ଧୈର୍ଯ୍ୟଶୀଳ ପରମେଶ୍ୱର
ଆଜିର ଚିନ୍ତା
ଯାତ୍ରା ୯:୨୭-୧୦:୬
ପରମେଶ୍ୱରଙ୍କ ଧୈର୍ଯ୍ୟକୁ ଆମେ କଳନା କରିଛୁ କି ?
ପରମେଶ୍ୱରଙ୍କ ଦୟା, ସହନଶୀଳତାକୁ ହେୟଜ୍ଞାନ କଲେ ତା'ର ପରିଣାମ ଭୟଙ୍କର ହୋଇଥାଏ । ଏହା ଜାଣି ମଧ୍ୟ ଫାରୋ ନିଜକୁ ନମ୍ର କରି ନ ଥିଲେ ।
ଅନୁତାପବିହୀନ ପାପ ସ୍ଵୀକାର :
ମନୁଷ୍ୟ ଅନୁତାପ କରି ପାପସ୍ଵୀକାର କଲେ ପରିବର୍ତ୍ତିତ ହୋଇଥାଏ । କିନ୍ତୁ ଫାରୋ ଏହି ଶାସ୍ତ୍ରାଂଶରେ ଯେଉଁ ସ୍ୱୀକାରୋକ୍ତି କରିଛନ୍ତି ତାହା ପ୍ରକୃତ ଅନୁତାପ ନ ଥିଲା, ତାହା କେବଳ ଛଳନା ଥିଲା । କେବଳ ସ୍ୱାର୍ଥପର ଭାବରେ ନିଜର ସୁରକ୍ଷା ଓ ଦଣ୍ଡର ନିବୃତ୍ତି ନିମନ୍ତେ ତାହା କହିଥିଲେ । ମୋଶା ଏହା ଜାଣି ମଧ୍ୟ ସଦାପ୍ରଭୁଙ୍କ ସମ୍ମୁଖରେ ହସ୍ତବିସ୍ତାର କରି ପ୍ରାର୍ଥନା କଲେ । ତହିଁରେ ମେଘ ଗର୍ଜ୍ଜନ ଓ ଶିଳାବୃଷ୍ଟି ନିବୃତ୍ତ ହେଲା ।
ଭୟଶୂନ୍ୟ ଜୀବନ :
ଫାରୋଙ୍କର ଭୟଶୂନ୍ୟ ଜୀବନ ସକାଶେ ମିସ୍ରୀୟବାସୀ ପ୍ରତିଫଳ ପାଉଥିଲେ । ସେମାନେ ଦଣ୍ଡ ପ୍ରତି ଅତିଙ୍କିତ ହୋଇ ଇସ୍ରାଏଲୀୟମାନଙ୍କୁ ମୁକ୍ତି ଦେବା ନିମନ୍ତେ ନିବେଦନ କଲେ । ମୋଶାଙ୍କ ପ୍ରାର୍ଥନା ଦ୍ଵାରା ସମସ୍ତ ବିପଦ ଦୂର ହେବା ଦେଖି ଫାରୋ ମନକୁ ଭାରୀ କଲେ । ଯଦିଓ ସଦାପ୍ରଭୁ ଫାରୋଙ୍କ ହୃଦୟକୁ କଠିନ କରୁଥିଲେ କିନ୍ତୁ ବାରମ୍ବାର ତାଙ୍କ ପ୍ରତି ସଦୟ ହୋଇ ତାଙ୍କୁ ପରୀକ୍ଷା କରୁଥିଲେ ଏବଂ ନିଜର ଶକ୍ତି ଓ ପରାକ୍ରମର ପରିଚୟ ପ୍ରକାଶ କରୁଥିଲେ ।
ଈଶ୍ଵରଙ୍କ କର୍ମ ଓ ପରିଚୟ :
ଏହି ଶାସ୍ତ୍ରାଂଶରେ ପରମେଶ୍ୱର ନିଜ ଜ୍ଞାନ, ଗରିମା, ପରାକ୍ରମ, ପରାକାଷ୍ଠା ସଙ୍ଗେ ସଙ୍ଗେ ମିସ୍ରୀୟ ଲୋକମାନଙ୍କୁ ଦଣ୍ଡ ଦ୍ଵାରା ଆଘାତ ଦେଇ ଏହା ପ୍ରମାଣିତ କରନ୍ତି ଯେ, ସେ ସର୍ବଶକ୍ତିମାନ ପରମେଶ୍ୱର । ପରମେଶ୍ୱରଙ୍କର ମହତ୍ ଓ ଆଶ୍ଚର୍ଯ୍ୟକର୍ମ ଭବିଷ୍ୟତ ବଂଶଧରମାନଙ୍କୁ ଜଣାଇବା ପାଇଁ ବାକ୍ୟ ପ୍ରକାଶ କରେ ।
ଫାରୋଙ୍କ ପରି ଆମ୍ଭେମାନେ ମଧ୍ୟ ଯଦି ଈଶ୍ୱରଙ୍କ ଅନୁଯୋଗକୁ ହେୟଜ୍ଞାନ କରୁ ତେବେ ଆମ୍ଭମାନଙ୍କ ନିମନ୍ତେ ମଧ୍ୟ ଗୁରୁତର ଦଣ୍ଡ ରହିଛି । ତେଣୁ ସମୟ ଥାଉ ଥାଉ ନିଜକୁ ପ୍ରଭୁଙ୍କ ଚରଣରେ ସମର୍ପଣ କରି ତାହାଙ୍କ ଦୟା ଓ ଅନୁଗ୍ରହକୁ ନିଜ ଜୀବନରେ ଗ୍ରହଣ କରିବା ।