ଆରାଧନା ଓ ବଳିଦାନ

ଆରାଧନା ଓ ବଳିଦାନ

ଆଜିର ଚିନ୍ତା

୧ଶାମୁୟେଲ ୧:୧-୨୦

ଈଶ୍ୱରଙ୍କ ମଙ୍ଗଳଦାନ ସବୁକୁ ସ୍ମରଣ କରି ଆମେ ତାଙ୍କର ଆରାଧନା କରୁଛୁ କି ?

ଇସ୍ରାଏଲ ଲୋକମାନେ ବର୍ଷକୁ ପ୍ରାୟ ତିନିଥର ସେମାନଙ୍କ ଉପାସନାର ପୀଠକୁ ଯାଉଥିଲେ । ବିଚାରକର୍ତ୍ତା ମାନଙ୍କର ଶାସନ ସମୟରେ ସେମାନେ ଶିଲୋରେ ବଳିଦାନ ଉତ୍ସର୍ଗ କରୁଥିଲେ । ଯାଜକ ଏଲୀ ଓ ତାଙ୍କର ଦୁଇପୁତ୍ର ହଫନି ଓ ପୀନହସ ସେଠାରେ ଯାଜକୀୟ ସେବାକାର୍ଯ୍ୟ କରୁଥିଲେ ।  

ଆରାଧନା :

ଇସ୍ରାଏଲ ଗୋଷ୍ଠୀ ପତ୍ର କୁଟୀର ପର୍ବ ସମୟରେ ଈଶ୍ୱରଙ୍କୁ ଧନ୍ୟବାଦ ଦେବା ନିମନ୍ତେ ଏକତ୍ର ହେଉଥିଲେ । ଇଲକାନା ତାଙ୍କ ପରିବାର ସହ ଏହି ସମୟରେ ଶୀଲୋକୁ ଯାଇଥିଲେ । ଭକ୍ତ ଦାଉଦ କହନ୍ତି, ହେ ପ୍ରଭୁ, ମୋ ଓଷ୍ଠାଧର ଫିଟାଅ ତହିଁରେ ମୋ' ମୁଖ ତୁମ୍ଭର ପ୍ରଶଂସା କରିବ (ଗୀତ ୫୧:୧୫) । ଈଶ୍ୱରଙ୍କ ପ୍ରଶଂସା କରିବାକୁ ଏକ ବଳୀ ଭାବରେ ଗ୍ରହଣ କରାଯାଏ (ଏବ୍ରୀ ୧୩:୫) । ଏହା ତାଙ୍କ ନାମ ସ୍ଵୀକାରକାରୀ ଓଷ୍ଠାଧରର ଫଳ ଅଟେ । ଈଶ୍ଵର ମହାନ୍, ପବିତ୍ର, ଆଶ୍ଚର୍ଯ୍ୟ କର୍ମକାରୀ, ମଙ୍ଗଳଦାନକାରୀ, ରୋଗସୁସ୍ଥକାରୀ, ପରିତ୍ରାଣ ପ୍ରଦାନକାରୀ, ଦୟାବାନ, କରୁଣାମୟ ଇତ୍ୟାଦି ଅନ୍ୟ ନାମରେ ବାଇବଲ ରେ ପରିଚିତ ଅଟନ୍ତି । ତାହାଙ୍କ ନାମ ସହ ଅନ୍ୟ କୌଣସି ନାମ ତୁଳନୀୟ ନୁହେଁ । ତାହାଙ୍କ କାର୍ଯ୍ୟ ଅନନ୍ୟ (ଗୀତ ୧୦୪:୨୪) । ଆମ ପରିବାର ଈଶ୍ୱରଙ୍କ ମଙ୍ଗଳଦାନକୁ ସ୍ମରଣ କରି ତାଙ୍କର ଆରାଧନା କରୁଛୁ କି ? 

ବଳିଦାନ :

ଈଶ୍ୱରଙ୍କୁ ପ୍ରଦତ୍ତ ଉପହାର ବଳିଦାନ ଅଟେ ଭଗ୍ନଆତ୍ମା ଈଶ୍ୱରଙ୍କ ଗ୍ରାହ୍ୟବଳୀ (ଗୀତ ୫୧:୧୭) । ସେଦିନ  ହାନ୍ନାଙ୍କ ଉତ୍ସର୍ଗୀକୃତ ବଳିଦାନ ଯଥାର୍ଥ ଥିଲା । ସେ ତିକ୍ତ ମନା ଓ ବେଦନାଗ୍ରସ୍ତ ହୋଇ ରୋଦନ କରୁଥିଲେ । ଆପଣା ପ୍ରାଣର ବେଦନା ଢାଳିଥିଲେ । ପ୍ରଭୁ ଯୀଶୁ କ୍ରୁଶ  ବହି କଳବାରୀ କୁ ଯିବା ବାଟରେ  କହିଥିଲେ, ହେ ଯିରୁଶାଲମର କନ୍ୟାଗଣ ଆପଣା ଆପଣା ସନ୍ତାନ ମାନଙ୍କ ନିମନ୍ତେ ରୋଦନ କର । ଆମେ ଆମ ପରିବାରର ମୁକ୍ତି ପାଇଁ ଈଶ୍ୱରଙ୍କ ନିକଟରେ ଡାକ ପକାଉଛୁ ତ ?