ଅନନ୍ୟ ପରମେଶ୍ୱର
ଆଜିର ଚିନ୍ତା
ଯାତ୍ରା ୮:୧୬-୩୨
ଈଶ୍ଵରଙ୍କ ପ୍ରେମ, କାର୍ଯ୍ୟ ଓ ଗୁଣ କାହା ସହିତ ତୁଳନୀୟ ନୁହେଁ ।
ଈଶ୍ୱର ତାଙ୍କ ଲୋକମାନଙ୍କୁ ତାଙ୍କ ଉଦ୍ଦେଶ୍ୟରେ ବଳିଦାନ କରିବା ପାଇଁ ଛାଡ଼ି ଦେବାକୁ ବାରମ୍ବାର ଫାରୋଙ୍କୁ କହିଲେ ମଧ୍ୟ ସେଥିରେ ସେ ସମ୍ମତ ହୋଇନାହାନ୍ତି ।
ଅବଧ୍ୟତାର ଦଣ୍ଡ :
ଫାରୋଙ୍କ ହୃଦୟରେ ଯଦିଓ ସଦାପ୍ରଭୁ କଠିନତା ଦେଇଥିଲେ ତଥାପି ଫାରୋ ଈଶ୍ୱରଙ୍କ ଦଣ୍ଡ ପରେ ଦଣ୍ଡ ପ୍ରେରଣକୁ ଅତି ହାଲୁକା ଭାବରେ ଗ୍ରହଣ କରିଥିଲେ । ଉକୁଣିଆ ପୋକ ମିସରୀୟମାନଙ୍କ ଦୁଃଖର କାରଣ ହେଲା । ମିସରୀୟ ମନ୍ତ୍ରଜ୍ଞମାନେ ଜଳକୁ ରକ୍ତ କଲେ, ବେଙ୍ଗ ମଧ୍ୟ କଲେ ମାତ୍ର ଉକୁଣିଆ ପୋକ କରିପାରିଲେ ନାହିଁ । ସେତେବେଳେ ସେମାନେ ବୁଝିଲେ ଏହା କେବଳ ସେମାନଙ୍କ ପ୍ରତି ଈଶ୍ୱରଙ୍କ ଦଣ୍ଡ ଅଟେ ।
ଅପରିବର୍ତ୍ତନୀୟ ମନ :
ଈଶ୍ଵର ସର୍ବେସର୍ବା, ସର୍ବଶକ୍ତିମାନ, ସର୍ବ ବିଷୟ ତାଙ୍କର ନିୟନ୍ତ୍ରଣାଧୀନ, ତାଙ୍କ ତୁଲ୍ୟ କେହି ନାହିଁ । ଏହାର ଚାକ୍ଷୁସ ପ୍ରମାଣ ପାଇଲେ ମଧ୍ୟ, ମନ୍ତ୍ରଜ୍ଞମାନେ ଈଶ୍ୱରଙ୍କ ଶକ୍ତିକୁ ସ୍ଵୀକାର କଲେ ମଧ୍ୟ ଫାରୋ ଆପଣା ହୃଦୟକୁ ଆହୁରି କଠିନ କଲେ । ଏହାପରେ ସଦାପ୍ରଭୁ ଦଂଶକାଦିର ବୃହତ୍ ଝାଙ୍କ ପଠାଇଲେ । ତାହା ଦେଶର ବହୁତ କ୍ଷତି ଘଟାଇଲା । ଦଣ୍ଡ ପ୍ରବଳରୁ ପ୍ରବଳତର ହେବାକୁ ଲାଗିଲା । ଫାରୋ ତାହା ଅନୁଭବ କଲେ ମଧ୍ୟ ମନକୁ ପରିବର୍ତ୍ତନ କଲେ ନାହିଁ ।
ଅବିଶ୍ବାସର ମନ :
ଆମର ପରମେଶ୍ୱର ସତ୍ୟ ଓ ଜୀବତ, ତାଙ୍କର କର୍ମ ସକଳ ଆଶ୍ଚର୍ଯ୍ୟ ଓ ଅବର୍ଣ୍ଣନୀୟ, ସେ ଅସାଧ୍ୟ ସାଧନକାରୀ ପରମେଶ୍ୱର । ସେଦିନ ମିସରୀୟ ମନ୍ତ୍ରଜ୍ଞମାନେ ଏହା ବିଶ୍ଵାସ କଲେ କିନ୍ତୁ ଫାରୋଙ୍କ ବିଶ୍ଵାସ ଜନ୍ମିଲା ନାହିଁ ।
ଆଜି ମଧ୍ୟ ଈଶ୍ଵରଙ୍କର ଏହିପରି ଅନେକ ଆଶ୍ଚର୍ଯ୍ୟକର୍ମ ଓ ଘଟଣା ଦେଖିଲେ ମଧ୍ୟ ଅନେକଙ୍କ ହୃଦୟ ଆଜି କଠିନ ହୋଇ ରହିଛି । କଷ୍ଟ, ଦଣ୍ଡ ଆସିଲେ ମଧ୍ୟ ଆମେ ମନ ପରିବର୍ତ୍ତନ କରୁ ନାହୁ । ଆଜିର ଏ ମହାମାରୀ ସମୟରେ ପ୍ରଭୁ ପ୍ରତ୍ୟେକଙ୍କୁ ମନ ପରିବର୍ତ୍ତନର ଜୀବନ ପ୍ରଦାନ କରନ୍ତୁ ।