ସୁବିବେଚାନାଯୁକ୍ତ ଜ୍ଞାନ
ଆଜିର ଚିନ୍ତା
୧ ଶାମୁୟେଲ ୨୫:୨୩-୪୪
ମୁଁ ଘଡ଼ିସନ୍ଧି ମୁହୂର୍ତ୍ତରେ ସୁବିବେଚାନାଯୁକ୍ତ ଜ୍ଞାନର ବ୍ୟବହାର କରେ କି ?
ଜ୍ଞାନ ଓ ସୁବିବେଚନା ପରସ୍ପର ପରିପୂରକ । ସୌନ୍ଦର୍ଯ୍ୟ ସହିତ ଅବୀଗଲଙ୍କୁ ସଦାପ୍ରଭୁ ଜ୍ଞାନ ଓ ସୁବିବେଚନା ପ୍ରଦାନ କରିଥିଲେ । ତେଣୁ ନିଜର ସ୍ବାମୀ ତଥା ପରିବାରର ମଙ୍ଗଳ କରିବା ପାଇଁ ଠିକ୍ ସମୟରେ ସେ ଉପଯୁକ୍ତ ପଦକ୍ଷେପ ନେଇ ପାରିଥିଲେ ।
ଶାନ୍ତି ସ୍ଥାପନକାରିଣୀ ଅବୀଗଲ :
ଦାଉଦଙ୍କ ଅନୁରୋଧକୁ ନାବଲ କିପରି ପ୍ରତ୍ୟାଖ୍ୟାନ କରି ଆପଣା ସହିତ ପରିବାରର ସମସ୍ତ ପୁରୁଷ ପିଲାଙ୍କର ବିନାଶର କାରଣ ହେବାକୁ ଯାଉଛନ୍ତି, ଏହା ଶୁଣିବାମାତ୍ରେ ଅବିଗଲ ପ୍ରଚୁର ଉତ୍ତମ ଦ୍ରବ୍ୟ ସହିତ ଦାଉଦଙ୍କୁ ଭେଟି ଭୂମିଷ୍ଠ ପ୍ରଣାମ ଜଣାଇଲେ । ଆପଣା ସ୍ବାମୀଙ୍କର ଅନ୍ୟାୟ କାର୍ଯ୍ୟର ଦୋଷ ନିଜ ଉପରକୁ ନେଇ ଅତି ବିନମ୍ର ଭାବରେ ଦାଉଦଙ୍କୁ କ୍ଷମା ପ୍ରାର୍ଥନା କରିଥିଲେ । ଶାନ୍ତିକାରକ ହୋଇ ଧନ୍ୟ ବୋଲି ପ୍ରଶଂସିତା ହେଲେ ।
ସୁରକ୍ଷାଦାତ୍ରୀ ଆବୀଗଲ :
ସଦାପ୍ରଭୁ ବିଷୟକ ଭୟ ଅବୀଗଲଙ୍କ ଜୀବନରେ ଥିଲା । ତେଣୁ ସଦାପ୍ରଭୁ ଯେ ଦାଉଦଙ୍କ ସପକ୍ଷରେ ଅଛନ୍ତି ପୁଣି ତାଙ୍କୁ ଇସ୍ରାଏଲର ଅଗ୍ରଣୀ କରି ନିଯୁକ୍ତ କରିବେ, ଏହା ସେ ଜାଣିଥିଲେ । ଦ୍ଵିତୀୟରେ, ଦାଉଦଙ୍କୁ ସଦାପ୍ରଭୁଙ୍କ ଯୋଜନା ଓ ମଙ୍ଗଳଦାନସବୁକୁ ସ୍ମରଣ କରାଇ ଦେଇ ରକ୍ତପାତ ଦୋଷରୁ ଏବଂ ନିଜ ହସ୍ତରେ ଆତ୍ମ ପ୍ରତିକାର କରିବାରୁ ରକ୍ଷା କଲେ । ଅବୀଗଲ ନିଜ ପରିବାରକୁ ସୁରକ୍ଷା ଦେବା ସହିତ ଦାଉଦଙ୍କୁ ମଧ୍ୟ ପ୍ରତିଶୋଧ ନେବାରୁ କ୍ଷାନ୍ତ କରାଇ, ସଦାପ୍ରଭୁଙ୍କ କ୍ରୋଧରୁ ସୁରକ୍ଷା ଦେଲେ ।
ଅବୀଗଲଙ୍କର ଅନୁଯୋଗ ଦାଉଦ ଗ୍ରହଣ କରି ମହାନୁଭବତାର ପରିଚୟ ଦେଇଥିଲେ । ନାବଲ କିନ୍ତୁ ନିଜର ପତ୍ନୀଠାରୁ ସମସ୍ତ ଘଟଣା ଶୁଣିବା ପରେ କେବଳ ଦୁଃଖ ପ୍ରକାଶ କଲା । ପ୍ରତିକାର ସ୍ୱରୂପ ଅନ୍ୟ କୌଣସି ପଦକ୍ଷେପ ନେଲା ନାହିଁ । ଫଳରେ ଦାଉଦ ସୁରକ୍ଷିତ ହେଲେ । ନାବଲକୁ ସଦାପ୍ରଭୁ ଆଘାତ କଲେ । ଆମ୍ଭେମାନେ ମଧ୍ୟ ନିଜ ଅପରାଧରୁ ଫେରିଲେ, ବିନଷ୍ଟ ନ ହୋଇ ରକ୍ଷା ପାଇପାରିବା (ଯିହିଜିକଲ ୧୮:୨୮) ।