ନୈତିକ ଦାୟିତ୍ବ
ଆଜିର ଚିନ୍ତା
ଯାତ୍ରା - ୨୨:୧୬-୨୪:୯
ମୋ' ମଣ୍ଡଳୀର ଅଭିବୃଦ୍ଧିରେ ମୋର ଯୋଗଦାନ କିପରି ?
ପରମେଶ୍ୱର ଇସ୍ରାଏଲୀୟମାନଙ୍କର ସାମାଜିକ ଜୀବନରେ ଥିବା କର୍ତ୍ତବ୍ୟକୁ ପାଳନ କରିବା ପାଇଁ ଏହି ଅଂଶରେ ସ୍ମରଣ କରାଇ ଦେଇଛନ୍ତି । ସମାଜ ମଧ୍ୟରେ ଥିବା ଆମ୍ଭମାନଙ୍କର ଦାୟିତ୍ବକୁ ଆମ୍ଭେମାନେ କିପ୍ରକାର ଭାବରେ ସଂପାଦନ କରି ସାମାଜିକ ଶୃଙ୍ଖଳା ଓ ନିଜର ସହିତ ଅନ୍ୟର ମଙ୍ଗଳ ସାଧନ କରିପାରିବା ତାହା ଈଶ୍ଵର ଶିକ୍ଷା ଦେଇଛନ୍ତି ।
ଈଶ୍ୱରଙ୍କ ବିରୁଦ୍ଧରେ ଅପରାଧ : ଯଦି ଜଣେ ମନୁଷ୍ୟ ଅସଙ୍ଗତ କାର୍ଯ୍ୟ କରେ ବା ସଦାପ୍ରଭୁ ଯାହା ଘୃଣା କରନ୍ତି, ସେ ପ୍ରକାର କାର୍ଯ୍ୟ କରେ କିମ୍ବା ସଦାପ୍ରଭୁଙ୍କୁ ଛାଡ଼ି ଅନ୍ୟ ଦେବତାର ନିକଟରେ ବଳିଦାନ କରେ, ତେବେ ତାହା ସତ୍ୟ, ଜୀବିତ ପରମେଶ୍ୱରଙ୍କ ବିରୁଦ୍ଧରେ ଏକ ଦଣ୍ଡନୀୟ ଅପରାଧ ଅଟେ (ଗାଲାତୀୟ ୧:୬-୯) । ତେଣୁ ସମାଜରେ ଆମ୍ଭେମାନେ ନୈତିକ ମୂଲ୍ୟବୋଧକୁ ଗୁରୁତ୍ଵ ଦେଇ ନିଜର ଜୀବନକୁ ସୁଧାରି ଉପଯୁକ୍ତ କାର୍ଯ୍ୟ କରିବା ସହ ଈଶ୍ୱରଙ୍କ ଜୀବନରେ ପ୍ରଥମ ଓ ପ୍ରଧାନ ସ୍ଥାନ ଦେବା ଉଚିତ୍ ।
ସହମାନବ ବିରୁଦ୍ଧରେ ଅପରାଧ : ଆମ୍ଭେମାନେ ସମାଜରେ ବାସ କରୁଥିବା ସମୟରେ ଆମ୍ଭମାନଙ୍କ ଜୀବନରେ ମାନବିକତାର ଗୁଣଗୁଡ଼ିକ ରହିବା ଆବଶ୍ୟକ । ଯଦି ଆମ୍ଭେମାନେ ଅମାନବୀୟ ବ୍ୟବହାର କରୁ, ପରମେଶ୍ୱର ସେମାନଙ୍କର ପ୍ରାର୍ଥନା ଶୁଣି ଆମ୍ଭମାନଙ୍କୁ ଦଣ୍ଡିତ କରିବେ (ଯିରିମିୟ ୭:୫-୭) । କାରଣ ଯେ ଦୟା କରେ ନାହିଁ, ସେ ନିର୍ଦ୍ଧୟରୂପେ ବିଚରିତ ହେବ (ଯାକୁବ ୨:୧୩) । ବିଧବା, ଦରିଦ୍ର, ଅଭାବଗ୍ରସ୍ତ ପାଇଁ ଈଶ୍ୱର ଗଭୀର ଦୟା, ଓ ପ୍ରେମ ପ୍ରକାଶ କରନ୍ତି । ସେମାନଙ୍କୁ ସୁରକ୍ଷା ଦେବା ପାଇଁ ଆଜି ଆମ୍ଭେମାନେ ସେମାନଙ୍କ ପ୍ରତି କିପ୍ରକାର ବ୍ୟବହାର କରୁଛୁ, ତାହା ଚିନ୍ତା କରିବା ।
ଈଶ୍ୱରଙ୍କୁ ଓ ଆଇନ୍ କୁ ସମ୍ମାନ ଦେବା : ଆମ୍ଭେମାନେ ସର୍ବଦା ପରମେଶ୍ବରଙ୍କ ଆଜ୍ଞାକୁ ଜୀବନରେ ପାଳନ କରି ତାଙ୍କୁ ଓ ତାଙ୍କ ଦ୍ଵାରା ପ୍ରଦତ୍ତ ନିୟମ ବା ଆଇନ୍ କୁ ସମ୍ମାନ ଦେବା ଉଚିତ୍ । ନିଜର ପ୍ରଥମ ଜାତ ପୁତ୍ରମାନଙ୍କୁ ତାଙ୍କରି ଉଦ୍ଦେଶ୍ୟରେ ଉତ୍ସର୍ଗ କରିବା ଉଚିତ୍ । ପୁଣି ଅନ୍ୟାୟ ଭାବରେ ଦରିଦ୍ର ବିରୁଦ୍ଧରେ ଯାଉଥିବା ଦୁଷ୍ଟକୁ ସାହାଯ୍ୟ କରିବା । ଜଣେ ବିଶ୍ୱାସୀ ଭାବରେ କୌଣସି କାର୍ଯ୍ୟ ପାଇଁ ଲାଞ୍ଚ ନେବା ଅନୁଚିତ୍ ଅଟେ । କାରଣ ଈଶ୍ଵର ସମସ୍ତ ବିଷୟ ଦେଖୁଛନ୍ତି । ସେ ମୁଖାପେକ୍ଷା ନ କରି ପ୍ରତ୍ୟେକ ଲୋକର କର୍ମନୁସାରେ ବିଚାର କରିବେ (୧ ପିତର ୧:୧୭) । ପୁଣି ମିଥ୍ୟା ବିଷୟରୁ ନିଜକୁ ଦୂରେଇ ରଖିବା ସହ ଦୟା ଓ ନ୍ୟାୟସଙ୍ଗତ ଅନ୍ୟ ପ୍ରତି ବ୍ୟବହାର କରିବା ଆବଶ୍ୟକ ।