ବିଶ୍ଵାସ ସହିତ କର୍ମ
ଆଜିର ଚିନ୍ତା
ଲୂକ ୫:୧୨-୨୬
ମୋର ବିଶ୍ଵାସ କର୍ମ ଉପରେ ଆଧାରିତ ଅଟେ କି?
ଲୋକମାନେ ବାକ୍ୟ ଶୁଣିବା ପାଇଁ ଏବଂ ରୋଗରୁ ସୁସ୍ଥତା ପାଇବା ପାଇଁ ଯୀଶୁଙ୍କ ନିକଟରେ ଭିଡ କରୁଥିଲେ । ଯୀଶୁ କୌଣସି ବ୍ୟକ୍ତିକୁ ନିରାଶ କରୁ ନ ଥିଲେ । ତାଙ୍କ ମୁଖରେ ବାକ୍ୟ ଦ୍ଵାରା ଲୋକମାନେ ସୁସ୍ଥତା ଲାଭ କରୁଥିଲେ । ମୋର ବିଶ୍ଵାସର ଜୀବନ ଦ୍ଵାରା ଅନ୍ୟମାନେ ଉପକୃତ ହୋଇ ପାରୁଛନ୍ତି କି ?
ସୁସ୍ଥତା ପ୍ରଦାନକାରୀ ଯୀଶୁ : କୁଷ୍ଠୀ ଲୋକମାନେ ଅଶୁଚି ବୋଲି ନଗର ବାହାରେ ସେମାନଙ୍କୁ ରହିବାକୁ ପଡୁଥିଲା । ଲୋକମାନେ ସେମାନଙ୍କୁ ଘୃଣା କରୁଥିଲେ । କୁଷ୍ଠୀ ଲୋକଟି ନମ୍ର ଭାବରେ ଯୀଶୁଙ୍କ ନିକଟକୁ ଆସି ସୁସ୍ଥତା ପାଇବା ପାଇଁ ଅନୁରୋଧ କରିଥିଲା । ଯୀଶୁ ତାହାକୁ ସ୍ପର୍ଶ କରି କହିଲେ, ମୁଁ ଇଚ୍ଛା କରୁଅଛି ଶୁଚି ହୁଅ । ମନୁଷ୍ୟମାନଙ୍କ ପରି ତାଙ୍କଠାରେ ଘୃଣଭାବ ନ ଥିଲା । କାରଣ ସେ ଈଶ୍ୱର ଥିଲେ । ତାଙ୍କଠାରେ ଯେଉଁ ଶକ୍ତି ଥିଲା, ସେଥିପାଇଁ ସେ ବଡିମା ଦେଖାଉ ନ ଥିଲେ । ସେ କହିଲେ, ଏ ବିଷୟ କାହାକୁ କୁହ ନାହିଁ । କିନ୍ତୁ ଯାଜକଙ୍କୁ ଦେଖାଅ ଏବଂ ଧନ୍ୟବାଦର ନୈବେଦ୍ୟ ଉତ୍ସର୍ଗ କର ପ୍ରଭୁ ଯୀଶୁ ପ୍ରାର୍ଥନା କରିବା ପାଇଁ ନିର୍ଜ୍ଜନ ସ୍ଥାନ ଖୋଜୁଥିଲେ । ବାକ୍ୟରେ ଲେଖାଯାଏ, (୧୬ପଦ) ମାତ୍ର ସେ ନିର୍ଜ୍ଜନ ସ୍ଥାନମାନଙ୍କରେ ରହି ପ୍ରାର୍ଥନା କରୁଥିଲେ ଯେପରି ସେ ଶକ୍ତିରେ ପରିପୂର୍ଣ୍ଣ ହେବେ।
ପାପକ୍ଷମକାରୀ ଯୀଶୁ: ଅନେକ ସମୟରେ ନିଜର ପାପ ପାଇଁ ଆମେ ଅସୁସ୍ଥତା ଭୋଗ କରିଥାଉ । ଗୀତ ୧୦୩:୩ରେ ଲେଖାଯାଏ, "ସେ ତୁମ୍ଭର ଅଧର୍ମ ସବୁ କ୍ଷମା କରନ୍ତି, ସେ ତୁମ୍ଭର ରୋଗସବୁ ସୁସ୍ଥ କରନ୍ତି ଏହାଛଡା ଅନେକ ସମୟରେ ଇଶ୍ଵରଙ୍କର ଗୌରବ ଏବଂ ମହିମା ପ୍ରକାଶ ପାଇଁ ମଧ୍ଯ ଅସୁସ୍ଥତା ଆସିଥାଏ । ସେଦିନ ଚାରି ଜଣ ବନ୍ଧୁ ପକ୍ଷାଘାତ ରୋଗୀକୁ ବିଶ୍ଵାସର ସହିତ ଯୀଶୁଙ୍କ ନିକଟକୁ ଆଣିଥିଲେ । ଭିଡ ସକାଶୁ ତାଙ୍କ ନିକଟରେ ପହଞ୍ଚିବା କଷ୍ଟକର ଥିଲେ ମଧ୍ୟ ସେମାନେ ବହୁ କଷ୍ଟ କରି ଯୀଶୁଙ୍କ ପାଖରେ ପହଞ୍ଚି ପାରିଥିଲେ । ଯୀଶୁ ସେମାନଙ୍କ ବିଶ୍ୱାସ ଦେଖି କହିଲେ, ହେ ମନୁଷ୍ୟ ତୁମ୍ଭର ପାପସବୁ କ୍ଷମା କରାଯାଇଅଛି (୨୦ପଦ) ସୁସ୍ଥତା ଦେବା ସହିତ ପାପ କ୍ଷମା କରିବାର ଅଧିକାର ଯେ ଯୀଶୁଙ୍କର ଅଛି ଏହା ସେଦିନ ଲୋକମାନେ ଜାଣିପାରିଥିଲେ । ବନ୍ଧୁମାନଙ୍କ ବିଶ୍ଵାସ ଦ୍ଵାରା ପକ୍ଷାଘାତ ରୋଗୀ ସୁସ୍ଥତା ପାଇଥିଲା । ମୋର ବିଶ୍ଵାସର ଜୀବନ ଅନ୍ୟମାନଙ୍କୁ କିପରି ପ୍ରଭାବିତ କରୁଛି ? ଆସନ୍ତୁ ନିଜକୁ ପରୀକ୍ଷା କରିବା ଓ ବିଶ୍ଵାସର ଜୀବନକାଟି ନିଜର ପୁଣି ଅନ୍ୟମାନଙ୍କର ଆର୍ଶୀବାଦର କାରଣ ହେବା ।