ପ୍ରତିଜ୍ଞାରକ୍ଷାକାରୀ ଈଶ୍ଵର

 ପ୍ରତିଜ୍ଞାରକ୍ଷାକାରୀ ଈଶ୍ଵର

ଆଜିର ଚିନ୍ତା

ଯାତ୍ରା ୫:୨୨-୬:୧୩

ପରମେଶ୍ୱରଙ୍କ ପ୍ରତିଜ୍ଞାକୁ ମୁଁ ପ୍ରତିକୂଳ ପରିସ୍ଥିତିରେ କିପରି ବିଶ୍ଵାସ କରୁଛି ? 

ମୋଶା ସଦାପ୍ରଭୁଙ୍କ ଦ୍ଵାରା ଆହ୍ୱାନପ୍ରାପ୍ତ ହୋଇ ଇସ୍ରାଏଲୀୟମାନଙ୍କୁ ଉଦ୍ଧାର କରିବା ପାଇଁ ଆଗେଇ ଆସିଥିଲେ । କିନ୍ତୁ ଏହି ସ୍ଥାନରେ ସେ ନିଜକୁ ଦୋଷାରୋପ କରି କହୁଛନ୍ତି, ମୋ' ଆସିବା ଦ୍ଵାରା ଲୋକମାନେ ଅମଙ୍ଗଳ ଭୋଗ କରୁଛନ୍ତି । କିନ୍ତୁ ସେ ଭୁଲି ଯାଉଛନ୍ତି ଯେ ସଦାପ୍ରଭୁ ନିରୂପିତ ସମୟରେ ତାଙ୍କର ପ୍ରତିଜ୍ଞାକୁ ସଫଳ କରିଥାନ୍ତି । ତେଣୁ ସଦାପ୍ରଭୁ ମୋଶାଙ୍କୁ ଆହ୍ୱାନର ନୂତନ ଉତ୍ସାହ ପ୍ରଦାନ କରି ଆପଣାର ନିୟମ ପୁନଃସ୍ମରଣ କରାଇଛନ୍ତି । 

ଯିହୋବାଙ୍କ ପ୍ରତିଜ୍ଞା : ମୋଶା ଓ ଇସ୍ରାଏଲ ସନ୍ତାନମାନେ ବହୁତ୍ ଆର୍ଶୀବାଦର ଅଧିକାରୀ, କାରଣ ସେମାନେ ଯିହୋବାଃ ପରମେଶ୍ୱରଙ୍କ ପରିଚୟ ପାଇଛନ୍ତି । ପୂର୍ବେ ସେମାନେ ଅବ୍ରାହମ, ଇସହାକ ଓ ଯାକୁବର ସର୍ବଶକ୍ତିମାନ ପରମେଶ୍ୱର ବୋଲି ଜାଣିଥିଲେ । ମାତ୍ର ପରମେଶ୍ୱର ଏହି ସ୍ଥାନରେ ଚାରୋଟି ପ୍ରତିଜ୍ଞା ଦେଇଛନ୍ତି ।

୧. ଆମ୍ଭେ ତୁମ୍ଭମାନଙ୍କୁ ମିସ୍ରୀୟମାନଙ୍କ ଭାର ବହନରୁ ନିସ୍ତାର କରିବା । 

୨.ଆମ୍ଭେ ତୁମ୍ଭମାନଙ୍କୁ ସେମାନଙ୍କ ଦାସତ୍ୱରୁ ମୁକ୍ତ କରିବା । 

୩. ବିସ୍ତ୍ରୀର୍ଣ୍ଣବାହୁ ଓ ମହାଦଣ୍ଡ ଦ୍ଵାରା ଉଦ୍ଧାର କରିବା ।

୪. ଆମ୍ଭେ ତୁମ୍ଭମାନଙ୍କୁ ପ୍ରତିଜ୍ଞାତ ଦେଶକୁ ନେଇଯିବା । 

ପ୍ରତିଜ୍ଞାର ପ୍ରତିକାର : ଇସ୍ରାଏଲ ସନ୍ତାନମାନେ ଭାରବହନ ଓ ଦାସତ୍ୱର ପୀଡ଼ା ସକଶୁ ଏତେଦୂର ଭାଙ୍ଗି ପଡ଼ିଥିଲେ ଯେ, ସେମାନେ ମୋଶାଙ୍କର ବାକ୍ୟରେ ମନଯୋଗ କରୁ ନାହାନ୍ତି । ଈଶ୍ଵରଙ୍କ ପ୍ରତିଜ୍ଞାରେ ବିଶ୍ଵାସ କରିପାରୁନାହାନ୍ତି । ଅଧର୍ଯ୍ୟ ଓ କ୍ରୋଧ ସେମାନଙ୍କ ଆସ୍ଥାକୁ ଭାଙ୍ଗି ଦେଇଛି । ମୋଶା ମଧ୍ୟ ବିବେଚନା କରୁଛନ୍ତି ଯେ ଯଦିଓ ତାଙ୍କର ଶରୀର ଓ ମନ ଈଶ୍ଵରଙ୍କ ଉଦ୍ଦେଶ୍ୟରେ ସୁନ୍ନତ ଓ ଉତ୍ସର୍ଗୀକୃତ କିନ୍ତୁ ସେ ଅସୁନ୍ନତ ଓଷ୍ଠାଧାରୀ ମନୁଷ୍ୟ ତେଣୁ ଇସ୍ରାଏଲୀୟମାନେ ତାଙ୍କର କଥାକୁ ଗ୍ରହଣ କରୁ ନାହାନ୍ତି । ତେବେ ଫାରୋ କିପରି ତାଙ୍କ କଥା ଶୁଣିବେ ଏ ବିଷୟରେ ମନରେ ଦ୍ଵନ୍ଦ ସୃଷ୍ଟି ହେଉଛି । ସଦାପ୍ରଭୁ ମୋଶାଙ୍କ ପ୍ରଶ୍ନର ଉତ୍ତରରେ ଆହୁରି ପ୍ରତିଜ୍ଞା ପ୍ରଦାନ କଲେ । 

ଆମର ଏହି ବିଶ୍ଵାସ ରହିବା ଦରକାର ଯେ, ଆମର ପରମେଶ୍ୱର ବିଶ୍ଵସ୍ତ ପରମେଶ୍ୱର, ତାଙ୍କ ପାଖରେ ସବୁ ସମସ୍ୟାର ସମାଧାନ ଅଛି । ତେଣୁ ଆମେ ଆମର ଆସ୍ଥା ହରାଇବା ନାହିଁ ।