ଦୁର୍ବଳ ବିଶ୍ଵାସ

 ଦୁର୍ବଳ ବିଶ୍ଵାସ 

ଆଜିର ଚିନ୍ତା

୧ ଶାମୁୟେଲ ୨୭:୧-୧୨

ମୋର ଦୁର୍ବଳ ବିଶ୍ଵାସ ମତେ ପଥଭ୍ରଷ୍ଟ କରୁଅଛି କି ?

ସଦାପ୍ରଭୁ ଆମର ସୁରକ୍ଷାର ଭାର ବହନ କରିଛନ୍ତି । ଏହି ସତ୍ୟ ଆମ୍ଭମାନଙ୍କୁ ଜ୍ଞାତ ଅଛି; ତଥାପି ଶୟତାନ ଆମ୍ଭମାନଙ୍କ ହୃଦୟରେ ଭୟ ସୃଷ୍ଟି କରିଥାଏ । ଆମର ବିଶ୍ବାସ ଦୁର୍ବଳ ହୋଇଯାଏ । ଆମେ ଭୟରେ ଭୁଲ୍ ସିଦ୍ଧାନ୍ତ ଗ୍ରହଣ କରି ଦୁଖଃଭୋଗ କରିଥାଉ । ପରମେଶ୍ବରଙ୍କ ଦ୍ଵାରା ମନୋନୀତ ଯେ ଆମ୍ଭେମାନେ, ଆମ୍ଭମାନଙ୍କୁ ସେ କେବେ ହେଁ ପରିତ୍ୟାଗ କରନ୍ତି ନାହିଁ ।

ଦାଉଦଙ୍କ ଦୁର୍ବଳତା :

ଶାଉଲଙ୍କ କବଳରୁ ରକ୍ଷା ପାଇବା ପାଇଁ, ଦାଉଦଙ୍କୁ ବହୁ ଘାତପ୍ରତିଘାତ ମଧ୍ୟରେ ଯିବାକୁ ପଡ଼ିଥିଲା । ସଦାପ୍ରଭୁ କିନ୍ତୁ ସମସ୍ତ ପରିସ୍ଥିତିରେ ତାଙ୍କର ସହବର୍ତ୍ତୀ ହୋଇଥିଲେ । ଭୁଲ୍ ପଦକ୍ଷେପ ନେବାକୁ ବାରଣ କରୁଥିଲେ । ଅବୀଗଲଙ୍କ ମାଧ୍ୟମରେ ମଧ୍ୟ ଏହି ବିଷୟରେ ସଚେତନ କରାଇ ଦେଇଥିଲେ । ଶାଉଲଙ୍କ ଦ୍ଵାରା ବିନଷ୍ଟ ହେବାର ଭୟକୁ ପ୍ରାଧlନ୍ୟ ଦେଇ ଦାଉଦ ପଲେଷ୍ଟୀୟ ରାଜା ଆଖୀଶଙ୍କର ଶରଣାଗତ ହେଲେ । ଈଶ୍ଵର ଯେ ତାଙ୍କୁ ମନୋନୀତ କରିଛନ୍ତି ଓ ତାଙ୍କୁ ଇସ୍ରାଏଲର ରାଜା ଭାବରେ ଅଭିଷିକ୍ତ କରିଅଛନ୍ତି, ଏହା ଭୁଲିଗଲେ । ତାଙ୍କର ଏହି ସିଦ୍ଧାନ୍ତରେ ସେ ଓ ତାଙ୍କର ସଙ୍ଗୀମାନେ ଶତ୍ରୁମାନଙ୍କ ରାଜ୍ୟରେ ଶରଣାର୍ଥି ହୋଇ ରହିଲେ। 

ଦାଉଦଙ୍କ ଚତୁରତା :

ସଦାପ୍ରଭୁଙ୍କଠାରୁ ଆମେ ଯେତେ ଦୂରକୁ ଗଲେ ମଧ୍ୟ ସେ ଆମ୍ଭମାନଙ୍କୁ ପରିତ୍ୟାଗ କରନ୍ତି ନାହିଁ । ଆମର ଦୁର୍ବଳତାରେ ତାଙ୍କର ବଳ ସିଦ୍ଧ ହୁଏ । ଶତ୍ରୁ ରାଜ୍ୟରେ ସେ ଦାଉଦଙ୍କୁ ଇସ୍ରାଏଲ ନିମନ୍ତେ ବିନିଯୋଗ କଲେ । ରାଜା ଆଖୀଶଙ୍କୁ ଅନୁରୋଧ କରି ଦାଉଦ ପଲେଷ୍ଟୀୟ ରାଜଧାନୀ ଗାଥରେ ନ ରହି, ଯିହୂଦୀୟମାନଙ୍କର ପୂର୍ବେ ଅଧିକୃତ ସିକ୍ଲଗରେ ରହିଲେ ।  ଯୋଜନା କରି ଇସ୍ରାଏଲର ଶତ୍ରୁ ଦେଶଗୁଡ଼ିକୁ ଆକ୍ରମଣ କରି ଅଧିକାର କରିବାକୁ ଲାଗିଲେ । ପ୍ରମାଣ ଲୋପ କରିବା ପାଇଁ ଯିହୂଦୀ ଲୋକମାନଙ୍କୁ ରକ୍ଷା କରି ସେମାନଙ୍କ ସହିତ ରହୁଥିବା ଅନ୍ୟ ଜାତିର ଲୋକମାନଙ୍କୁ ସଂପୂର୍ଣ୍ଣ ରୂପେ ମାରି ଦେଇଥିଲେ । ସାବଧାନତାର ସହିତ ଆଖୀଶଙ୍କ ପ୍ରଶ୍ନର ଉତ୍ତର ଦେଉଥିଲେ । ଇସ୍ରାଏଲୀୟ ସହରଗୁଡ଼ିକୁ ଆକ୍ରମଣ କରି ଅବରୋଧ କରୁଛନ୍ତି ବୋଲି କହି ଆଖୀଶଙ୍କର ପ୍ରିୟଭୋଜନ ହେବାକୁ ଲାଗିଲେ । 

ପରିସ୍ଥିତିକୁ ଭୟ ନ କରି, ପରମେଶ୍ବରଙ୍କ ଉପରେ ଦୃଢ଼ ବିଶ୍ଵାସ ସ୍ଥାପନ କଲେ, କେହି ଆମକୁ ବିନଷ୍ଟ କରିପାରିବ ନାହିଁ । ଈଶ୍ଵର ଆମ୍ଭମାନଙ୍କୁ ଭୀରୁତାର ଆତ୍ମା ଦେଇନାହାନ୍ତି (୨ତିମଥି ୧:୭) । ତେଣୁ ଆମର ସିଦ୍ଧିଦାତା ଯୀଶୁଙ୍କୁ ଲକ୍ଷ ରଖି ଗନ୍ତବ୍ୟ ପଥରେ ଧାବମାନ ହେଉ ।