ଅଳ୍ପ ମନୋନୀତ
ଆଜିର ଚିନ୍ତା
ପ୍ରେରିତ ୧୩:୪୨-୫୨
ମୁଁ କ'ଣ ସ୍ୱର୍ଗରାଜ୍ୟର ସ୍ଥାନ ପାଇବା ପାଇଁ ଯୋଗ୍ୟ?
ଈଶ୍ୱରଙ୍କ ବାକ୍ୟ ପ୍ରଚାରିତ ହୋଇ ଆସୁଅଛି; ଯେଉଁମାନେ ମନୋନୀତ, ସେହି ଅଳ୍ପସଂଖ୍ୟକ ହିଁ ଅନୁଗ୍ରହରେ ବିଶ୍ଵାସରେ ସ୍ଥିର ରୁହନ୍ତି ଓ ଈଶ୍ୱରଙ୍କ ରାଜ୍ୟରେ ସ୍ଥାନ ସୁରକ୍ଷିତ କରନ୍ତି ।
ସୁସମାଚାର ଶୁଣିବାକୁ ଆଗ୍ରହ :
ପାଉଲ ଓ ବର୍ଣ୍ଣବବାଙ୍କ ଶକ୍ତିଯୁକ୍ତ ଶିକ୍ଷା ଶୁଣି ଲୋକେ ଅନେକ ସଂଖ୍ୟାରେ ବିଶ୍ଵାସ କଲେ ଓ ପୁନର୍ବାର ତାହା ଶୁଣିବାକୁ ପ୍ରବଳ ଆଗ୍ରହରେ ବିନତି କଲେ । ଆମେ ଦେଖିପାରୁ ଯେ ଯିହୁଦୀମାନଙ୍କ ଅପେକ୍ଷା ଯିହୁଦୀ ମତବଲମ୍ବୀ ବିଜାତିମାନେ ସୁସମାଚାର ଶୁଣିବାକୁ ଅଧିକ ଆଗ୍ରହ ପ୍ରକାଶ କଲେ । ଯିହୁଦୀମାନଙ୍କର ଅନାଗ୍ରହ ଓ ବିଜାତିମାନଙ୍କର ସୁସମାଚାର ପ୍ରତି ଆଗ୍ରହ ଦେଖି ଏହା କୁହାଯାଇପାରେ ଯେ ଅନେକ ଯେଉଁମାନେ ଆପଣାକୁ ପ୍ରଥମ ବୋଲି ଭାବନ୍ତି, ସେମାନେ ଶେଷରେ ପଡ଼ିବେ ଓ ଶେଷରେ ଥିବା ଅନେକ ପ୍ରଥମ ହେବେ (ମାଥିଉ ୨୦:୧୬) ।
ଈର୍ଷାତୁର ଯିହୁଦୀ:
ପରବର୍ତ୍ତୀ ବିଶ୍ରାମବାରରେ ପ୍ରାୟ ସମସ୍ତ ନଗରବାସୀ ଈଶ୍ୱରଙ୍କ ବାକ୍ୟ ଶୁଣିବାକୁ ଏକାଠି ହେବା ଦେଖି ଯିହୁଦୀମାନେ ଈର୍ଷାନ୍ଵିତ ହେଲେ । ସେମାନେ ନିନ୍ଦା କଲେ, ପ୍ରତିବାଦ କଲେ, ପ୍ରଧାନ ଓ ସମ୍ଭ୍ରାନ୍ତ ଲୋକଙ୍କୁ ଉତ୍ତେଜିତ କଲେ, ସେମାନଙ୍କୁ ତଡ଼ି ଦେଲେ, ଉପରୋକ୍ତ ସମସ୍ତ ବିଷୟ ସୁସମାଚାର ପ୍ରଚାର କରିବାର ମୂଲ୍ୟ ଅଟେ । ଜଣେ ପ୍ରକୃତ ସୁସମାଚାର ପ୍ରଚାରକ ଏହି ସମସ୍ତ ମୂଲ୍ୟ ଦେବାକୁ ପ୍ରସ୍ତୁତ ଥାଏ ।
ଈଶ୍ୱରଙ୍କ କାର୍ଯ୍ୟ:
ଏହି ସମସ୍ତ ଘଟଣାର ପୃଷ୍ଠଭୂମିରେ କିନ୍ତୁ ଈଶ୍ଵର ତାଙ୍କ କାର୍ଯ୍ୟ କରୁଥିଲେ । କାରଣ ସେ କେବଳ ଯିହୁଦୀମାନଙ୍କର ନୁହନ୍ତି ବରଂ ବିଜାତିମାନଙ୍କର ମଧ୍ୟ ଈଶ୍ଵର ଅଟନ୍ତି (ରୋମୀ ୩:୨୯) । ଅଣଯିହୁଦୀମାନେ ଆନନ୍ଦରେ ସୁସମାଚାରକୁ ଗ୍ରହଣ କଲେ(୪୮ପଦ) । ସମୁଦାୟ ଅଞ୍ଚଳରେ ପ୍ରଭୁଙ୍କର ବାକ୍ୟ ବ୍ୟାପିଗଲା (୪୯ପଦ) । ଅଣଯିହୁଦୀମାନେ ଅନନ୍ତ ଜୀବନର ପ୍ରାପ୍ତିରେ ବିଶ୍ଵାସ କଲେ (୪୮ପଦ) । ଶିଷ୍ୟମାନେ ଆନନ୍ଦରେ ଓ ପବିତ୍ର ଆତ୍ମାରେ ପୂର୍ଣ୍ଣ ହେବାକୁ ଲାଗିଲେ (୫୨ପଦ) ।
ସୁସମାଚାର ଓ ଈଶ୍ୱରଙ୍କ ବାକ୍ୟ ପ୍ରଚାରରେ ଯେତେ ବାଧା ଆସିଲେ ହେଁ ପ୍ରଭୁ ତାଙ୍କର କାର୍ଯ୍ୟ ସାଧନ କରିବେ ଏବଂ ଯେଉଁ ଅଳ୍ପ ମନୋନୀତ ଅଛନ୍ତି, ସେମାନଙ୍କୁ ସେ ପରିତ୍ରାଣ ଦେବେ ।