ପାପୀଙ୍କର ବନ୍ଧୁ ଯୀଶୁ
ଆଜିର ଚିନ୍ତା
ଲୁକ ୫:୨୭-୩୯
ମୁଁ ପ୍ରଭୁଙ୍କର ଆହ୍ବାନକୁ ସମ୍ମାନ ଦେଇଥାଏ କି ?
ଆଜିର ଶାସ୍ତ୍ରାଂଶରେ ଆମେ ଲେବୀଙ୍କ (ମାଥିଉ) ଆହ୍ବାନ ବିଷୟ ପାଠ କରୁ। କର ଆଦାୟ କରିବା ତାଙ୍କର ବୃତ୍ତି ଥିଲା । ସାଧାରଣତଃ କରଗ୍ରାହୀମାନଙ୍କୁ ଲୋକମାନେ ଘୃଣା କରୁଥିଲେ । ଯିହୁଦୀମାନେ ତାହାଙ୍କୁ ଜଣେ ପାପୀ ଲୋକ ବୋଲି କହୁଥିଲେ । ଯୀଶୁ ପାପୀମାନଙ୍କର ହୃଦୟକୁ ଜାଣି ପାରୁଥିଲେ । ପାପରୁ ଉଦ୍ଧାର ପାଇବା ପାଇଁ ମନ ପରିବର୍ତ୍ତନର ଆହ୍ବାନ ସେମାନଙ୍କୁ ଦେଉଥିଲେ ।
ମନ ପରିବର୍ତ୍ତନର ନିମନ୍ତେ ଆହ୍ବାନ : ଯୀଶୁଙ୍କର ଅନୁଗମନ କରି ତାଙ୍କର ଶିଷ୍ୟ ହେବା ପାଇଁ ଲେବୀଙ୍କୁ ସେ ସୁଯୋଗ ଦେଇଥିଲେ । ସେ ଯୀଶୁଙ୍କର ଆହ୍ୱାନକୁ ଗ୍ରହଣ କରିଥିଲେ ଏବଂ ସମ୍ମାନ ଦେଇଥିଲେ । ସମସ୍ତ ବିଷୟ ପରିତ୍ୟାଗ କରି ଯୀଶୁଙ୍କର ପଛେ ପଛେ ଯାଇଥିଲେ । ସେ ଯୀଶୁଙ୍କ ଆହ୍ଵାନର ଆଜ୍ଞାବହ ହେଲେ । ଆମେ ବାକ୍ୟ ଶୁଣିଥାଉ କିନ୍ତୁ ବାକ୍ୟକୁ ଗ୍ରହଣ କରି ସମ୍ମାନ ଦେଇ ଅଜ୍ଞାବହ ହେବା ପାଇଁ ଗୁରୁତ୍ଵ ଦେଇ ନ ଥାଉ । ଏହାଦ୍ବାରା ଆମର ଆତ୍ମିକ ଜୀବନର ଦୁର୍ବଳତା ପ୍ରକାଶ ପାଇଥାଏ । ଏ ବିଷୟରେ ଆମକୁ ସାବଧାନ ହେବାକୁ ପଡିବ । ଲେବୀଙ୍କ ଜୀବନରେ ପରିତ୍ରାଣର ଆନନ୍ଦ ଦେଖି ପାରୁଛୁ । ସେଥିପାଇଁ ସେ ତାଙ୍କର ଗୃହରେ ଭୋଜିର ଆୟୋଜନ କରିଥିଲେ । ନିଜେ ପାଇଥିବା ଆନନ୍ଦକୁ ବାଣ୍ଟିବା ପାଇଁ ବହୁ ସଂଖ୍ୟକ ଲୋକମାନଙ୍କୁ ଭୋଜିରେ ସାମିଲ କରିଥିଲେ । ସେହି ଗୃହରେ ଯୀଶୁ ଜଗତକୁ ଆସିବାର ଉଦ୍ଦେଶ୍ୟ ସମସ୍ତଙ୍କୁ ଜଣାଇ କହିଲେ, ମନ ପରିବର୍ତ୍ତନ କରିବା ନିମନ୍ତେ ପାପୀମାନଙ୍କୁ ଆହ୍ଵାନ କରିବା ପାଇଁ ମୁଁ ଆସିଅଛି । (୩୨ପଦ)
ଉପବାସ ପ୍ରାର୍ଥନାର ଆବଶ୍ୟକତା : ବର୍ତ୍ତମାନ ଆମେ ବରଙ୍କର ଅନୁପସ୍ଥିତିର ସମୟ ମଧ୍ୟରେ ବାସ କରୁଅଛୁ । ଈଶ୍ଵରଙ୍କ ଇଚ୍ଛାକୁ ଜାଣିବା ପାଇଁ ଉପବାସ ଏବଂ ପ୍ରାର୍ଥନା କରିବା ଉଚିତ । କିନ୍ତୁ ଉପବାସ ପ୍ରାର୍ଥନାର ଗୁରୁତ୍ଵକୁ ନ ବୁଝି ପ୍ରାର୍ଥନା କରିବା ସଠିକ୍ ବିଷୟ ନୁହେଁ । ଏହାଛଡା ନୁଆ ଦ୍ରାକ୍ଷାରସ ଯୀଶୁଙ୍କର ସୁସମାଚାର ଏବଂ ପରିତ୍ରାଣର ସମ୍ବାଦକୁ ବୁଝାଏ । ଫାରୁଶୀମାନେ ନିଜର ପୁରାତନ ସ୍ଵଭାବକୁ ଦୂର କରି, ନୂତନ ସ୍ଵଭାବରେ ଆଚରଣ କରିବା ପାଇଁ ଆମକୁ ସଚେତନ କରେ । ଆମେ ଲେବୀଙ୍କ ଭଳି ଯୀଶୁଙ୍କ ଆହ୍ଵାନର ବାଧ୍ୟ ହେବା କି ? ଲେବୀଙ୍କ ଜୀବନରେ ପୁରାତନ ବିଷୟ ସବୁ ଲୋପ ପାଇ ନୂତନ ବିଷୟ ସବୁ ହୋଇଛି ବୋଲି ଆମେ ଜାଣିପାରିଛୁ । ଧନର ମାୟା ଏବଂ ଜଗତର ଆକର୍ଷଣ ତାଙ୍କର ଜୀବନରେ ରହିଲା ନାହିଁ । ସେ ସାରା ଜୀବନ ଯୀଶୁଙ୍କର ଅନୁଗମନ କରି ତାଙ୍କର ଶିଷ୍ୟତ୍ୱ ଗ୍ରହଣ କଲେ ।