ଯଥାର୍ଥ ଆଚରଣ
ଆଜିର ଚିନ୍ତା
ଲୂକ ୬:୨୭-୩୬
ମୁଁ ଯୀଶୁଙ୍କ ଉପଦେଶକୁ ମାନ୍ୟ କରୁଛି କି ?
ଆଜିର ପଠିତାଂଶରେ ଜଗତର ଲୋକମାନଙ୍କର ଆଚରଣର ବିପରୀତ ଆଚରଣ କରିବାକୁ ଯୀଶୁ ତାଙ୍କର ଶିକ୍ଷାରେ ଆମକୁ ଜଣାଉଛନ୍ତି । ଏହାହିଁ ପ୍ରତ୍ୟକ ବିଶ୍ୱାସୀ ନିମନ୍ତେ ଯଥାର୍ଥ ଆଚରଣ ଅଟେ ।
ବାଧ୍ୟତାପୂର୍ଣ୍ଣ ଆଚରଣ : ପ୍ରଭୁଯୀଶୁ କହିଲେ "ତୁମ୍ଭମାନଙ୍କ ପିତା ଯେପରି ଦୟାଳୁ, ତୁମ୍ଭେମାନେ ମଧ୍ୟ ସେପରି ଦୟାଳୁ ହୁଅ" (୩୬ପଦ) । ଶତ୍ରୁମାନଙ୍କୁ ପ୍ରେମ କରିବା ସଙ୍ଗେ ସଙ୍ଗେ ସେମାନଙ୍କ ପାଇଁ ପ୍ରାର୍ଥନା କର । ଯେଉଁମାନେ ତୁମକୁ ଘୃଣା କରନ୍ତି ସେମାନଙ୍କର ମଙ୍ଗଳ କର । ଯେଉଁମାନେ ତୁମକୁ ଅଭିଶାପ ଦିଅନ୍ତି ସେମାନଙ୍କୁ ଆଶୀର୍ବାଦ କର । ଯେ ଗୋଟିଏ ଗାଲରେ ଚାପୁଡ଼ା ମାରେ ଅନ୍ୟ ଗାଲଟି ଦେଖାଇ ଦିଅ । ମାତ୍ର ଆମେ ଜାଗତିକତାରେ ମାତି ଯାଇଥିବାରୁ ଆମକୁ ଏହା ପାଳନ କରିବା କଷ୍ଟକର ହୁଏ । ମହାତ୍ମାଗାନ୍ଧୀ ପ୍ରଭୁଯୀଶୁଙ୍କୁ ଆଦର୍ଶ ମାନୁଥିବାରୁ ଓ ତାଙ୍କର ନୀତିବାକ୍ୟ ପାଳନ କରୁଥିବାରୁ ଅହିଂସାଦ୍ଵାରା ଭାରତକୁ ସ୍ବାଧୀନ କରିବାରେ ସଫଳ ହେଲେ । ଆମେ ବାଇବଲ ପଢୁଛୁ, ପ୍ରାର୍ଥନା କରୁଛୁ, ଗୀର୍ଜା ଉପାସନା ଯାଉଛୁ, ଦାନ ଦଶମାଂଶ ଦେଉଛୁ, ମାତ୍ର ତାଙ୍କ ବାକ୍ୟାନୁରୂପ ଆଚରଣ କରୁ ନାହୁଁ । ଏହା ଦୁଃଖର ବିଷୟ ନୁହେଁ କି ?
ପ୍ରେମପୂର୍ଣ୍ଣ ଆଚରଣ : ସାଧାରଣତଃ ଆମେ ଚାହୁଁ ଲୋକମାନେ ଆମ୍ଭମାନଙ୍କୁ ଭଲପାଆନ୍ତୁ, ସମ୍ମାନ ଦେଖାନ୍ତୁ । ମାତ୍ର ଆମେ କାହାରିକୁ ପ୍ରେମ କରୁନା । ତେଣୁ ଯୀଶୁ କହୁଛନ୍ତି "ପରସ୍ପରକୁ ପ୍ରେମ କର" । ମାତ୍ର ଆମେ ସେମାନଙ୍କୁ କରୁ ଯେଉଁମାନେ ଆମର କଥା ଶୁଣନ୍ତି, ଆମକୁ ସମ୍ମାନ ଦେଖାନ୍ତି । ଯେ ମୋତେ ୠଣ ଦିଏ, ଆନୁଗତ୍ୟ ପ୍ରକାଶ କରେ, ମୁଁ ତାକୁ ୠଣ ଦେଇଥାଏ ଓ ତାର ମଙ୍ଗଳ କରିଥାଏ । ପାଇବା ଆଶାରେ ଆମେ ୠଣ ଦେଉ । ସେଥିପାଇଁ ଆମେ ଯୀଶୁଙ୍କ ଶିକ୍ଷାର ବିପରୀତ ଆଚରଣ କରୁଛୁ । ତେଣୁ ଯୀଶୁଙ୍କର ଆଜ୍ଞାକୁ ମାନି ଅନ୍ୟମାନଙ୍କ ସହିତ ପ୍ରେମରେ ବାସ କରୁ ବର୍ତ୍ତମାନ ସୁଦ୍ଧା ସମୟ ଅଛି, ଆମ୍ଭମାନଙ୍କୁ ଅନୁତାପ ସହ ଯୀଶୁଙ୍କ ଚରଣ ତଳକୁ ଫେରିବା ଆବଶ୍ୟକ, ଯେମିତି ଲୋକେ ଆମ୍ଭମାନଙ୍କ ଆଚରଣ ଓ ଉଚ୍ଚାରଣରୁ ବୁଝିବେ ଯେ ଆମେ ଯୀଶୁଙ୍କର ଅଟୁ ।