ଯଥୋଚିତ ବ୍ୟବହାର
ଆଜିର ଚିନ୍ତା
ଯାତ୍ରା ୨୧: ୩୩-୨୨:୧୫
ମୁଁ ପରମେଶ୍ୱରଙ୍କ ନିୟମ ଓ ଦେଶର ଆଇନ୍ କୁ ସମ୍ମାନ ଦେଇ ଜୀବନ କାଟୁଛି କି ?
ପରମେଶ୍ୱର ଇସ୍ରାଏଲୀୟମାନଙ୍କର ସାମାଜିକ ଜୀବନକୁ ଶୃଙ୍ଖଳିତ ଓ ସେମାନଙ୍କ ମଧ୍ୟରେ କିଛି ବିବାଦ ଉପୁଜିଲେ ତାହାର ନ୍ୟାୟସଂଗତ ସମାଧାନ କରିବା ପାଇଁ ଏହିସବୁ ଆଇନ୍ ବା ନିୟମ ମୋଶାଙ୍କ ଦ୍ଵାରା ପ୍ରଦାନ କରିଥିଲେ । ଏହି ଆଇନ୍ ଅନୁସାରେ ଈଶ୍ୱରଙ୍କ ଲୋକମାନେ ଅନ୍ୟ ପ୍ରତି କୋମଳ ଓ ଦୟାର ମନୋଭାବ ପୋଷଣ କରିବା ପାଇଁ ସର୍ବଦା ପ୍ରସ୍ତୁତ ରହିବା ଆବଶ୍ୟକ। କାରଣ ଈଶ୍ୱରଙ୍କ ଆତ୍ମିକ ଶକ୍ତି ଆମ୍ଭମାନଙ୍କୁ ଅଧର୍ମ ଓ ସାଂସାରିକ ଅଭିଳାଷ ଦ୍ଵାରା ପରିଚାଳିତ ହେବାକୁ ନ ଦେଇ ବର୍ତ୍ତମାନ ଜଗତର ସୁବୁଦ୍ଧି, ଧାର୍ମିକ ଓ ଈଶ୍ଵର ପରାୟଣ ଜୀବନ କାଟିବା ପାଇଁ ସାହାଯ୍ୟ କରିଥାଏ (ତୀତସ ୨:୧୨) ।
ବ୍ୟକ୍ତିଗତ ଧନ ସମ୍ପତ୍ତିର ସୁରକ୍ଷା ନିମନ୍ତେ ଆଇନ୍ :
ଚୋରି ନ କରିବା ପାଇଁ ପରମେଶ୍ୱର ଦଶ ଆଜ୍ଞାରେ କହିଥିଲେ । ଏଠାରେ ଇସ୍ରାଏଲୀୟମାନଙ୍କର ବିଚାର କରିବା ସମୟରେ ବିଚାରକର୍ତ୍ତାମାନଙ୍କୁ ଏକ ସ୍ଵତନ୍ତ୍ର ନିୟମକୁ ଅନୁସରଣ କରିବାକୁ ଆଜ୍ଞା ଦିଆଯାଇଛି । ଯଦ୍ଦ୍ୱାରା ସେମାନଙ୍କର ଦୈନନ୍ଦିନ ଜୀବନକୁ ଦେଶର ଶାସନ ବ୍ୟବସ୍ଥା ନ୍ୟାୟ ଓ ସୁରକ୍ଷା ଦେଇପାରିବ । ଯଦି ଜଣେ ବ୍ୟକ୍ତି ଅନ୍ୟର ବିରୁଦ୍ଧରେ ଭୁଲ କରି ତାହାର ଜୀବନ, ଜୀବିକା ଉପରେ ଆଞ୍ଚ ଆଣେ ତେବେ ସେ ତାହାର ବହୁଗୁଣ ଫେରାଇ ଭୁଲ ସ୍ୱୀକାର କରି ଦଣ୍ଡିତ ହେବ ।
ଅନ୍ୟର କ୍ଷତି ନ କରିବା ଆଇନ୍ :
ନୈତିକତା ଦଷ୍ଟିକୋଣରୁ ଜଣେ ବ୍ୟକ୍ତି ସ୍ୱାର୍ଥପର ନ ହୋଇ ନିଜର ସମ୍ପତ୍ତିକୁ ଯେପରି ସୁରକ୍ଷା ଦେଇଥାଏ, ସେହିପରି ପଡ଼ୋଶୀର ଧନ ସମ୍ପତ୍ତିକୁ ମଧ୍ୟ କ୍ଷତି ନ ପହଞ୍ଚାଇ ସୁରକ୍ଷା ଦେବା ଉଚିତ୍ । ଯଦି ଆମ୍ଭେମାନେ ପଡ଼ୋଶୀର କୌଣସି ଦ୍ରବ୍ୟ ବ୍ୟବହାର କରିବାକୁ ଆଣିଥାଉ, ତେବେ ତାହାକୁ ଉପଯୁକ୍ତ ଯତ୍ନ ସହକାରେ ବ୍ୟବହାର କରି ଫେରାଇ ଦେବା ଉଚିତ୍ । ଯଦି ଆମ୍ଭମାନଙ୍କ ବିରୁଦ୍ଧରେ କେହି କିଛି ଅନ୍ୟାୟ ବା ଭୁଲ୍ କାର୍ଯ୍ୟ କରେ, ତେବେ ଆମ୍ଭେମାନେ ବିଚାରାଳୟରେ ତାହା ବିରୁଦ୍ଧରେ ଅଭିଯୋଗ କରିବା ପାଇଁ ଅବା ଅବିଶ୍ୱାସୀମାନଙ୍କ ନିକଟକୁ ତାହା ସମାଧାନ କରିବାକୁ ନ ଯାଇ ମଣ୍ଡଳୀରେ ଥିବା ଜ୍ଞାନୀ ଲୋକମାନଙ୍କ ଦ୍ବାରା ତାହାର ସମାଧାନ କରିବା ଉଚିତ୍ ।
ଶେଷରେ ଈଶ୍ୱରଙ୍କ ବାକ୍ୟ ଆମ୍ଭମାନଙ୍କୁ ଏହି ଶିକ୍ଷା ଦିଏ ଯେ, ଈଶ୍ଵର ଯଦି ଆମ୍ଭମାନଙ୍କ ସହିତରେ ଅଛନ୍ତି, ତେବେ ତାହା ଆମ୍ଭମାନଙ୍କ ଆତ୍ମାର ସମସ୍ତ ଆବଶ୍ୟକତାକୁ ପୂର୍ଣ୍ଣ କରିବା ପାଇଁ ଯଥେଷ୍ଟ ଅଟେ ।