ଦୁଷ୍ଟତାର ପ୍ରତିଫଳ

 ଦୁଷ୍ଟତାର ପ୍ରତିଫଳ

ଆଜିର ଚିନ୍ତା

୧ ଶାମୁ ୪:୧-୧୧

ଆମ ଜୀବନରେ ଦୁଃଖ ଓ ପରାଜୟ ଆସେ କାହିଁକି ? 

ପ୍ରାୟ ସତୁରୀ ଖ୍ରୀଷ୍ଟାବ୍ଦର କଥା । ରୋମୀୟ ବାହିନୀ ପବିତ୍ର ନଗରୀ ଯିରୁଶାଲମ ଆକ୍ରମଣ କଲେ, ନଗରକୁ ଦଗ୍ଧ କଲେ । ଯିହୁଦୀୟ ମାନଙ୍କୁ ହତ୍ୟା କଲେ । ପରବର୍ତ୍ତୀ ସମୟରେ ଖ୍ରୀଷ୍ଟୀୟାନମାନଙ୍କ ଉପରେ ପ୍ରବଳ ତାଡନା ଓ ନିର୍ଯାତନା କରାଗଲା । ହେଲେ ସେହି ରୋମ ସାମ୍ରାଜ୍ୟର ଖୁବ୍ ଶୀଘ୍ର ପତନ ହେଲା । ଦୁଷ୍ଟତାର ପ୍ରତିଫଳ ଶୀଘ୍ର ମିଳିଥାଏ । ଏହିପରି କାହିଁକି ହୁଏ ? 

ଈଶ୍ୱରଙ୍କ ଅନୁଗ୍ରହକୁ ଅପେକ୍ଷା : 

ଶାମୁୟେଲ ଯେ ଭବିଷ୍ୟତ ବକ୍ତା ହେବା ପାଇଁ ନିଯୁକ୍ତ ହୋଇଅଛନ୍ତି, ଏହା ସମସ୍ତ ଇସ୍ରାଏଲ ଜ୍ଞାତ ହୋଇଥିଲେ (୩:୨୦) ସାନ ଶାମୁୟେଲ ଯେ ଶିଲୋରେ ପୁନର୍ବାର ଈଶ୍ୱରଙ୍କ ଦର୍ଶନ ପାଇଛନ୍ତି, ଏକଥା ଭଲ ରୂପେ ଇସ୍ରାଏଲ ଜାଣିଥିଲେ (୩:୨୧) । ତଥାପି ପାଲେଷ୍ଟିୟ ମାନେ ଇସ୍ରାଏଲ ବିରୁଦ୍ଧରେ ଯୁଦ୍ଧ ସଜାଇବା ସମୟରେ ଏଲି ଯାଜକ କିମ୍ବା ତାଙ୍କ ପୁତ୍ରମାନେ ଈଶ୍ୱରଙ୍କ ଇଚ୍ଛା ଲୋଡିଲେ ନାହିଁ । ଈଶ୍ୱରଙ୍କୁ ଓ ତାଙ୍କ ଭବିଷ୍ୟତବକ୍ତାକୁ ଉପେକ୍ଷା କରି  ଦୁଃଖ ଭୋଗୀଥାଉ ।

ଈଶ୍ୱରଙ୍କ ଉପସ୍ଥିତିକୁ ଉପେକ୍ଷା :

ସେ ସମୟରେ ନିୟମ ସିନ୍ଦୁକକୁ ପବିତ୍ର ରୂପେ ମାନ୍ୟ କରାଯାଉଥିଲା । ନିୟମ ସିନ୍ଦୁକର ଉପସ୍ଥିତି ଈଶ୍ୱରଙ୍କ ଉପସ୍ଥିତି ସହ ସମାନ ବିବେଚନା କରାଯାଉଥିଲା । ଈଶ୍ୱରଙ୍କ ଇଚ୍ଛାକୁ ନ ଲୋଡ଼ି ସେମାନେ ନିୟମ ସିନ୍ଦୁକ ଛାଉଣୀକୁ ନେଲେ । ଦୁଷ୍ଟ ଭାଇ ପବିତ୍ର ନିୟମ ସିନ୍ଦୁକ ସହ ରହିଥିଲେ । ପବିତ୍ର ଈଶ୍ଵର ଅପବିତ୍ର ସମାଜରେ ରହି ନ ଥା'ନ୍ତି । ଇସ୍ରାଏଲ ମୁଖରେ ମହା ଜୟଧନ୍ବୀ କରୁଥିଲେ, ମାତ୍ର ଈଶ୍ଵର ସେମାନଙ୍କ ମଧ୍ୟରେ ନ ଥିଲେ । 

ଦୁଷ୍ଟତାର ପରିଣତି : 

ଦୁଷ୍ଟତାର ପରିଣତି ଭୟଙ୍କର ପତନ ହୋଇଥାଏ  । ଇସ୍ରାଏଲ ର ଅସଂଖ୍ୟ ସୈନ୍ୟ ସେଦିନ ମୃତାହତ ହେଲେ । ସିନ୍ଦୁକ ବିଜାତୀୟ ମାନଙ୍କ ହସ୍ତକୁ ଗଲା । ଏଲିଙ୍କର ଦୁଷ୍ଟ ପୁତ୍ରମାନେ ହତ ହେଲେ । ଶତ୍ରୁମାନଙ୍କ ମଧ୍ୟରେ ସେମାନଙ୍କ ସତ୍ୟ ଈଶ୍ୱରଙ୍କ ସାକ୍ଷ୍ୟ ନଷ୍ଟ ହେଲା । ଆମ ଜୀବନରେ ଏପରି ପରିସ୍ଥିତି ଆସିଯାଇ ନାହିଁ ତ ?