ପର୍ବ ପାଳନ
ଆଜିର ଚିନ୍ତା
ଯାତ୍ରା ୨୩:୧୦-୧୯
ପର୍ବ ପାଳନ ସମୟରେ ମୁଁ ତାହାର ଗୁରୁତ୍ୱକୁ ବୁଝି ପାଳନ କରେ କି ?
ସଦାପ୍ରଭୁ ପରମେଶ୍ୱର ଇସ୍ରାଏଲୀୟମାନଙ୍କୁ ଛଅ ଦିନ କର୍ମ କରି ସପ୍ତମ ଦିନ ବିଶ୍ରାମ କରିବା ପାଇଁ ମୋଶାଙ୍କ ଦ୍ଵାରା ଆଜ୍ଞା ଦେଇଥିଲେ । ଏହାର କାରଣ ବିଶ୍ରାମ ସମସ୍ତଙ୍କ ସ୍ୱାସ୍ଥ୍ୟ ପକ୍ଷେ ହିତଜନକ । ଏହାପରେ ପରେଶ୍ବର ଇସ୍ରାଏଲୀୟମାନଙ୍କୁ ୩ଟି ପର୍ବ ପାଳନ କରିବା ପାଇଁ ଆଜ୍ଞା ଦେଇଥିଲେ ।
୧. ତାଡିଶୁନ୍ୟ ରୋଟିର ପର୍ବ :
ଏହି ପର୍ବ ଆବୀବ୍ ମାସର ଏକ ନିରୂପିତ ଦିନରେ ୭ ଦିନ ଧରି ପାଳନ କରାଯାଏ (ଯାତ୍ରା ୧୨:୧୭) । ଏହାକୁ ମଧ୍ୟ "ନିସ୍ତାରପର୍ବ" କୁହାଯାଏ । ଏହାଦ୍ବାରା ସେମାନେ ସଦାପ୍ରଭୁଙ୍କ ଦ୍ଵାରା ମିସର ଦେଶର ଦାସତ୍ୱ ବନ୍ଧନରୁ କି ପ୍ରକାର ମୁକ୍ତ ହୋଇଥିଲେ ତାହା ସ୍ମରଣ କରନ୍ତି । ତାଡ଼ି ବା ଖମୀରକୁ ପାପ ସହିତ ତୁଳନା କରାଯାଇଛି । ପାପ ଯାହାର ଜୀବନରେ ପ୍ରବେଶ କରେ ତାକୁ ବିନାଶ ପଥରେ ନେଇଯାଏ । ତାଡ଼ିଶୁନ୍ୟ ରୋଟୀ ଅନୁତାପ ବା ପାପଶୂନ୍ୟ ଜୀବନକୁ ବୁଝାଏ । ଈଶ୍ଵର ଆମ୍ଭମାନଙ୍କୁ ପାପର ଦାସତ୍ୱ ବନ୍ଧନରୁ ମୁକ୍ତ କରି ତାଙ୍କର ନିଜସ୍ୱ ପ୍ରଜା କରି ପରିତ୍ରାଣ ଅଂଶୀ କରାଇଛନ୍ତି, ତାହାକୁ ସ୍ମରଣ କରିବା ଏକ ଆନନ୍ଦର ବିଷୟ ।
୨. ଶସ୍ୟ ଛେଦନ ପର୍ବ :
ଏହି ପର୍ବ ପାଳନ କରିବାକୁ ଯାଇ ପ୍ରତ୍ୟେକ ଇସ୍ରାଏଲୀୟମାନେ କୃଷିକାର୍ଯ୍ୟ ଦ୍ଵାରା ଅମଳ କରିବା ସମୟରେ ପ୍ରଥମ କଟା ଶସ୍ୟର ଏକ ବିଡ଼ା ଯାଜକଙ୍କ ପାଖକୁ ଆଣିବେ ଓ ଯାଜକ ତାହା ସଦାପ୍ରଭୁଙ୍କ ଉଦ୍ଦେଶ୍ୟରେ ଉତ୍ସର୍ଗ କରିବେ (ଯାତ୍ରା ୩୪:୨୨) । କାରଣ ପରମେଶ୍ୱର ବୃଷ୍ଟି ଦେଇ କ୍ଷେତ୍ରରେ ଫଳ ଉତ୍ପନ କରିବା ପାଇଁ ଯେଉଁ ଅନୁଗ୍ରହ କରିଛନ୍ତି, ତାହାର ପ୍ରଥମ ଅଂଶ ଆମ୍ଭେମାନେ ପ୍ରଭୁଙ୍କ ଉଦ୍ଦେଶ୍ୟରେ ଉତ୍ସର୍ଗ କରିବା ଉଚିତ୍ । ଯାହାଦ୍ଵାରା ଈଶ୍ଵର ଆମ୍ଭମାନଙ୍କର ପରିଶ୍ରମ ଉପରେ ଓ କ୍ଷେତ୍ର ଉପରେ ଆଶୀର୍ବାଦ କରି, ଆମ୍ଭମାନଙ୍କ ଆବଶ୍ୟକତା ଯୋଗାଇବେ। କେବଳ କୃଷିକାର୍ଯ୍ୟ କରୁଥିବା ବ୍ୟକ୍ତିମାନଙ୍କ ନିମନ୍ତେ ନୁହେଁ ମାତ୍ର ପ୍ରତ୍ୟେକ ଖ୍ରୀଷ୍ଟ ବିଶ୍ୱସୀମାନେ ଈଶ୍ୱରଙ୍କୁ ଗୌରବ ଦେଇ ଆୟର ପ୍ରଥମ ଅଂଶ ଦେବା ଆବଶ୍ୟକ ।
୩. ଫଳ ସଞ୍ଚୟର ପର୍ବ :
ଇସ୍ରାଏଲୀୟମାନେ ବର୍ଷର ଶେଷ ଭାଗରେ ଫଳ ସଞ୍ଚୟ ପର୍ବ ପାଳନ କରିଥାନ୍ତି । ସେମାନେ କ୍ଷେତ୍ରର ଉତ୍ପନ କରାଯାଇଥିବା ଶସ୍ୟକୁ ସଂଗ୍ରହ କରି ଗୃହକୁ ଆଣିବା ପରେ ବୃକ୍ଷର ଫଳ, ଖଜୁରୀ ବାହୁଙ୍ଗା, ବାଇଶି ବୃକ୍ଷ ନେଇ ଆନନ୍ଦ କରିଥାନ୍ତି (ଦ୍ଵୀ. ବିବରଣ ୧୪:୨୧) । ଏହାଦ୍ବାରା ସେମାନେ ଈଶ୍ୱରଙ୍କୁ ଆଶୀର୍ବାଦକୁ ସ୍ମରଣ କରି ଆନନ୍ଦ ଉତ୍ସବ ପାଳନ କରନ୍ତି । ପରମେଶ୍ୱର ଇସ୍ରାଏଲୀୟମାନଙ୍କୁ ଭୂମିର ପ୍ରଥମ ଜାତ ଫଳ ସଦାପ୍ରଭୁଙ୍କ ଗୃହକୁ ଆଣିବାକୁ ଆଜ୍ଞା ଦେଇଥିଲେ । ଆଜି ଆମ୍ଭେମାନେ ଈଶ୍ୱରଙ୍କ ଆଶୀର୍ବାଦକୁ ସ୍ମରଣ କରି ତାଙ୍କୁ କିପ୍ରକାର ପ୍ରତିଦାନ ଦେଉଛୁ ?