ଯୋଜନା ସଫଳକାରୀ ଈଶ୍ଵର
ଆଜିର ଚିନ୍ତା
ପ୍ରେରିତ ୨୨:୨୨-୨୩:୧୧
ଈଶ୍ୱରଙ୍କ ଯୋଜନାକୁ ସଫଳ କରିବାକୁ ମୁଁ ଚେଷ୍ଟା କରୁଛି କି ?
ଈଶ୍ୱରଙ୍କ ଯୋଜନା ଅନୁସାରେ ବିଜାତୀୟମାନେ ପାଉଲଙ୍କ ଦ୍ଵାରା ସୁସମାଚାର ଶୁଣିବାର ସୁଯୋଗ ପାଇଲେ ।
ସୁରକ୍ଷାକାରୀ ଈଶ୍ବର :
ଲୋକମାନେ ପାଉଲଙ୍କ କଥା ଶୁଣି ଚିତ୍କାର କରି କହିଲେ, ଏହି ବ୍ୟକ୍ତି ବଞ୍ଚିବା ଉଚିତ୍ ନୁହେଁ? । ସେମାନେ ଆପଣା ଆପଣା ବସ୍ତ୍ର ଫୋପାଡ଼ି ଆକାଶ ଆଡ଼କୁ ଧୂଳି ଫୋପାଡ଼ିବାକୁ ଲାଗିଲେ । ଏଣୁ ସହସ୍ର ସେନାପତି ତାଙ୍କୁ ଗଡ଼ ଭିତରକୁ ନେଇଗଲେ । ସେ ବିଦ୍ରୋହର ସଠିକ୍ କାରଣ ଜାଣିବା ନିହାତି ନିମନ୍ତେ ତାଙ୍କୁ କୋରଡ଼ା ପ୍ରହାର ଦ୍ଵାରା ପରୀକ୍ଷା କରିବାକୁ ଆଦେଶ ଦେଲେ । କୋରଡ଼ା ପ୍ରହାର ପାଇଁ ବାନ୍ଧିଲା ଉତ୍ତାରେ ପାଉଲ ଶତ ସେନାପତିଙ୍କୁ କହିଲେ, ବିଚାର ଦ୍ଵାରା ଦୋଷୀ ବୋଲି ପ୍ରମାଣିତ ନ କରି ଜଣେ ରୋମୀୟକୁ ବେତ୍ରାଘାତ କରିବା ନିୟମ ବିରୁଦ୍ଧ ଅଟେ । ପାଉଲ ଜନ୍ମରୁ ଜଣେ ରୋମୀୟ ବୋଲି ଜାଣି ଶାସକମାନେ ତାଙ୍କୁ ବେତ୍ରାଘାତ କରିବାରୁ ନିବୃତ୍ତ ହେଲେ । ଏପରି ହେଲା ଯେ ସେ ବନ୍ଧନ ମୁକ୍ତ ହେଲେ ଏବଂ ପ୍ରଧାନ ଯାଜକ ଓ ସମସ୍ତ ମହାସଭାକୁ ଏକତ୍ର ଡାକି ତାଙ୍କ ସମ୍ମୁଖରେ ତାଙ୍କୁ କଥା କହିବାକୁ ସୁଯୋଗ ଦିଆଗଲା । ପବିତ୍ର ଅତ୍ମାଙ୍କଠାରେ ନିଜକୁ ସମ୍ପୂର୍ଣ୍ଣ ସମର୍ପଣ କଲେ ସେ ପ୍ରତିକୂଳ ପରିସ୍ଥିତିରେ ମଧ୍ୟ ସୁରକ୍ଷା ପ୍ରଦାନ କରନ୍ତି ।
ସାହାଯ୍ୟକାରୀ ଈଶ୍ବର :
ପାଉଲ ଉପସ୍ଥିତ ସମସ୍ତଙ୍କୁ ଭ୍ରାତୃବୃନ୍ଦ ବୋଲି ସମ୍ବୋଧନ କରି ଈଶ୍ୱରଙ୍କ ସାକ୍ଷାତରେ ଯଥାର୍ଥ ଆଚାରବ୍ୟବହାର କରିଛନ୍ତି ବୋଲି କହିବାରୁ ମହାଯାଜକ ହାନାନ୍ ତାହାଙ୍କ ମୁଖରେ ଆଘାତ କରିବାକୁ ଲୋକମାନଙ୍କୁ ଆଜ୍ଞା ଦେଲେ । ମାତ୍ର ପାଉଲ ସାହସର ସହିତ ଉତ୍ତମ ବ୍ୟବହାର ଦେଖାଇ ନିଜକୁ ଜଣେ ଫାରୁଶୀ ବୋଲି କହି ଯାହା ଯଥାର୍ଥ ତାହା ଜଣାଇଲେ । ଫାରୂଶୀ ଏବଂ ସାଦ୍ଦୁକୀମାନଙ୍କ ମଧ୍ୟରେ ବିବାଦ ଘଟିଲା । କାରଣ ସାଦ୍ଦୁକୀମାନେ ପୁନରୁତ୍ଥାନ ନାହିଁ କିମ୍ବା ଦୂତ ଅବା ଆତ୍ମା ନାହିଁ ବୋଲି କହୁଥିଲେ, ମାତ୍ର ଫାରୁଶୀମାନେ ଉଭୟକୁ ସ୍ଵୀକାର କରୁଥିଲେ । ଫଳରେ ପରସ୍ପର ମଧ୍ୟରେ ବାକ୍ ଯୁଦ୍ଧ ହେଲା । କେତେକ ଶାସ୍ତ୍ରୀ କହିଲେ, ଆମ୍ଭେମାନେ ଏହି ଲୋକଠାରେ କୌଣସି ଦୋଷ ଦେଖୁ ନାହୁ, ବରଂ କୌଣସି ଆତ୍ମା ଅବା ଦୂତ ତାହା ସହିତ କଥାବାର୍ତ୍ତା କରିଛନ୍ତି । ତେଣୁ ମହା ବିବାଦ ଘଟିଲା । କାଳେ ଲୋକମାନେ ପାଉଲଙ୍କୁ ବଧ କରି ଦେବେ, ଏହି ଭୟରେ ତାଙ୍କୁ ଗଡ଼ ଭିତରକୁ ନିଆଗଲା । ଈଶ୍ଵର ସର୍ବଦା ସବୁ ବିଷୟକୁ ନିୟନ୍ତ୍ରଣ କରିବାକୁ ସମର୍ଥ ଅଟନ୍ତି