ବିଶ୍ୱାସୀର ଉଦ୍ଧାର
ଆଜିର ଚିନ୍ତା
ଗୀତ ୩୪:୧-୨୨
ଅନିଶ୍ଚିତ, ଅଶାନ୍ତ ପୃଥିବୀରେ ମତେ କିଏ ଉଦ୍ଧାର କରିବ?
ଶାଉଲ ରାଜାଙ୍କର ଆକ୍ରମଣରୁ, ଦାଉଦ ଓ ତାଙ୍କର ଅନୁଗାମୀ ମାନେ ରକ୍ଷା ପାଇବା ପାଇଁ ଲୁଚି ଲୁଚି ଏକ ସ୍ଥାନରୁ ଅନ୍ୟ ସ୍ଥାନକୁ ଯାଉଥିଲେ। ଭୟାତୁର, ପ୍ରାଣହାନି ଆଶଙ୍କା ମଧ୍ୟରେ, ଗତି କରୁଥିବା ମଣିଷ ପରି ଦାଉଦ ତାଙ୍କର ଦୁଃଖଦ ଅନୁଭୁତିକୁ ଏହି ଗୀତରେ ବର୍ଣ୍ଣନା କରିଛନ୍ତି। ଏତଦ୍ ବ୍ୟତୀତ ଈଶ୍ବର ଯେ କେବଳ ଏ ସମସ୍ତ ବିପଦ ମଧ୍ୟରୁ ରକ୍ଷା ପାଇପାରିବେ ଏ ବିଷୟରେ ଜନ୍ମିଥିବା ତାଙ୍କର ଦୃଢ଼ ଧାରଣାକୁ ଉପସ୍ଥାପନ କରିଛନ୍ତି ।
ସଦାପ୍ରଭୁଙ୍କ ଉଦ୍ଧାର (୧-୭): ଜଣେ କ୍ଷମତାଶାଳୀ ରାଜା ଜଣେ ସାଧାରଣ ମଣିଷର ଜୀବନ ଶିକାରରେ ଲିପ୍ତ ରହିଛି। ଅନପେକ୍ଷିତ ଭାବେ ମୃତ୍ୟୁ ଭୟ ତା'ର ସମ୍ପୁର୍ଣ୍ଣ ଜୀବନକୁ ଆଶାଶୂନ୍ୟ ଓ ଭୟଗ୍ରସ୍ତ କରି ଧ୍ଵଂସାଭିମୁଖୀ କରାଇଛି ଦାଉଦ ଜୀବନରେ ଘଟିଯାଇଥିବା ଏହି ପ୍ରକାର ଏକ ବାସ୍ତବ ଅନୁଭୂତିକୁ ବର୍ଣ୍ଣନା କରିବା ସଙ୍ଗେ ସଙ୍ଗେ ସଦାପ୍ରଭୁଙ୍କ ଅଲୌକିକ ଉଦ୍ଧାରର କାର୍ଯ୍ୟକୁ ଭୁରି ଭୁରି ପ୍ରଶଂସା କରି ତାଙ୍କର ନାମକୁ ପ୍ରତିଷ୍ଠା କରିବା ପାଇଁ ଆହ୍ବାନ କରିଛନ୍ତି । ତାଙ୍କର ଉକ୍ତି ଯେ ମୋହର ସବୁ ଭୟରୁ ଈଶ୍ୱର ହିଁ ଉଦ୍ଧାର କଲେ(୪ପଦ)। ସବୁ ସଙ୍କଟରୁ ସେ ଉଦ୍ଧାର କଲେ (୬,୭,୧୭)। ଦାଉଦଙ୍କ ପ୍ରଶଂସା ଆମ୍ଭମାନଙ୍କୁ କହେ ଆମର ପ୍ରଭୁ କେତେ ଶକ୍ତିମାନ ପୁଣି ସେ ତାଙ୍କ ଭୟକାରୀଙ୍କ ନିମନ୍ତେ ଆପଣା ଦୂତମାନଙ୍କୁ ଉଦ୍ଧାର ପାଇଁ ଆଦେଶ ଦେଇପାରନ୍ତି।
ସଦାପ୍ରଭୁଙ୍କ ପ୍ରତି ଭୟ (୮-୧୧,୧୬-୨୨): ଦୁଷ୍ଟ, ଆତଙ୍କବାଦୀ, କ୍ଷମତସମ୍ପନ ବିପକ୍ଷ ବଳବାନମାନଙ୍କୁ ଜଣେ ମଣିଷ ସ୍ଵାଭାବିକ ଭାବେ ଭୟ କରିଥାଏ। ଏପରି ପରିସ୍ଥିତିରେ ଜଣେ ବଳବାନ ଈଶ୍ବର ଅଛନ୍ତି, ଏହା ଭାବି ଆମେ ବିସ୍ମିତ ହୋଇଯାଉ। ନିଜର ସମର୍ଥ, ବଳ, ଜ୍ଞାନ ଉପରେ ଅତ୍ୟଧିକ ନିର୍ଭର କରି ଶେଷରେ ବିଫଳ ହୋଇଯାଉ। ମାତ୍ର ସଦାପ୍ରଭଙ୍କ ଭୟ ସମସ୍ତ ଅଭାବ ଦୂର କରିଦେବା ସଙ୍ଗେ ସଙ୍ଗେ ମଙ୍ଗଳ ବିଷୟରେ ଭରପୁର କରିଦେବ। ବିପଦଗ୍ରସ୍ତ ଧାର୍ମିକମାନଙ୍କୁ ସେ ଉଦ୍ଧାର କରିବେ (୧୯) ଓ ଖଣ୍ଡେ ହେଲେ ଅସ୍ଥି ଭଗ୍ନ ହେବାକୁ ଦେବେ ନାହିଁ (୨୦ ପଦ)। ଧାର୍ମିକର ଘୃଣାକାରୀକୁ ଦୋଷୀକୃତ କରିବେ। ମାତ୍ର ତାଙ୍କର ଭୟକାରୀ ଶରଣାଗତ ଆଦୌ ଦୋଷୀକୃତ ହେବେ ନାହିଁ। ବିଶ୍ଵାସ କରୁଥିବା ତାଙ୍କର ଭୟକାରୀମାନଙ୍କ ଉପରେ ତାଙ୍କର ଯେ ଦୃଷ୍ଟି ଅଛି ଓ ସେମାନଙ୍କ ଆର୍ତ୍ତନାଦ ପାଇଁ ସେ କର୍ଣ୍ଣ ଡେରିଥାନ୍ତି (୧୫,୧୭) ଏହା ସର୍ବଦା ସ୍ମରଣ ରଖିବା ।