ସୁରକ୍ଷା ପ୍ରଦାନକାରୀ ଈଶ୍ୱର
ଆଜିର ଚିନ୍ତା
ଗୀତ ୪୪:୧-୨୬
ମୋର ପ୍ରକୃତ ସାହାଯ୍ୟକାରୀ କିଏ ?
ସାଧାରଣତଃ, ଯଦି ଅରାଜକତା ଓ ପାପର ମାତ୍ରା ବଢିଚାଲେ, ତେବେ ବିଫଳତା ଓ ହାହାକାର ବଢ଼ିଚାଲେ, ମାତ୍ର ଈଶ୍ଵରପରାୟଣତା ଦେଖାଗଲେ, ରାଜ୍ୟରେ ସମୃଦ୍ଧି ଓ ସଫଳତା ଦେଖାଯାଏ । ଏ ଗୀତରେ ଈଶ୍ୱରଙ୍କ ଲୋକମାନେ କଷ୍ଟ ପାଆନ୍ତି ଓ ପରେ ଈଶ୍ଵର କିପରି ଉଦ୍ଧାର କରନ୍ତି ତାହାହିଁ ଲେଖାଯାଏ ।
ଅତୀତର ଅନୁଭୁତି (୧-୮) :
ଅତୀତରେ ଇସ୍ରାୟେଲୀୟମାନଙ୍କୁ ଶତ୍ରୁମାନଙ୍କ ହସ୍ତରୁ ଈଶ୍ଵର କିପରି ରକ୍ଷା କରିଥିଲେ ଓ ତାଙ୍କର ଅନୁଗ୍ରହ, ଦକ୍ଷିଣହସ୍ତ କିପରି ବିପକ୍ଷମାନଙ୍କୁ ଲଜ୍ଜିତ କରି, ମନୋନୀତମାନଙ୍କୁ ରୋପଣ କରିଥିଲେ, ତାହା ଗୀତରଚକ ମନେ ପକାଉଛନ୍ତି । ଅତୀତର ଅନୁଭୁତି ଆମକୁ ଈଶ୍ୱରଙ୍କ ଠାରେ ବିଶ୍ୱାସ କରିବାକୁ ସାହାଯ୍ୟ କରିଥାଏ କି ?
ବର୍ତ୍ତମାନର ପରିସ୍ଥିତି (୯-୧୬) :
ଇମୋରୀୟ ଓ ମୋୟାବୀୟମାନଙ୍କ ଦୃଷ୍ଟିରେ ଆମେ ବିଦ୍ରୁପର ପାତ୍ର । ସେମାନଙ୍କ ଖାଦ୍ୟ ନିମନ୍ତେ ଆମେ ମେଷଗଣ ତୁଲ୍ୟ । ସେମାନଙ୍କ ଦୃଷ୍ଟିରେ ଆମେ ଅପମାନିତ, ତିରସ୍କୃତ, ଲଜ୍ଜିତ ଓ ନ୍ୟୁନୀକୃତ । ସେମାନେ ବିଦ୍ରୁପ କରି କହନ୍ତି, ତୁମ୍ଭର ପରମେଶ୍ୱରଙ୍କ ପ୍ରତିଜ୍ଞା ସକଳ ମୂଲ୍ୟହୀନ । ଏହା ଗୀତରଚକଙ୍କୁ ବ୍ୟଥିତ କରୁଛି ।
ଈଶ୍ୱରଙ୍କ ସହାନୁଭୂତି ନିମନ୍ତେ ପ୍ରାର୍ଥନା (୧୭-୨୬) :
ଯଦ୍ୟପି ଦିନଯାକ ଆମେ ମାନସିକ ଭାବେ, ଶାରୀରିକ ଭାବେ ଓ ଆତ୍ମିକ ଭାବେ ହତ ହେଉଅଛୁ ଓ ହତ୍ୟା ନିମନ୍ତେ ମେଷଗଣ ତୁଲ୍ୟ ହୋଇଅଛୁ । ତଥାପି ଆମେ ତୁମଠୁ ବିମୁଖ ହୋଇ ନାହୁ କିଆବା ପଥଭ୍ରଷ୍ଟ ହୋଇ ନାହୁ, ଆମ୍ଭମାନଙ୍କ ପ୍ରାଣ ଧୂଳିରେ ଅବନତ । ତୁମ୍ଭେ କାହିଁକି ଆପଣା ମୁଖ ଲୁଚାଉଅଛ ଓ ଆମ୍ଭମାନଙ୍କ ପ୍ରାର୍ଥନା ଶୁଣୁ ନାହଁ ? ସାହାଯ୍ୟ ନିମନ୍ତେ ଉଠ ଓ ଆପଣା ସ୍ନେହପୂର୍ଣ୍ଣ କରୁଣାରେ ଆମ୍ଭମାନଙ୍କୁ ମୁକ୍ତ କର । ଦୁଃଖ ବା ସମସ୍ୟା ଆସିଲେ, ଈଶ୍ୱରଙ୍କଠାରେ ପ୍ରାର୍ଥନା କଲେ, ସେ ଆମକୁ ସାହାଯ୍ୟ କରିବା ନିମନ୍ତେ ସଦାପ୍ରସ୍ତୁତ, ଏହା ମୁଁ ବିଶ୍ଵାସ କରେ କି ?