ଈଶ୍ୱରଙ୍କ ଦୃଷ୍ଟିରେ ଅଗ୍ରାହ୍ୟ ହେଲେ । ଏହାର କାରଣ କ'ଣ ? 

ସେମାନେ ପାପାଧମ ସନ୍ତାନ ଥିଲେ (୧୨ପଦ) :

ସେମାନେ ଅତ୍ୟାଚାରୀ ଓ ବ୍ୟଭିଚାରୀ ଥିଲେ । ସେମାନେ ସମାଗମତମ୍ବୁ ମଧ୍ୟରେ ସେବାକାରୀଣୀ ସ୍ତ୍ରୀ ଲୋକମାନଙ୍କ ସହିତ ମନ୍ଦ କାର୍ଯ୍ୟ କଲେ । ବ୍ୟଭିଚାରୀମାନଙ୍କର ଈଶ୍ୱରଙ୍କ ରାଜ୍ୟରେ ପ୍ରବେଶ କରିବାର ଅଧିକାର ନାହିଁ (ପ୍ରକାଶିତ ୨୨:୧୫) । ଏହି ପାପ ଈଶ୍ୱରଙ୍କ ପବିତ୍ର ମନ୍ଦିରକୁ ଅଶୁଚି କରିବା ସହ ସମାନ (୧କର ୬:୧୮,୧୯ ଓ ଏବ୍ରୀ ୧୩:୪) । 

ସେମାନେ ସଦାପ୍ରଭୁଙ୍କୁ ଜାଣିଲେ ନାହିଁ(୧୨) :

ସେମାନେ ସଦାପ୍ରଭୁଙ୍କୁ ସ୍ଵୀକାର କଲେ ନାହିଁ କି ମାନ୍ୟ କଲେ ନାହିଁ । ତୀତସ ୧:୧୬ରେ ଲେଖାଯାଏ, ସେମାନେ ଈଶ୍ୱରଙ୍କୁ ଜାଣନ୍ତି ବୋଲି ସ୍ଵୀକାର କରନ୍ତି, କିନ୍ତୁ କାର୍ଯ୍ୟ ଦ୍ଵାରା ଈଶ୍ୱରଙ୍କୁ ଅସ୍ବୀକାର କରୁଥିଲେ । ରାଜା ଦାଉଦ ତାଙ୍କ ପୁଅ ଶଲୋମନ୍ ଙ୍କୁ ଦେଇଥିବା ଶେଷ ଉପଦେଶରେ କହନ୍ତି, ତୁମ୍ଭେ ଆପଣା ପିତାର ପରମେଶ୍ୱରଙ୍କୁ ଜ୍ଞାତ ହୁଅ (୧ମ ବଂଶା ୨୮:୯) । ଈଶ୍ୱରଙ୍କୁ ଓ ଖ୍ରୀଷ୍ଟ ଯୀଶୁଙ୍କୁ ଜାଣିବା ଅନନ୍ତ ଜୀବନ ଅଟେ (ଯୋହନ ୧୭:୩) । 

ସେମାନେ ସଦାପ୍ରଭୁଙ୍କ  ନୈବେଦ୍ୟ ତୁଚ୍ଛ ଜ୍ଞାନ କଲେ (୧୭ପଦ) : 

ପବିତ୍ର ନୈବେଦ୍ୟକୁ ତୁଚ୍ଛ ଜ୍ଞାନ କରିବା ଏକ ପାପ ଅଟେ । ପବିତ୍ର ପ୍ରଭୁଭୋଜ ସେହିପରି ଏକ ବିଧି, ଯେ କେହି ଅଯୋଗ୍ୟ ଭାବେ ଏହାକୁ ଗ୍ରହଣ କରେ, ସେ ପ୍ରଭୁଙ୍କ ଶରୀରର ଓ ରକ୍ତର ଦାୟୀ ହେବ (୧କର ୧୧:୨୭ ଓ ୩୦)  ।

ସେମାନେ ଈଶ୍ୱରଙ୍କ ଲୋକମାନଙ୍କୁ ଆଜ୍ଞାଲଂଘନ କରାଉ ଥିଲେ(୨୪ପଦ) : 

ଭ୍ରାନ୍ତ ଶିକ୍ଷା ଦେବା ଓ ଅନ୍ୟମାନଙ୍କୁ ଈଶ୍ୱରଙ୍କଠାରୁ ବିପଥ ଗାମୀ କରାଇବା ପାପ ଅଟେ । ରାଜା ମନଃଶୀ ଯିହୁଦା ବଂଶକୁ ବିପଥଗାମୀ କରାଇ ପାପ କରିଥିଲେ (୨ବଂଶା ୩୩:୬-୯) ।