ଶକ୍ତଗ୍ରୀବ ଫାରୋ

 ଶକ୍ତଗ୍ରୀବ ଫାରୋ

ଆଜିର ଚିନ୍ତା

ଯାତ୍ରା ୭:୧୪-୮:୧୫

ଜଟିଳ ପରିସ୍ଥିତିରେ ମୁ ଈଶ୍ୱରଙ୍କ ଚାଳନା ବୁଝିବାକୁ ଚେଷ୍ଟା କରିଛି କି ?

ଅନେକ ସମୟରେ ଈଶ୍ୱରଙ୍କ ପ୍ରତିଜ୍ଞା ସାଙ୍ଗେ ସାଙ୍ଗେ ସଫଳ ହୋଇ ନ ଥାଏ । ସେଥିପାଇଁ ନିରାଶ ନ ହୋଇ ଧର୍ଯ୍ୟର ସହ ଅପେକ୍ଷା କରିବାକୁ ହେବ, କାରଣ ଈଶ୍ୱରଙ୍କ ସମୟ ଆମ ସମୟଠାରୁ  ଭିନ୍ନ । 

ଈଶ୍ଵରଙ୍କ ବାର୍ତ୍ତା : ସଦାପ୍ରଭୁ ମୋଶାଙ୍କୁ କହିଲେ ତୁମ୍ଭେ ଫାରୋଙ୍କୁ ନୀଳ ନଦୀ କୂଳରେ ସାକ୍ଷାତ କରି କୁହ, ତୁମ୍ଭେ ଆମ୍ଭ ଲୋକମାନଙ୍କୁ ପ୍ରାନ୍ତରରେ ସେବା କରିବାକୁ ଛାଡ଼ିଦିଅ, କିନ୍ତୁ ତୁମ୍ଭେ ଏ ପର୍ଯ୍ୟନ୍ତ ମନୋଯୋଗ କରି ନାହ, ତେଣୁ ଆମ୍ଭେ ଯଷ୍ଟି ନଦୀର ଜଳ ଉପରେ ପକାଇ ତାକୁ ରକ୍ତମୟ କରିବା, ତେବେ ତୁମ୍ଭେ ସଦାପ୍ରଭୁଙ୍କୁ ଜାଣିବ । 

ଈଶ୍ଵରଙ୍କ ନିର୍ଦ୍ଦେଶ ପାଳନ : ହାରୋଣ ଆପଣା ଯଷ୍ଟି ଘେନି ମିସରର ସମସ୍ତ ଜଳାଶୟ ଉପରେ ହସ୍ତ ବିସ୍ତାର କରନ୍ତେ ସମୁଦାୟ ଜଳ ରକ୍ତ ହେଲା । ଏହା ଦେଖି ଫାରୋ ମନ୍ତ୍ରଜ୍ଞମାନଙ୍କ ଦ୍ଵାରା ଜଳକୁ ରକ୍ତ କଲେ ସତ କିନ୍ତୁ ମିସର ପ୍ରତି ଏହି ପ୍ରଥମ କ୍ଳେଶ ସେମାନଙ୍କୁ ଭୟଭୀତ କଲା ଏବଂ ସେମାନଙ୍କ ଧର୍ମୀୟ ବିଶ୍ଵାସ ପ୍ରତି ଏକ ଧକ୍କା ଥିଲା ।

ଈଶ୍ଵରଙ୍କ ନିର୍ଦ୍ଦେଶ ଉଲଙ୍ଘନ : ପ୍ରଥମ କ୍ଳେଶ ଶେଷ ହେବାକୁ ୭ ଦିନ ଲାଗିଲା । ତା' ପରେ ଦ୍ଵିତୀୟ ଦଣ୍ଡ ସଦାପ୍ରଭୁ ପ୍ରେରଣ କରି ଦେଶକୁ ବେଙ୍ଗରେ ପରିପୂର୍ଣ୍ଣ କଲେ । ସମଗ୍ର ମିସର ବେଙ୍ଗମୟ ହେଲା । ମନ୍ତ୍ରଜ୍ଞମାନେ ସମସ୍ୟା ବୃଦ୍ଧି କଲେ ସିନା ଲାଘବ କରିପାରିଲେ ନାହିଁ । ଫାରୋ ବିଶ୍ଵାସ କରୁଥିଲେ ମୋଶା ଓ ହାରୋଣ ସଦାପ୍ରଭୁଙ୍କ ନିର୍ଦ୍ଦେଶରେ ଆଶ୍ଚର୍ଯ୍ୟକର୍ମ କରୁଛନ୍ତି ଓ କରିବେ, ତେଣୁ ସେ ସେମାନଙ୍କୁ ଅନୁରୋଧ କଲେ ବେଙ୍ଗଦୂରୀକରଣ ନିମନ୍ତେ ପ୍ରାର୍ଥନା କର, ତେବେ ଆମ୍ଭେ ତୁମ୍ଭ ଲୋକମାନଙ୍କୁ ବଳିଦାନ କରିବା ନିମନ୍ତେ ଛାଡ଼ିବା । ମୋଶାଙ୍କର ବିଶ୍ଵାସଯୁକ୍ତ ପ୍ରାର୍ଥନା ପ୍ରଭୁ ଶୁଣିଲେ । ବିପଦମୁକ୍ତ ହେବାରୁ ଫାରୋଙ୍କର ହୃଦୟ ପୁଣି କଠିନ ହେଲା ଓ ସେମାନଙ୍କ ବାକ୍ୟରେ ମନଯୋଗ ନ କରି ଈଶ୍ୱରଙ୍କ ନିର୍ଦ୍ଦେଶକୁ ଉଲଂଙ୍ଗନ କଲେ ।

ବିଶ୍ୱାସୀମାନଙ୍କର ବିଶ୍ଵାସଯୁକ୍ତ ସରଳ ପ୍ରାର୍ଥନା ଆଜି ଅନେକ କଠିନମନାଙ୍କ ଜୀବନରେ ଆଶ୍ଚର୍ଯ୍ୟକର୍ମ ସାଧିତହେଉଛି, କିନ୍ତୁ ଫାରୋଙ୍କ ପରି ସେମାନଙ୍କ ହୃଦୟ ପରିବର୍ତ୍ତନ ହେଉ ନାହିଁ ।