ସମର୍ପିତ ଜୀବନ
ପଠନ: ଗୀତ ୩୧:୧-୨୪
ଆଜିର ଚିନ୍ତା
କ୍ଳେଶ ଓ ଦୁଃଖରେ ଆମେ ଆତଙ୍କିତ ହୋଇ ପଡୁ କି?
ସମଗ୍ର ବିଶ୍ବ ୨୦୧୯ ଡିସେମ୍ବର ଠାରୁ ଅଦ୍ୟାବଧି କୋଭିଡ ୧୯ ପରି ମହାମାରୀ ଦ୍ଵାରା ଆକ୍ରାନ୍ତ ହୋଇ ଅକଥନୀୟ ଦୁଃଖ ଯନ୍ତ୍ରଣା ମଧ୍ୟରେ ଗତି କରି ଆସିଛି ।ଆମେ କେତେ ପ୍ରିୟଜନଙ୍କୁ ହରେଇଛୁ ଅକାଳରେ ।ଏସବୁ ସମ୍ପୂର୍ଣ୍ଣ ଭାବରେ ଆମର ମାନସିକ ଅବସ୍ଥାକୁ ବିପର୍ଯ୍ୟସ୍ତ କରିଛି । କିନ୍ତୁ ଧନ୍ୟ ସେ ଈଶ୍ୱର ସମୟର କର୍ତ୍ତା, ଅନୁଗ୍ରହରେ ଆମ୍ଭମାନଙ୍କୁ ଏକ ନୂତନ ବର୍ଷର ପ୍ରଥମ ଦିନରେ ପଦାର୍ପଣ କରାଇଅଛନ୍ତି ।
ଯନ୍ତ୍ରଣାଗ୍ରସ୍ତର ଅନ୍ତରର କଥା (୧-୮): ରଚକ ଦାଉଦ ତାଙ୍କ ଜୀବନରେ ଅଙ୍ଗେ ନିଭାଇଥିବା ଦୁର୍ଦ୍ଦଶା,ଦୁଃଖ,ପରୀକ୍ଷା, ଆକ୍ରମଣର ନିଚ୍ଛକ ସତ ଅନୁଭୂତିର ପୃଷ୍ଠ ଭୂମିରୁ ଆଜିକାର ଗୀତକୁ ରୂପ ଦେଇଛନ୍ତି ।ସେ ନିଜେ ଭାଙ୍ଗି ପଡିନାହାନ୍ତି କି ଆମକୁ ଭୟାତୁର କରିନାହାନ୍ତି । ସେ ନିଜର ଆତ୍ମାକୁ ଅଟଳ ବିଶ୍ଵାସରେ ମହସୁରକ୍ଷା ଦାତାଙ୍କ ନିକଟରେ ସମ୍ପୂର୍ଣ୍ଣ ସର୍ମପଣ କରି ଦେଇଅଛନ୍ତି (୫ପଦ) । ଖ୍ରୀଷ୍ଟ ମଧ୍ଯ କ୍ରୁଶର ଅସହ୍ୟ ଯନ୍ତ୍ରଣାକୁ ଅତିକ୍ରମ କରି ପିତାଙ୍କ ହସ୍ତରେ ନିଜକୁ ସମର୍ପଣ କରିଦେଲେ (ଲୁକ ୨୩:୪୬) ।ତାଙ୍କ ହାତଧରି ଯାତ୍ରା ଆରମ୍ଭ କରୁ ।ସେ ଆମ ପ୍ରାଣର ତତ୍ତ୍ୱ ନେବେ - ପ୍ରଶସ୍ତ ସ୍ଥାନରେ ଚରଣ ସ୍ଥାପନ କରିବେ । ସମ୍ପୂର୍ଣ୍ଣ ସମର୍ପଣ,ଆମକୁ ଗୌରବମଣ୍ଡିତ ଆନନ୍ଦଭରା ଜୀବନ ଦେବ ।
ସମସ୍ତ ସମୟ ଈଶ୍ୱରଙ୍କ ହାତରେ (୯-୧୮): ସେ ଅତୀତ, ବର୍ତ୍ତମାନ ଓ ଭବିଷ୍ୟତକୁ ରୂପ ଦେବର ଏକମାତ୍ର ପରମେଶ୍ଵର। ଅତୀତରେ ଘଟିଯାଇଥିବା ବିପଦ,ରୋଗ ଦୁର୍ବଳତା, ନିନ୍ଦା ସମସ୍ତ ସେ ଜାଣିଛନ୍ତି। କାରଣ ସେ ସର୍ବଜ୍ଞତା।ଆମର ଦାୟିତ୍ବ କାତୋରୋକ୍ତି କରି ତାଙ୍କ ଉପରେ ନିର୍ଭର କରିବା । ସ୍ନେହପୂର୍ଣ୍ଣ କରୁଣାରେ ତାଙ୍କ ହସ୍ତଗତ ସମୟକୁ ଅପେକ୍ଷା କରିବା। ଶତ୍ରୁ ଶୟତାନର ତାଡନା, ଫାନ୍ଦ ମଧ୍ୟରୁ ଉଦ୍ଧାର କରିବା ନିମନ୍ତେ ସେ ସମର୍ଥ ଈଶ୍ୱର।ସେ ଆମ ପ୍ରତି ଅହରହ ଦୃଷ୍ଟି ରଖି ଆମ୍ଭମାନଙ୍କୁ ପ୍ରତିଷ୍ଠିତ କରିବେ।
ସମର୍ପିତକାରୀର ପୁରସ୍କାର (୧୯-୨୪): ଶରଣାଗତଙ୍କ ପାଇଁ ସେ ମଙ୍ଗଳ ସଞ୍ଚୟ କରିଛନ୍ତି। ନିଜର ଆବାସରେ, ଶ୍ରୀ ଛାମୁରେ ଆମକୁ ଗୋପନ କରି ରଖିବେ। ସ୍ନେହପୂର୍ଣ୍ଣ କରୁଣା ପ୍ରକାଶ କରି ସମର୍ପିତକାରୀର ନିବେଦନ ଶୁଣିବେ। ବିଳମ୍ବ ନକରି ତାଙ୍କ ନିକଟରେ ଆମେ ନିଜକୁ ସମର୍ପଣ କରିଦେବା। ନୂତନ ବର୍ଷର ପ୍ରତ୍ୟେକ ମୁହୂର୍ତ୍ତ ସେ ଆମକୁ ବଳବାନ କରିବେ ଓ ସାହସିକ ଅନ୍ତଃକରଣ ଦେବେ ପୁଣି ଏହି ନୂତନ ବର୍ଷର ଯାତ୍ରାରେ ସେ ସହବର୍ତ୍ତି ହେବେ।