ଈଶ୍ଵରଙ୍କ ମନୋନୀତ
ଆଜିର ଚିନ୍ତା
ଯାତ୍ରା ୬:୨୮-୭:୧୩
ଈଶ୍ୱର ତାଙ୍କ ବ୍ୟବହାର ନିମନ୍ତେ ମୋତେ ମନୋନୀତ କରିଛନ୍ତି କି ?
ସଦାପ୍ରଭୁ ତାଙ୍କର ବ୍ୟବହାର ଯୋଗ୍ୟ ପାତ୍ରଙ୍କୁ ବିଭିନ୍ନ ପ୍ରକାର ଦାନ ଦେଇ ତାଙ୍କ ଗୌରବ ନିମନ୍ତେ ବ୍ୟବହାର କରିଥାନ୍ତି । ସଦାପ୍ରଭୁ ମୋଶା ଏବଂ ହାରଣଙ୍କୁ ତାଙ୍କର ବକ୍ତବ୍ୟ କଥା ଫାରୋଙ୍କ ନିକଟରେ ପ୍ରକାଶ କରିବା ପାଇଁ ନିଯୁକ୍ତ କରିଥିଲେ ।
ଈଶ୍ଵରଙ୍କ ନିର୍ଦ୍ଦେଶ : ଈଶ୍ଵର ମୋଶାଙ୍କୁ ଫାରୋଙ୍କ ନିକଟରେ ଈଶ୍ୱରଙ୍କ ମୁଖପାତ୍ର ହୋଇ କାର୍ଯ୍ୟ କରିବାକୁ ନିଯୁକ୍ତ କଲେ, ଯେପରି ଈଶ୍ୱରଙ୍କ ମୁଖର କଥା ଇସ୍ରାଏଲୀୟମାନଙ୍କ ନିକଟରେ ପ୍ରକାଶିତ ହେବ । ମୋଶା ଓ ହାରୋଣ ଈଶ୍ଵରଙ୍କ ନାମରେ କଥା କହିଲେ । ଈଶ୍ୱର ଯାହା ଆଜ୍ଞା ଓ ନିର୍ଦ୍ଦେଶ ଦେଲେ, ତାହା ସବୁ ମୋଶା ହାରୋଣଙ୍କୁ କହିଲେ, ଯେପରି ସେ ତାହା ଫାରୋଙ୍କୁ କହିବେ ।
ଈଶ୍ଵରଙ୍କ ଆଶ୍ଚର୍ଯ୍ୟ ଶକ୍ତି : ଈଶ୍ଵର ତାଙ୍କ ସେବକମାନଙ୍କୁ ଆଶ୍ଚର୍ଯ୍ୟକର୍ମ କରିବାରେ ଶକ୍ତି ପ୍ରଦାନ କରିଥାନ୍ତି । ଫାରୋ ଏହି ସ୍ଥାନରେ ଚିହ୍ନ ଦେଖିବାକୁ ଇଚ୍ଛା କଲେ । ସଦାପ୍ରଭୁଙ୍କ ଆଜ୍ଞା ପ୍ରମାଣେ ହାରୋଣ ଯଷ୍ଟିକୁ ଦାସମାନଙ୍କ ସମ୍ମୁଖରେ ତଳେ ପକାଇଲେ, ତହିଁରେ ତାହା ସର୍ପ ହେଲା । ମିସରୀୟ ମନ୍ତ୍ରଜ୍ଞ ଓ ପଣ୍ଡିତମାନେ ମଧ୍ୟ ଆପଣା ଆପଣା ଯଷ୍ଟି ସବୁକୁ ସର୍ପ କଲେ । ମାତ୍ର ହାରୋଣଙ୍କ ଯଷ୍ଟି ଦ୍ଵାରା ସେମାନଙ୍କର ଯଷ୍ଟି ସବୁ ଗ୍ରାସିତ ହେଲେ । ଏଥିରୁ ପ୍ରମାଣିତ ହେଲା ଯେ, ସଦାପ୍ରଭୁଙ୍କ ଶକ୍ତି ସବୁଠାରୁ ଉର୍ଦ୍ଧ୍ବରେ । ତାଙ୍କ ଶକ୍ତି ଆଗରେ ସବୁକିଛି ହାରମାନେ ।
ଈଶ୍ୱର ଯାହାକୁ ଆହ୍ବାନ କରନ୍ତି, ସେମାନଙ୍କୁ ଆଶ୍ଚର୍ଯ୍ୟରୂପେ ବ୍ୟବହାର କରିଥାନ୍ତି । ଯେପରି ଯିରିମିୟ କହିଲେ "କାରଣ ମୁଁ
ତ ବାଳକ" ଯିଶାଇୟ କହିଲେ "ମୁଁ ଅଶୁଚି ଓଷ୍ଟାଧର ବିଶିଷ୍ଟ ମନୁଷ୍ୟ", ମୋଶା କହିଲେ "ମୁଁ ବାକ୍ୟ ପତି ନୁହେଁ" ଯାତ୍ରା (୪:୧୦) । ଶମିରୋଣୀୟା ସ୍ତ୍ରୀ ମସୀହଙ୍କୁ ଚିହ୍ନି ଯେଉଁ ସାକ୍ଷ୍ୟ ଦେଲେ ତଦ୍ୱାରା ସେହି ନଗରର ଅନେକ ଲୋକ ଯୀଶୁଙ୍କୁ ବିଶ୍ଵାସ କଲେ । ପ୍ରଭୁ ଯୀଶୁ ଯଦି ଆମକୁ ଆହ୍ଵାନ ଦେଇ ମନୋନୀତ କରିଛନ୍ତି, ତେବେ ଆମର ବାକ୍ୟ ଓ ସାକ୍ଷ୍ୟ ଦ୍ଵାରା ସେ ଗୌରବାନ୍ଵିତ ହେବେ ।