ମହାପରକ୍ରମୀ ଈଶ୍ଵରଙ୍କ ସ୍ତୁତି

 ମହାପରକ୍ରମୀ ଈଶ୍ଵରଙ୍କ ସ୍ତୁତି

ଆଜିର ଚିନ୍ତା

ଗୀତ ୩୩:୧-୨୨

ମୋର ଓଷ୍ଠାଧର ଓ ହୃଦୟର ପ୍ରଶଂସା କ'ଣ ଯୁକ୍ତିଯୁକ୍ତ?

 ଈଶ୍ୱରଙ୍କ ପ୍ରଶଂସା ଓ ସ୍ତୁତି କଲାବେଳେ ଈଶ୍ୱରଙ୍କ ପ୍ରକୃତ ପରିଚୟ ଓ ତାଙ୍କର କାର୍ଯ୍ୟ ଯଦି ହୃଦୟରୁ ବର୍ଣ୍ଣନା କରାଯାଏ ତାହାହେଲେ ତାହା ପ୍ରକୃତ ସ୍ତୁତି ଭଳି ଈଶ୍ଵରଙ୍କ ସମ୍ମୁଖରେ ଗୃହୀତ ହୁଏ। ଏହି ଗୀତରେ ଈଶ୍ଵର ଯେ, ସୃଷ୍ଟିକର୍ତ୍ତା, ସର୍ବଭୌମକର୍ତ୍ତା, ବିଚାରପତି, ପରିତ୍ରାଣକର୍ତ୍ତା ତାହାର ଆକାଟ୍ୟ ପ୍ରମାଣ ରହିଛି।

ପ୍ରଭୂରେ ଉଲ୍ଲାସ (୧-୩): ଖ୍ରୀଷ୍ଟ ବିଶ୍ୱାସୀ ସରଳାନ୍ତଃକରଣରେ ଆନନ୍ଦିତ ହୋଇ ଈଶ୍ୱରଙ୍କ ପ୍ରଶଂସା କରିବା ଶୋଭନୀୟ ଅଟେ, ଏହାର ପ୍ରକାଶ ବାଦ୍ୟଯନ୍ତ୍ର ସହ ଉଚ୍ଚଧ୍ଵନିରେ ହେବା ବିଧେୟ । ଯାଜକମାନଙ୍କର ତୂରୀଧ୍ଵନି ଶୁଣିବାମାତ୍ରେ ଇସ୍ରାଏଲୀୟମାନେ ଉଚ୍ଚଧ୍ଵନୀ କଲେ ଓ ଯିରୀହୋର ବଲିଷ୍ଠ ପ୍ରାଚୀର ଧୂଳିସାତ ହେଲା (ଯିହୋଶୂୟ ୬:୨୦)। ଏହି ଉଚ୍ଚଧ୍ଵନୀ ସାକ୍ଷ୍ୟ ବହନ କରେ ଯେ ସଦାପ୍ରଭୁ ରାଜାମାନଙ୍କର ରାଜା, ପ୍ରଶଂସା ପାଇବାର ଯୋଗ୍ୟ ପରମେଶ୍ଵର (୧ମ ତୀମଥି ୬:୧୫)। ଆମର ପ୍ରଶଂସା ସ୍ତୁତି କ'ଣ ଚିରାଚରିତ?

ସୃଜନକାରୀ ବାକ୍ୟ (୪-୯):ଈଶ୍ୱରଙ୍କ ଉଚ୍ଚାରିତ ବାକ୍ୟ ଓ ତାହାଙ୍କର କାର୍ଯ୍ୟକୁ ପୃଥକ କରାଯାଇ ପାରେ ନାହିଁ। ସାରା ବିଶ୍ବ ତାଙ୍କର ବାକ୍ୟ ପ୍ରମାଣେ ରୂପ ପାଇଛି। ସେ ବାକ୍ୟରୂପୀ ପରମେଶ୍ଵର। ତାଙ୍କର ସମସ୍ତ ବାକ୍ୟ ଜୀବନ୍ତ ଓ କାର୍ଯ୍ୟସାଧକ (ଏବ୍ରୀ ୪:୧୨)। ଗଗନମଣ୍ଡଳ, ପ୍ରକାଣ୍ଡ ବରିଧି ଉଚ୍ଚାରିତ ବାକ୍ୟ ଦ୍ଵାରା ସୃଷ୍ଟ (କଲସୀ ୧:୧୬,୧୭)। ସେହି ବଳିଷ୍ଠ ବାକ୍ୟ ଅନ୍ତରରେ  ସାଇତି ରଖୁ। ଜୀବନର ପ୍ରତ୍ୟକ ପରିସ୍ଥିତିରେ ତାଙ୍କୁ ବ୍ୟବହାର କରି ତାଙ୍କର ଉପସ୍ଥିତି ଓ ଶକ୍ତିକୁ ଅନୁଭବ କରୁ।

ରକ୍ଷାକାରୀ ଶକ୍ତି (୧୦-୨୨): ଈଶ୍ୱରଙ୍କ ମନ୍ତ୍ରଣା ନିତ୍ୟସ୍ଥାୟୀ । ସବୁ ପରକ୍ରମୀଙ୍କର ମନ୍ତ୍ରଣା ସେ ବ୍ୟର୍ଥ କରିଦିଅନ୍ତି (ଯାତ୍ରା ୧୫:୪-୧୦)। ଈଶ୍ୱରଙ୍କ ସର୍ବଭୌମ ଇଚ୍ଛାକୁ କେହି ପରାଜିତ କରିପାରେ ନାହିଁ।ନିଜର ସୁବିବେଚନାରୁ ବାହାରି ଆସୁ। ତାଙ୍କର ଅଦମ୍ୟ, ଅବିଚଳିତ ଇଚ୍ଛା ନିକଟରେ ସମର୍ପିତ ହେଲେ ଆମେ ବିଜୟୀ ଜୀବନ କାଟିପରିବା। ବହୁ ପରକ୍ରମୀ ନିଜକୁ ରକ୍ଷା କରିପାରି ନାହାନ୍ତି। ସେମାନଙ୍କର ସାମର୍ଥ ଗୌଣ ଦେଖାଯାଇଛି। ଏପରିକି ସେମାନେ ମଧ୍ଯ ପୃଥିବୀ ପୃଷ୍ଠରୁ ନିଶ୍ଚିହ୍ନ ହୋଇଯାଇଛନ୍ତି। ସଦାପ୍ରଭୁଙ୍କ ଭୟକାରୀ ମାନଙ୍କର ପ୍ରାଣକୁ ରକ୍ଷା କରିବା ପାଇଁ ସେ କେବଳ ସମର୍ଥ। ସେଇ ଈଶ୍ୱର ଆମର ଅନନ୍ତ ରକ୍ଷାକାରୀ।