ଶକ୍ତିର କାର୍ଯ୍ୟ

 ଶକ୍ତିର କାର୍ଯ୍ୟ

ଆଜିର ଚିନ୍ତା

ଲୁକ ୪:୩୧-୪୪

ଯୀଶୁଙ୍କ ଶକ୍ତିର କାର୍ଯ୍ୟକୁ ମୁଁ କିପରି ଅନୁଭବ କରିପାରିଛି ? 

ଯୀଶୁ ତାଙ୍କର ସେବାକାର୍ଯ୍ୟ ପାଇଁ ଗାଲିଲୀ ସମୁଦ୍ର କୂଳରୁ ପ୍ରଥମ ୪ ଜଣ ଶିଷ୍ୟଙ୍କୁ ମନୋନୀତ କରିଥିଲେ । ଗାଲିଲୀ ଏବଂ ଯିହୁଦା ଦେଶର ସମାଜ ଗୃହରେ ସେ ଶିକ୍ଷା ଦେଉଥିଲେ । ତାହାଙ୍କ ଶିକ୍ଷାରେ ଲୋକମାନେ ଆଶ୍ଚର୍ଯ୍ୟାନ୍ଵିତ ହେଉଥିଲେ କାରଣ ତାହାଙ୍କର ବାକ୍ୟ ଅଧିକାରଯୁକ୍ତ ଥିଲା । ପିତାଙ୍କଠାରୁ ସେ ଏକ ଈଶ୍ୱର ଦତ୍ତ ଅଧିକାର ପ୍ରାପ୍ତ ହୋଇଥିଲେ । ଶିଷ୍ୟମାନଙ୍କୁ ଏବଂ ତାଙ୍କର ଅନୁଗାମୀମାନଙ୍କୁ ମଧ୍ୟ ଯୀଶୁ ଅଧିକାର ଦେଇଥିଲେ । ଆଜିର ପଠନରେ ଦୁଇଟି ଘଟଣାରେ ଯୀଶୁଙ୍କ ଅସୀମ ଶକ୍ତି ଏବଂ ଅଧିକାର ବିଷୟ ଲେଖାଯାଇଛି ।

ଶକ୍ତିପୁର୍ଣ୍ଣ  କାର୍ଯ୍ୟ: ଆଶୁଚି ଆତ୍ମାମାନେ ଯୀଶୁଙ୍କୁ ଜାଣୁଥିଲେ ଏବଂ ସେ ଯେ ଈଶ୍ଵରଙ୍କ ପୁତ୍ର ଅଟନ୍ତି ଏହା ସ୍ୱୀକାର କରୁଥିଲେ । ଜଣେ ମନ୍ଦ ଆତ୍ମା ଦ୍ଵାରା ଆକ୍ରାନ୍ତ ବ୍ୟକ୍ତି ସମାଜ ଗୃହରେ ଉପସ୍ଥିତ ଥିଲେ । ଲୋକମାନେ ଯୀଶୁଙ୍କର ବାକ୍ୟ ଶୁଣିବା ସମୟରେ ସେ ଚିତ୍କାର କରୁଥିଲା । ଯୀଶୁଙ୍କ ମୁଖର ଧମକ ଦ୍ଵାରା ଲୋକଟି ସୁସ୍ଥତା ପାଇଥିଲା । ଯେଉଁମାନେ ତାଙ୍କର ସ୍ପର୍ଶ ପାଉଥିଲେ ସେମାନେ ସୁସ୍ଥତା ଲାଭ କରୁଥିଲେ । ଯୀଶୁଙ୍କ ବାକ୍ୟର ଯେଉଁ ଶକ୍ତି ରହିଛି ତାହା ମୁଁ କିପରି ଅନୁଭବ କରୁଛି । ବର୍ତ୍ତମାନ ମଧ୍ୟ ଜଗତର ମନ୍ଦ ଶକ୍ତି କାର୍ଯ୍ୟରତ ଅଛି । ଏହାକୁ ଦୂର କରିବା ପାଇଁ ଯୀଶୁଙ୍କର ନିକଟକୁ ଆସିବାକୁ ପଡ଼ିବ ପୁଣି ତାହାଙ୍କ ଶକ୍ତିରେ ବିଶ୍ଵାସ କରିବାକୁ ପଡ଼ିବ । 

ଶକ୍ତିରେ ପରିପୂର୍ଣ୍ଣ: ଏହି ସ୍ଥାନରେ ଯୀଶୁଙ୍କର ପ୍ରାର୍ଥନାର ଜୀବନକୁ ଦେଖି ପାରୁଛୁ । ସେ ନିର୍ଜ୍ଜନ ସ୍ଥାନରେ ପ୍ରାର୍ଥନା କରୁଥଲେ ଏବଂ ପିତାଙ୍କଠାରୁ ଶକ୍ତିପ୍ରାପ୍ତ ହେଉଥିଲେ । କ୍ରୃଶ ଉପରେ ତାହାଙ୍କୁ ଯେଉଁ ଯନ୍ତ୍ରଣା ସହ୍ୟ କରିବାକୁ ପଡ଼ିବ, ସେଥିପାଇଁ ସେ ପ୍ରାର୍ଥନା କରି ପିତାଙ୍କଠାରୁ ଶକ୍ତି ପାଇଥିଲେ । ଅନେକ ସମୟରେ ଆମର ଜୀବନରେ ଅସୁସ୍ଥତା ଆସିଥାଏ । ଶିମୋନଙ୍କର ଶାଶୁଙ୍କର ଶାରୀରିକ ଅସୁସ୍ଥତାକୁ ଧମକ ଦେଇ ଯୀଶୁ ଦୂର କରିଥିଲେ । ସୁସ୍ଥତା ପାଇଁ ଯୀଶୁଙ୍କ ନାମରେ ପ୍ରାର୍ଥନା କରିବା ବଦଳରେ ଆମେ ମନୁଷ୍ୟର ସାହାର୍ଯ୍ୟ ନେଇଥାଉ । ଆମର ପ୍ରାର୍ଥନାର ଜୀବନ ହିଁ ଆମକୁ ଶକ୍ତି ଦେଇଥାଏ । ଶକ୍ତିର ଜୀବନ ଏବଂ ପ୍ରାର୍ଥନାର ଜୀବନ ପ୍ରଭୁ ଆମଠାରୁ ଆଶା କରନ୍ତି । ଏଥିପାଇଁ ଆମେ ସଚେତନ ହେବା କି ?